ހޯމަ ދުވަހު ތުރުކީއާއި ސީރިއާއަށް އައި 7.8 މެގްނިޓިއުޑްގެ ބާރުގަދަ ބިންހެލުމާ ގުޅިގެން މަރުވި މީހުންގެ އަދަދު މަދުވެގެން 19000ށް އަރާފައިވާ ކަމަށް, ކަމާބެހޭ ފަރާތްތަކުން ބުނެފިއެވެ.

މީޑިއާ ރިޕޯޓްތައް ބުނާގޮތުން، ސީރިއާގައި މަރުވި މީހުންގެ އަދަދު 3162ށް ވަނީ އަރާފައެވެ. އަދި ތުރުކީގައި މަރުވި މީހުންގެ އަދަދު 16170އަށް ވަނީ އަރާފައެވެ. މި ބިންހެލުމާ ގުޅިގެން ތުރުކީގެ ރައީސް އުރުދުޣާން ވަނީ އެމެރިކާ، އިނގިރޭސިވިލާތް، ޔޫއޭއީ، އިސްރާއީލް އަދި ރަޝިޔާފަދަ ގައުމުތަކުން ތުރުކީއަށް އެހީތެރިވެދިނުމަށް ހުށަހަޅާފައިވާކަން ހާމަކުރައްވާފައެވެ. އެމަނިކުފާނު ވިދާޅުވީ 70 ގައުމުންނާއި ބައިނަލްއަގްވާމީ 14 ޖަމްއިއްޔާއިން އެ ގައުމަށް އެހީތެރިކަން ފޯރުކޮށްދޭނެކަން ހާމަކޮށްފައިވާކަމަށެވެ.

މި ބިންހެލުމުގެ ސަބަބުން ވެއްޓިފައިވާ ޢިމާރާތްތަކުގެ ކޮންކްރީޓްތަކުގެ ދަށުވެފައިވާ އެތައް ހާސް މީހުން ތިބިއިރު، އިމާރާތްތަކުގެ ދަށުވެފައިވާ މީހުން ސަލާމަތްކުރުމުގެ މަސައްކަތް ކަމާބެހޭ ފަރާތްތަކުން ދަނީ ކެނޑިނޭޅި ކުރަމުންނެވެ. މީޑިއާ ރިޕޯޓްތައް ބުނާގޮތުން ސީރިއާއާއި ތުރުކީގައި ބިންހެލުމުގެ އަސަރުކުރި މީހުންގެ އަދަދު 23 މިލިޔަނަށް އަރާނެ ކަމަށް ބެލެވެއެވެ.