ތުރުކީ-ސީރިއާއަށް އައި ބިންހެލުންތަކުގައި މަރުވި މީހުންގެ އަދަދު 16،000ށް ވުރެ މައްޗަށް
9 ފެބުރުއަރީ 2023 | ބުރާސްފަތި 10:04ސީރިއާއިން މިހާތަނަށް 3162 މީހަކު ވަނީ މަރުވެފައި
ތުރުކީގެ އަވަށެއްގެ އިމާރާތެއްގެ ދަށުން މީހެއްގެ ހަށިގަނޑު ނެރެނީ
ހޯމަ ދުވަހު ތުރުކީއާއި ސީރިއާއަށް އައި ބާރުގަދަ ބިންހެލުމުގައި މަރުވި މީހުންގެ އަދަދު މިހާރު މަދުވެގެން 16،035 އަށް އަރާ ކަމަށް ކަމާބެހޭ ފަރާތްތަކުން ބުނެފިއެވެ.
ސީރިއާގައި މަރުވި މީހުންގެ ޖުމްލަ އަދަދު މަދުވެގެން 3،162ށް އަރާ ކަމަށާއި އޭގެ ތެރޭގައި ހުޅަނގު އުތުރުގެ ހަނގުރާމަވެރިންގެ ބާރުގެ ދަށުގައިވާ ސަރަހައްދުތަކުގައި 1،900 މީހުން މަރުވެފައިވާ ކަމަށް "ވައިޓް ހެލްމެޓްސް" ސިވިލް ޑިފެންސް ގްރޫޕުން ބުނެއެވެ. ސީރިއާގެ ދައުލަތުގެ މީޑިއާތަކުން ބުނާ ގޮތުގައި އެގައުމުގެ ސަރުކާރުން ކޮންޓްރޯލްކުރާ ސަރަހައްދުތަކުން 1،262 އެއްހާ މީހުން މަރުވެފައިވެއެވެ.
ތުރުކީގައި މަރުވި މީހުންގެ އަދަދު މަދުވެގެން 12،873 އަށް އަރާފައިވާ ކަމަށް ތުރުކީގެ ޑިޒާސްޓާ އެންޑް އިމަޖެންސީ މެނޭޖްމަންޓް އެޖެންސީ (އަފާޑް) އިން ބުރާސްފަތި ދުވަހު ވަނީ ބުނެފައެވެ.
ފިނި މޫސުމުގެ ތެރޭގައި ވެއްޓިފައިވާ އެތައް ހާސް އިމާރާތްތަކެއްގެ ދަށުން، ސާޗް އެންޑް ރެސްކިއު ޓީމުތަކުން ހަރަކާތްތެރިވަމުން ދާއިރު، ޚާއްސަކޮށް ސީރިއާގައި މަރުވި މީހުންގެ އަދަދު ވަރަށް ބޮޑަށް އިތުރުވުމުގެ ފުރުސަތު ބޮޑު ކަމަށް އެހީދޭ އިދާރާތަކުން ވަނީ އިންޒާރު ދީފައެވެ.
މުޅި ސަރަހައްދުން އެތައްއެތައް ހާސް މީހުންނަށް އަނިޔާވެފައިވާ ކަމަށް އޮފިޝަލުން ބުނެއެވެ.
