ސަރުކާރުގެ ރައްދު ރައީސް ނަޝީދަށް - ވެރިކަން ކުރައްވާފައި ހުންނަވާ ބޭފުޅަކަށް ދައުލަތުގެ މާލީކަންކަން އޮންނަ ގޮތް އެނގިވަޑައިގަންނަވަންވާނެ

އިންތިހާބުތަކާއި ގުޅިގެން ޑޮކްޓަރަށް ދައްކާ އަދަދު އިތުރުވާކަމެއް އެނގިވަޑައިނުގަންނަވާ ކަމަށާއި، އާސަންދައިން އެކިމަހުގައި ކުރާ ހަރަދުތައް ހުންނާނީ އެކިވަރަށް ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުމުގައި އާސަންދައިގެ ހަރަދު ބޮޑުވެފައިވަނީ އިންތިހާބާއި ގުޅިގެންތޯ މަޖިލީހުގެ ރައީސް އުފެއްދެވި ސުވާލަކާއި ގުޅިގެން، އެކަމަށް ރައްދު ދެއްވަމުން މިއުވާން ވިދާޅުވި އާސަންދައަށް ޖެނުއަރީ މަހުގައި ކުރި ހަރަދު ވަކިން ބޮޑު ނޫން ކަމަށެވެ. މިއުވާން ވިދާޅުވީ ތަފާސް ހިސާބުތައް ފެންނަން ހުންނާނެ ކަމަށާއި، އެކި މަސް މަހު ހަރަދުކުރެވިފައި ހުންނާނި އެކިވަރަށް ކަމަށެވެ. އެތެރޭގެ އިންތިހާބަކާއި އާސަންދައަކާއި ގުޅުވީ ކިހިނެއް ކަމެއް ވިސްނިވަޑައިނުގަންނަވާ ކަމަށެވެ.

މިއުވާން ވިދާޅުވީ ބައެއް މަސްމަހުގައި އެމަހެއްގެ ބިލްތައް ނުދައްކާ އެހެން މަސްމަހުގެ ވެސް ދައްކާފައި ހުންނާނެ ކަމަށެވެ. ރެކޯޑްސްތަކަށް ބެލުމުން އެކަންކަން އެނގިވަޑައިގަންނަވާނެ ކަމަށެވެ.

އަދި އެކަން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ވަރަށް ރަނގަޅަށް އެނގިވަޑައިގަންނަވާނެ ކަމަށް މިއުވާން ވިދާޅުވިއެވެ. އަދި ރައީސުލްޖުމްހުރިއްޔާކަން ވެސް ކުރައްވާފައި ހުންނެވި ބޭފުޅަކަށްވުމުން ދައުލަތުގެ މާލީކަންކަން އޮންނަ ގޮތް ވަރަށް ރަނގަޅަށް އެނގިވަޑައިގަންނަވާނެ ކަމަށެވެ. އަދި އާސަންދައިން ހަރަދުކުރަނީ ރައްޔިތުންނަށް ކަމަށާއި، އިންތިހާބެއް އޮތަސް އަދި ނެތަސް އެ ހަރަދުތައް ކުރަމުންދާނެ ކަމަށެވެ.