މޮޅުވީ ގާފަރާއި އޮމަދޫއާއި ފީވަކާއި އިނގުރައިދޫ އަދި މަތިވެރި

މިހާރު ކުރިއަށްދާ ސޮނީ ސްޕޯރޓްސް ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗުތައް ގާފަރާއި, އޮމަދޫއާއި, ފީވަކާއި, އިނގުރައިދޫގެ އިތުރުން މަތިވެރިން ކާމިޔާބުކޮށްފިއެވެ.

ކ.އަތޮޅު ބުރުގައި ގާފަރު މެޗު ކާމިޔާބުކުރީ ތުލުސްދޫއާއި ވާދަކޮށް 8-0 ނެވެ. މެޗުގައި އަލީ މާއިޝްއާއި, އިބްރާހީމް ރިމާހު ކޮންމެ ކުޅުންތެރިއަކު ދެ ލަނޑު ޖެހިއެވެ. ގާފަރުގެ އަނެއް ހަތަރު ލަނޑު ޖެހީ ސާމިން މުޙައްމަދު ނަސީރާއި, އައްޒާމް ނިޔާޒުއާއި, އަޒްޔާން އިބްރާހީމްއާއި, ސަނީމް ސާމިލްއެވެ. ކ.އަތޮޅު ބުރުގައި ގުރައިދޫއާއި ދިއްފުށި ވާދަކުރި މެޗު ދިއްފުށި ކާމިޔާބުކުރީ 3-1 ލަނޑުންނެވެ.

ށ.އަތޮޅު ބުރުގައި ފީވައް މެޗު ކާމިޔާބުކުރީ ޅައިމަގާއި ވާދަކޮށް 3-1 ނެވެ. ފީވަކުގެ ތިން ލަނޑު ޖެހީ އަބުދުالله އަމާން, އަބުދުالله ރިމާހު އަދި ހުސައިން ސާމިހުއެވެ. ޅައިމަގުގެ ލަނޑު ޖެހީ މުހައްމަދު ފަސީލްއެވެ.

ތ.އަތޮޅު ބުރުގައި އޮމަދޫ މެޗު ކާމިޔާބުކުރީ ހިރިލަންދޫއާއި ވާދަކޮށް 5-0 ނެވެ. އަހުމަދު ނަޝްވާން މެޗުގައި ދެ ލަނޑު ޖެހިއެވެ. އަނެއް ތިން ލަނޑު ޖެހީ މުހައްމަދު ލީވާން ހަސަން, ސަހުލާން ބިން މުޙައްމަދު އިދުރީސް އަދި އިސްމާއީލް މިމްރާހު މުއީންއެވެ. ތ.ގާދިއްފުށްޓާއި ވޭމަންޑޫ ވާދަކުރި މެޗު ނިމުނީ 3-3 ން އެއްވަރުވެގެންނެވެ.

ރ.އަތޮޅުން އިނގުރައިދޫ މެޗު ކާމިޔާބުކުރީ އިންނަމާދޫއާއި ވާދަކޮށް 8-0 ނެވެ. މެޗުގައި އަހުމަދު އައިހަމް ތިން ލަނޑު ޖަހާ ހެޓްރިކް ހެދިއެވެ. އަދި އަލީ ހާފިޒުއާއި, މުހައްމަދު މަމްދޫހު ކޮންމެ ކުޅުންތެރިއަކު ދެ ލަނޑު ޖެހިއެވެ. ދެން އެޓީމަށް ލަނޑު ޖެހައިދިނީ މުހައްމަދު ޖުމާންއެވެ.

އއ. ބުރުގައި މަތިވެރި ވަނީ ތޮއްޑޫއާއި ވާދަކޮށް ފުރަތަމަ މެޗު ކާމިޔާބުކޮށްފައެވެ. އެއީ 4-1 ނެވެ. މެޗުގައި މަތިވެރީގެ ލަނޑުތައް ޖެހީ މުޙައްމަދު އިމްރާން, އިސްމާއީލް ނަސީމް, އަހުމަދު ފިރާޝް އަދި އަލީ އަލްސަންއެވެ. ތޮއްޑޫގެ ހަމައެކަނި ލަނޑު ޖެހީ އިބްރާހީމް ޝިޔާޒްއެވެ. އއ.އަތޮޅުގެ ރަސްދޫއާއި ފެރިދޫ ވާދަކުރި މެޗު ނިމުނީ 1-1 ން އެއްވަރުވެގެންނެވެ.