ވިކްޓްރީގެ އެނބުރި އައުން އުނގޫފާރާ ދެކޮޅަށް، މޮޅުވީ ވިކްޓްރީ
20 ޖޫން 2022 | ހޯމަ 02:53ވިކްޓްރީގެ ކޭމްޕް ހޯމަދުވަހުގެ ނިޔަލަށް ނިމޭނެ
ވިކްޓްރީއާއި އުނގޫފާރު ވާދަކުރި މެޗުގެ ތެރެއިން: ފޮޓޯ-ވިކްޓްރީ
2019 ވަނަ އަހަރު ކުރިމަތިވި ސަސްޕެންޝަނުން މިމަމު ސަލާމަތްވެ, ދެވަނަ ޑިވިޝަނަށް ތައްޔާރުވާ ވިކްޓްރީ ކުޅުނު ފުރަތަމަ މެޗުގައި އުނގޫފާރު ފުޓްބޯޅަ ޓީމް އަތުން މޮޅުވެއްޖެއެވެ.
ތަޖުރިބާކާރު ކޯޗު މުޙައްމަދު ޝިޔާޒު (މޯހަން)ގެ އިރުޝާދުގެ ދަށުން ދިވެހި ލީގަށް ކޮލިފައިވާން މަސައްކަތްކުރަމުން އަންނަ އުނގޫފާރާ ދެކޮޅަށް ވިކްޓްރީން ރަހުމަތްތެރިކަމުގެ މެޗެއް ކުޅުނީ ޅ.ހިންވަރުގައެވެ. މިމަހުގެ 10 ން ފެށިގެން ވިކްޓްރީ އޮތީ ހިންނަވަރުގައި ކޭމްޕުކޮށްފައެވެ. އެއީ އަންނަ މަހު ފަށާ ދެވަނަ ޑިވިޝަން ފުޓްބޯޅަ މުބާރާތަށް ތައްޔާރުވުމަށެވެ. އާބޯޑެއް ވިކްޓްރީއާ ހަވާލުވެ, ކްލަބްގެ ދަރަނި ދެއްކުމުން އެފްއޭއެމްގެ ކޮންގްރެސްއިން ކްލަބްގެ ސަސްޕެންޝަން އުވާލީ މިމަހުއެވެ.
ވިކްޓްރީގެ ސަސްޕެންޝަން އުވާލިއިރު އެކްލަބުން ވަނީ ޓީމަށް ބިދޭސީ ކުޅުންތެރިން ގެނެސް ދިވެހި ކުޅުންތެރިންނާއެކު ޓީމެއް އެކުލަވާލާފައެވެ. ޓީމްގެ ކޯޗަކީ ސްރީލަންކާގެ ޕަކީރު އަލީއެވެ. އުނގޫފާރު އަތުން ވިކްޓްރީ މޮޅުވީ 3-1 ނެވެ. ވިކްޓްރީގެ ތިން ލަނޑު ޖެހީ އަހުމަދު ހުސެއިންއާއި, ހަސަން ނާއިމްއާއި, ހަސަން އަދުހަމްއެވެ. އުނގޫފާރު ޓީމްގެ ލަނޑު ޖެހީ މުޙައްމަދު ޝައިފުއެވެ.
