އިޔާދަކުރަނިވި ހަކަތައިން ފެން އުފެއްދުމުގެ މަސައްކަތް ކުރަމުން އަންނަ ކަމަށް އެމްޑަބްލިޔުއެސްސީގެ މެނޭޖިންގ ޑިރެކްޓަރ، ހަސަން ޝާހް ވިދާޅުވެއްޖެއެވެ.

ރައްޔިތުންގެ މަޖިލީހުން 2020 ވަނަ އަހަރު ފާސްކޮށް އަމަލުކުރަމުން އަންނަ ފެނާއި ނަރުދަމާގެ ގާނޫނުގެ 27 ވަނަ މާއްދާގެ ހ ގައި ބަޔާންކޮށްފައިވަނީ ފެން އުފެއްދުމަށް ބޭނުންކުރާ ހަކަތައަކީ، އިޢާދަކުރަނިވި ވަސީލަތްތައް ބޭނުންކޮށްގެން އުފައްދާ ހަކަތަކަމުގައި ހަދަންވާނެކަމަށެވެ. އަދި މި ޤާނޫނަށް ޢަމަލުކުރަން ފަށާ ތާރީޚުން ފެށިގެން ފަސް އަހަރުގެ ދުވަހުގެ ތެރޭގައި ޤާނޫނަށް ޢަމަލުކުރަން ފެށިއިރު ހިންގަމުންދާ ފެން ޕްލާންޓްތަކަކީ އިޢާދަކުރަނިވި ހަކަތަ ބޭނުންކޮށްގެން ހިންގާ ފެން ޕްލާންޓްތަކެއް ކަމުގައި، ޚިދުމަތްދޭ ފަރާތުން ހަދަންވާނެކަމަށް އެމާއްދާގެ ށ ގައި ބުނެފައިވެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރ ޝާހު ވިދާޅުވީ މިގާނޫނުގެ ދަށުން އިޔާދަކުރަނިވި ހަކަތައިން ފެން އުފެއްދުމަށް ހަދަންޖެހޭ ގަވާއިދު ހެދުމުގެ މަސައްކަތް ކުރަމުން އަންނަކަމަށެވެ. އަދި ޖާގަ ލިބޭ މިންވަރަކުން ރަށްރަށުގައި ސޯލާ ޕެނަލް ހަރުކުރަމުންދާކަމަށް ޝާހު ވިދާޅުވިއެވެ.

މީގެއިތުރުން ޝާހު ވިދާޅުވީ އެމްޑަބްލިޔުއެސްސީ އާ ހަވާލުކޮށްގެން ކުރިޔަށްގެންދާ ފެނާއި ނަރުދަމާގެ މަސައްކަތް މިދައުރު ނިމުމުގެ ކުރިން ނިމޭނެކަމަށެވެ. ފެނާއި ނަރުދަމާ ގާއިމުކުރުމުގެ މަސައްކަތް ކުރަމުން އަންނައިރު ޕީއެސްއައިޕީ މަޝްރޫޢުގެ ދަށުން 20 ރަށެއްގައި އަދި އޮފިޑް މަޝްރޫޢުގެ ދަށުން 4 ރަށެއްގައި ފެނާއި ނަރުދަމާ ގާއިމުކުރުމުގެ މަސައްކަތް އެމްޑަބްލިޔުއެސްސީން އަންނަނީ ކުރަމުންނެވެ. ޝާހު ވިދާޅުވީ މީގެތެރެއިން ބައެއް ރަށްރަށުގެ މަސައްކަތް މިހާރު ނިމިފައިވާކަމަށެވެ.

ޝާހު ވިދާޅުވީ ރަށްރަށުގައި ފެނާއި ނަރުދަމާ ގާއިމުކުރުމަށް ކައުންސިލުތަކުގެ އެއްބާރުލުން ލިބޭކަމަށެވެ.