ބިންހެލުމުގައި ތުރުކީ އާއި ސީރިއާގައި މަރުވި މީހުންގެ އަދަދު 5،000ށް ވުރެ މައްޗަށް އަރައިފި

ބިންހެލުމުގައި ތުރުކީ އާއި ސީރިއާގައި މަރުވި މީހުންގެ އަދަދު 5،000ށް ވުރެ މައްޗަށް އަރައިފިއެވެ.

ހޯމަ ދުވަހުގެ ވަގުތެއްގައި ތުރުކީ އާއި ސީރިއާގައި 7.8 މެގްނިޓިއުޑްގެ ބާރުގަދަ ބިންހެލުމެއް އައުމާ ގުޅިގެން މިހާތަނަށް 5،034 މީހުން ވަނީ މަރުވެފައެވެ.

ތުރުކީގައި މަރުވި މީހުންގެ އަދަދު މަދުވެގެން 3،432 އަށް އަރާފައިވާ ކަމަށް ތުރުކީގެ ޑިޒާސްޓާ ކޯޑިނޭޝަން ސެންޓަރު (އޭކޯމް) އިން އަންގާރަ ދުވަހު ބުނެފައިވެއެވެ.

މީހުން މަރުވެފައިވަނީ އެ ޕްރޮވިންސްގެ ކަހްރަމަންމަރަޝް، ގާޒިއަންޓެޕް، ޝަންލީއުރްފާ، ދިޔާބަކިރު، އަދާނާ، އަދީޔާމަން، އޮސްމާނިޔޭ، ހަޓޭ، ކިލިސް އަދި މަލާޓިޔާ ޕްރޮވިންސްތަކުން ކަމަށް އޭކޯމް އިން ބުނެއެވެ.

އަދި 21،103 މީހަކަށް އަނިޔާވެފައިވާ ކަމަށް ވެސް އެކޯމް އިން އިތުރަށް ބުނެފައިވެއެވެ. ގާތްގަނޑަކަށް 26،000 ސާޗް އެންޑް ރެސްކިއު ޕާސަނަލްސް އޮޕަރޭޝަންތަކުގައި ބައިވެރިވެފައިވާއިރު، 600 އަށް ވުރެ ގިނަ ކްރޭން ހިމެނޭ ގޮތަށް 360 ވެހިކަލާއި 3،361 އިކުއިޕްމަންޓް ވެސް ހިމެނޭ ކަމަށް އޭކޯމް އިން ބުނެއެވެ.

މީގެ އިތުރުން 65 ގައުމަކުން 2،769 މީހުން އެހީގެ މަސައްކަތުގައި ބައިވެރި ވުމަށް ޑިޒާސްޓަރ އޭރިއާއަށް ފޮނުވާފައިވާ ކަމަށް އޭކޯމް އިން ބުނެއެވެ.

ސީރިއާގައި ސަރުކާރުން ކޮންޓްރޯލްކުރާ ސަރަހައްދުތަކާއި އިދިކޮޅު ފަރާތްތަކުގެ ކޮންޓްރޯލް އޮންނަ ސަރަހައްދުތަކުން މަރުވި މީހުންގެ އަދަދު 1،602 އަށް އަރާފައިވާ ކަމަށް އޮފިޝަލުން ބުނެއެވެ. އަދި 3،649 މީހަކަށް އަނިޔާވެފައިވާ ކަމަށް އޮފިޝަލުން ބުނެއެވެ.

ސީރިޔާގައި ވެއްޓިފައިވާ އިމާރާތެއްގެ ދަށުވި އަންހެނަކު ވިހޭ ދަރިފުޅު ސަލާމަތް ކުރެވިފައި ވެއެވެ. ނަމަވެސް މަންމައާއި އެކު އެއާއިލާގެ އެތައްބަޔަކު ވަނީ މަރުވެފަ އެވެ.

ވާރެއާއި އަދި ސްނޯގެ ސަބަބުން އެހީގެ މަސައްކަތަށް ވަނީ ވަރަށް ބޮޑަށް ހުރަސް އެޅިފައެވެ. ސަލާމަތް ވީ މީހުންވެސް ވަންނާނެ އެއްވެސް ހިޔާވަހިކަމެއް ނެތި ހާމަ ތަނުގައި ވަނީ އެއްރޭ އެއްދުވާ ހޭދަކޮށްފައެވެ. ނަމަވެސް އެހީ ތެރިކަން ފޯރުކޮށްދޭ ޓީމްތަކުން މިހާރު ވަނީ ކާއެއްޗިއްސާ ބޯފެން އަދި ރަޖާ ފަދަ އެއްޗެތި ބަހަން ފަށާފައެވެ.