ސައުދީ ޕްރޯ ލީގުގެ އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ 38 ވަނަ އުފަން ދުވަސް އެ ޓީމަށް ކުޅެމުން އަންނަ ކުޅުންތެރިން ފާހަގަކޮށްފި އެވެ.

ދުނިޔޭގެ މޮޅު ކުޅުންތެރިޔާ އަށް ދޭ ބެލެންޑިއޯ އެވޯޑު ފަސް ފަހަރު ހޯދާފައިވާ ރޮނާލްޑޯގެ އުމުރުން 38 އަހަރު ފުރުނީ މިދިޔަ އާދިއްތަ ދުވަހު އެވެ. އަލް ނަޞްރުގެ ފަރިތަކުރުންތަކަށް ރޮނާލްޑޯ ހާޒިރުވި ވަގުތު އެ ޓީމުގެ ކުޅުންތެރިން ވަނީ އޭނާގެ އުފަން ދުވަސް ފާހަގަކުރުމުގެ ގޮތުން ސަޕްރައިޒެއް ދީފައި ކަމަށް ބޭރުގެ މީޑިއާތަކުގައި ވަނީ ބުނެފަ އެވެ. ރޮނާލްޑޯ ދަނޑަށް ހާޒިރުވި ވަގުތު ޓީމުގެ ހުރިހާ ކުޅުންތެރިން ތިބީ ދަނޑުގެ މެދުގަ އެވެ. އަލް ނަޞްރުގެ ކުޅުންތެރިން ތިބީ ރޮނާލްޑޯގެ އުފަން ދުވަސް ފާހަގަ ކުރުމަށް ތައްޔާރުކޮށްފައިވާ ޚާއްސަ ކޭކަކާއެކު އެވެ. އެ ކޭކުގައި ރޮނާލްޑޯގެ ފޮޓޯ އެއް ޖަހާފައިވާއިރު، އޭގައި ވަނީ "މަރުޙަބާ" ލިޔެފަ އެވެ.

މެންޗެސްޓަރ ޔުނައިޓެޑު ދޫކޮށް ރޮނާލްޑޯ އަލް ނަޞްރަށް ބަދަލުވީ ޔުނައިޓެޑުގެ ވެރިންނާއި ޖެހުނު މައްސަލައެއްގަ އެވެ. އަލް ނަޞްރަށް ބަދަލުވެ ރޮނާލްޑޯ އެ ޓީމަށް ކުޅުނު ފުރަތަމަ މެޗަކީ ސައުދީގެ އަލް ނަޞްރާއި، އަލް ހިލާލުން އެކުލަވާލައިގެން ޕެރިސް ސެއިންޓް ޖާމަން (ޕީއެސްޖީ)އާ ދެކޮޅަށް ކުޅުނު މެޗެވެ. އެ މެޗުގަައި ރޮނާލްޑޯ ވަނީ ޕީއެސްޖީ ކޮޅަށް ދެ ލަނޑު ވެސް ޖަހައިފަ އެވެ. އޭގެ ފަހުން ސައުދީ ލީގުގައި ކުޅުނު ތިން މެޗުގެ ތެރެއިން ރޮނާލްޑޯ ވަނީ އެ ޓީމަށް އެއް ލަނޑު ޖަހައިދީފަ އެވެ. އެއީ ލީގުގައި އެންމެ ފަހުން އަލް ފަތުހާ ދެކޮޅަށް ކުޅުނު މެޗުގައި ރޮނާލްޑޯ ޖެހި ލަނޑެވެ. މެޗުގެ ފަހު ވަގުތުގައި ރޮނާލްޑޯ ޖެހި ލަނޑުން އެ ޓީމު ވަނީ މެޗުން ބަލިނުވެ ސަލާމަތްވެފަ އެވެ.

ރޮނާލްޑޯގެ އުމުރުން 38 އަހަރު ފުރުނުއިރު، އޭނާ އަކީ މިހާތަނަށް ދުނިޔެ ދުށް އެންމެ މޮޅު އެއް ފުޓުބޯޅަ ކުޅުންތެރިޔާ އެވެ.