ދިއްގަރާއި ގާދިއްފުށީގެ ބައި އިލެކްޝަން އެމްޑީޕީން ކާމިޔާބުކޮށްފި
ގާދިއްފުށީ ކައުންސިލުގެ އިންތިޚާބު ކާމިޔާބުކުރި ޒުލައިޚާ އަހުމަދަށް ލިބުނީ 210 ވޯޓު
ހޮނިހިރު ދުވަހު ކުރިޔަށްދިޔަ ކައުންސިލްތަކުގެ ބައި އިލެކްޝަންގައި ވޯޓުލަނީ
ތ. ގާދިއްފުއްޓާއި މ. ދިއްގަރު ރަށު ކައުންސިލްގެ ބައި އިލެކްޝަން، ވެރިކަންކުރާ މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ން ކާމިޔާބުކޮށްފިއެވެ.
ދެގޮނޑިވެސް އެމްޑީޕީން ކާމިޔާބުކޮށްފައިވަނީ އިދިކޮޅު ޕީޕީއެމް ކެންޑިޑޭޓާ ވާދަކޮށްގެންނެވެ.
އިލެކްޝަން ކޮމިޝަން (އީސީ)ން އާންމުކޮށްފައިވާ އިންތިޚާބުގެ ވަގުތީ ނަތީޖާއަށް ބަލާއިރު، ތ. ގާދިއްފުށީ ކައުންސިލަށް މެމްބަރަކު ހޮވުމަށް ނެގުނު ވޯޓުގައި ޕީޕީއެމް ކެންޑިޑޭޓް ހައްވާ އަބްދުލްހާދީއަށް ލިބިފައިވަނީ 201 ވޯޓެވެ. އެއިންތިޚާބުގައި އެމްޑީޕީން ވާދަކުރި ކެންޑިޑޭޓް ޒުލައިޚާ އަހުމަދަށް ލިބިފައިވަނީ 210 ވޯޓެވެ. އަމިއްލަގޮތުން ވާދަކުރި ފާތިމަތު މަލްދާއަށް ލިބިފައިވަނީ 4 ވޯޓެވެ.
މ. ދިއްގަރު ކައުންސިލަށް މެމްބަރަކު ހޮވުމަށް ނެގުނު ވޯޓުގައި އެމްޑީޕީ ކެންޑިޑޭޓް އަބްދުﷲ އާރިފަށް ލިބިފައިވަނީ 375 ވޯޓެވެ. ޕިޕީއެމް ކެންޑިޑޭޓް އަބްދުލްހަންނާން އަހުމަދަށް ލިބިފައިވަނީ 320 ވޯޓެވެ.
ދިއްގަރު ކައުންސިލްގެ ގޮނޑި ހުސްވީ އެ ކައުންސިލަށް އަމިއްލަ ގޮތުން ވާދަކުރައްވައި، ހޮވިވަޑައިގަތް އިބްރާހީމް ޚަލީލް އިސްތިއުފާ ދެއްވުމާ ގުޅިގެންނެވެ.
ގާދިއްފުށީ ކައުންސިލްގެ ގޮނޑި ހުސްވީ އެ ކައުންސިލްގައި އިންނެވި އެމްޑީޕީ މެންބަރު މަރްޔަމް ހަސަން އިސްތިއުފާ ދެއްވުމުންނެވެ.
