އިމާރަތް ބާވުމުގެ ސަބަބުން ކްރިމިނަލް ކޯޓުގެ އެތެރޭގައި ހުރި ތަނބެއްގެ ބައެއް ވެއްޓިއްޖެ
7 ފެބުރުއަރީ 2023 | އަންގާރަ 08:24ކްރިމިނަލް ކޯޓަކީ ގާތްގަނޑަކަށް 100 އެއްހައި މުވައްޒަފުންނާއި ކޯޓުގެ ގާޒީން އެކުގައި މަސައްކަތް ކުރައްވާ ތަނެއް
ކްރިމިނަލް ކޯޓުގެ އިމާރަތް- އެތެރޭގައި ހުރި ތަނބެއްގެ ބައެއް ވެއްޓިފައި
އިމާރަތް ބާވުމުގެ ސަބަބުން ކްރިމިނަލް ކޯޓުގެ އެތެރޭގައި ހުރި ތަނބެއް ވެއްޓިއްޖެއެވެ.
ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، ވެއްޓިފައިވަނީ ކޯޓުގެ އެޑްމިނިސްޓްރޭޓަރ ރޫމްގައި ހުރި ތަނބެއްގެ ބައެއް ކަމަށާއި، އެކަން އެނގިފައިވަނީ މިދިޔަ ބުރާސްފަތި ދުވަހު ކަމަށެވެ.
އެކަމުގެ ސަބަބުން އެއްވެސް މީހަކަށް ގެއްލުމެއް ލިބިފައިނުވާކަމަށް އޭނާ ވިދާޅުވިއެވެ. އެގޮތުން އެކަން ހިނގިއިރު އެޑްމިނިސްޓްރޭޓަރ ރޫމް ހުރީ ހުސްކޮށްކަން އޭނާ ފާހަގަކުރެއްވިއެވެ.
ކްރިމިނަލް ކޯޓަކީ ގާތްގަނޑަކަށް 100 އެއްހައި މުވައްޒަފުންނާއި ކޯޓުގެ ގާޒީން އެކުގައި މަސައްކަތް ކުރައްވާ ތަނެކެވެ. އެގޮތުން މީގެ ކުރިން ޕްލޭނިންގ މިނިސްޓްރީންވެސް ކޯޓުގެ އެސެސްމަންޓެއް ހަދާފައިވާއިރު، ވީހާވެސް އަވަހަށް އެތަން ހުސްކުރަން ޖެހޭކަމަށް މިނިސްޓްރީންވެސް ބުނެފައިވެއެވެ.
ކޯޓު އިމާރަތް ބާވުމާއި، އިމާރާތުގެ ޝަރީއަތްކުރާ މާލަންތަކުގެ ފާރުތަކުގައި ބޮޑެތި ރެނދުތައް ލާފައިހުރުމާއި ގުޅިގެން ބައެއް މަރާމާތުތައްވެސް ވަނީ ކުރަން ޖެހިފައެވެ.
ކްރިމިނަލް ކޯޓުގެ 4 ބުރީގެ އިމާރަތް ބާވެ އަރިއަޅާލާފައިވާތީ ބޭރުން ހުންނަނީ ދަގަނޑުތައް ވިއްދާފައެވެ. ސިޑިގޮޅިތަކަށް ފެން ފޭބުމާއި، ޝީޓުތައް ބާވުމުގެ ސަބަބުން ބޮޑެތި ބާގަނޑުތައް ހެދިފައިވާއިރު، މޫސުން ގޯސް ދުވަސްވަރެއް ނަމަ، ގާޒީން ތިއްބަވާ ކޮޓަރިކޮޅުތަކަށްވެސް ވާރޭ ވެހޭކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. އެގޮތުން ބައެއް ގާޒީން ތިއްބަވާ ކޮޓަރިކޮޅުތަކުގެ ސީލިންގާއި ޝީޓުތައް ޙަލާކުވެފައި ހުރުމުގެ ސަބަބުން މޫސުން ގޯސް ދުވަސްވަރެއްނަމަ އެތަނުގައި ޝަރީއަތްތައް ކުރިއަށް ގެންދެވޭނެ ގޮތެއް ނޯވެއެވެ.
މީގެއިތުރުން، ކޯޓުގެ ބައެއް ފާޚާނާތަކުގެ ސީލިންގތައް ނެއްޓިފައިވުމާއި، ސީލިންގ ގެ ބެރިތައް ހަލާކުވެފައި ހުރުމުގެ ސަބަބުން ފާޚާނާތައްވެސް ބޭނުން ނުކުރެވޭ ޙާލަތަށް ދާން ކައިރިވެފަވެއެވެ.
ކޯޓަށް ދިމާވެފައިވާ އިމާރާތުގެ ދަތިކަމުގެ މައްސަލައަކީ ގިނަ ދުވަސްތަކެއް ވަންދެން ޙައްލުނުވެ ދިގުލަމުންދާ މައްސަލައެކެވެ.
