އަސާސީ ޚިދުމަތްތަކާއި އާރުޓީއެލްއަކީ މުޅި ރާއްޖޭގެ އިގްތިޞާދު އެތައް ގުނައަކުން ބިނާކުރެވޭ ބިންގާ - ރައީސް

ކަރަންޓާއި ބަނދަރާއި މަގާއި ފެނާއި ނަރުދަމާއާއި އާރުޓީއެލް އަކީ މުޅި ރާއްޖޭގެ އިގްތިޞާދު އެތައް ގުނައަކުން ބިނާކުރެވޭ ބިންގާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ހޯމަ ދުވަހު ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ، ސަރުކާރުން އަމާޒު ހިފާފައި މިވަނީ، ގުޅުންބޮޑު، ދިރުންހުރި، އެތެރޭގެ އިގްތިޞާދެއް އުފެއްދުމަށް ކަމަށެވެ. އެގޮތުން އިޖްތިމާޢީ، އިގްތިޞާދީ އަދި ޢުމްރާނީ ބޮޑު ބަދަލަކަށްޓަކައި އިހަށް ކުރަންޖެހޭ ކަންކަން ދަނީ މިދައުރު ތެރޭ ހިންގާ، ނިންމަމުން ކަމަށެވެ.

ރައީސް ވިދާޅުވީ މިބަދަލު ގެނައުމަށް ރައްޔިތުންނަށް ބޭނުންވާ އަސާސީ ޚިދުމަތް ފުރިހަމަވާންޖެހޭ ކަމަށެވެ. މިދާގޮތަށް ގޮސް މުޅި ރާއްޖޭގެ ހުރިހާ ރަށެއްގެ ފެނާއި ނަރުދަމާ މުޅިން ނިމޭނެ ކަމަށާއި، މިއާ އެކުއެކީ ލަފާފުރުމުގެ ދަތިކަން ވެސް މުޅި ރާއްޖެއިން ނައްތާލުމުގެ ފުޅާ މަޝްރޫޢު ދަނީ ހިނގަމުންކަމަށެވެ. އަދި މަސައްކަތްތައް ނިމެމުންދާ ކަމަށެވެ. ހުރިހާ ރަށެއްގެ ހުރިހާ އިންޖީނުގެ އެރަށަކާ އެކަށޭނަ މިންވަރަށް ދަނީ ތަރައްގީކުރެވެމުން ކަމަށް ރައީސް ވިދާޅުވިއެވެ.

ރައީސް ވިދާޅުވީ ކަރަންޓާއި ބަނދަރާއި މަގާއި ފެނާއި ނަރުދަމާއާއި އާރުޓީއެލް އަކީ މުޅި ރާއްޖޭގެ އިގްތިޞާދު އެތައް ގުނައަކުން ބިނާކުރެވޭ ބިންގާ ކަމަށެވެ.

ބަނދަރާއި ފެނާއި ނަރުދަމާ ގާއިމުކުރުމުގެ ކުރިން ބ. ފުޅަދޫގައި 2000 އަކަފޫޓުގެ ބިމެއްގެ ކުއްޔަކީ 7000 ރުފިޔާ ކަމަށް ރައީސް ވިދާޅުވިއެވެ. ނަމަވެސް ބަނދަރު ނިމި، ފެނާއި ނަރުދަމާގެ މަސައްކަތް ހިނގަން ފެށުމާއެކު، މިއަދު އެބިމުގެ އަގަކީ 15000 ރުފިޔާ ކަމަށެވެ. މިހާރު އެކި ރަށްރަށުގައި ކުރިއަށް ގެންދާ ތަފާތު އެކި ތަރައްޤީގެ މަޝްރޫޢުތައް ނިމެމުން ދިޔަވަރަކަށް އެރަށްތަކުގެ ބިމުގެ އަގުއަރާނެ ކަމަށް ރައީސް ވިދާޅުވިއެވެ. އަދި އެ ރަށްރަށުގައި އިޤްތިޞާދީ ހަރަކާތްތައް ހިނގަން ފަށައި، އޭގެ މަންފާ ރައްޔިތުންނަށް ކުރާނެ ކަމަށެވެ.

ރައީސް ވިދާޅުވީ ދިވެހިރާއްޖޭގެ ރަށްތައް ތަރައްޤީވެ އިގްތިސާދީ ހަރަކާތްތަކަށް ފައްކާވަމުންދާއިރު، ވާންޖެހޭ ގޮތެއް އޮންނަ ކަމަށެވެ. އެއީ އެރަށްތަކުގެ ގޮނޑުދޮށާއި ހަމައިގައި ހުއްޓިފައި އޮންނަ އިގްތިސާދު މުޅި ރާއްޖެއަށް ފަތުރާލުން ކަމަށެވެ. އެކަން ކުރެވޭނީ އިތުބާރާ ޔަޤީންކަން އޮތް ބަދަހި ދަތުރުފަތުރުގެ ނިޒާމަކުން ކަމަށާއި، އެއްރަށް އަނެއްރަށާއި، އެއް އަތޮޅު އަނެއް އަތޮޅާ ގުޅި، މުޅި ރާއްޖޭގައި އެކީއެކަށް ހިނގާ އިޤްތިޞާދީ އިންޖީނަކީ ދަތުރުފަތުރުގެ ނިޒާމު ކަމަށެވެ. އެއްގަމާއި، ކަނޑާއި ވައިގެ މަގުން ރާއްޖެ ގަތާލެވޭ ގަތާލުން ކަމަށް ރައީސް ވިދާޅުވިއެވެ.