އީފާސްއަށް ރަޖިސްޓްރީކުރި މީހުންގެ އަދަދު 137،000ށް

އެން.ސީ.އައި.ޓީން ޑިވެލޮޕްކޮށް ބަލަހައްޓަމުންދާ އީފާސް ނިޒާމުގެ ޚިދުމަތް ބޭނުން ކުރަން ފެށި މީހުންގެ އަދަދު މިިދިޔަ ހަތަރު އަހަރުގެ ތެރޭގައި 130000 އިން މައްޗަށް އަރައިފިއެވެ.

މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އިން ބުނީ ފާއިތުވި ހަތަރު އަހަރު ދުވަހުގެ ތެރޭގައި ކުރިން އެ ޚިދުމަތަށް ނުގެންނަ އެތައް ކުރިއެރުމެއް ގެނެސްފައިވާ ކަމަށެވެ. އެގޮތުން އެންމެ މުހިންމުކަމެއްގެ ގޮތުގައި ފާހަގަކުރެވުނު ކަމަކީ ދަޢުލަތުގެ މުޢައްސަސާތަކުގެ އޮފީސްތަކަށް ހާޒިރުވެގެން ހޯދާ ގިނަ ޚިދުމަތްތައް ޑިޖިޓަލްކޮށް އީފާސް ނިޒާމުގެ ތެރެއިން ދޭން ފެށުން ކަމަށް އެ މިނިސްޓްރީ އިން ފާހަގަކުރެއެވެ.

އެ މިނިސްޓްރީ އިން ބުނީ މިހާތަނަށް އައިއިރު އީފާސްއަށް ރަޖިސްޓްރީކޮށްފައި ވަނީ 137،000 މީހުން ކަމަށެވެ. އަދި އެ ޕޯޓަލް މެދުވެރިކޮށް 440 އަށްވުރެ ގިނަ ޚިދުމަތް ފޯރުކޮށްދީފައިވާ ކަަމަށެވެ. މީގެ އިތުރުން މިހާތަނަށް 5.98 މިލިއަން ފަހަރު ޕޯޓަލްއަށް ލޮގިންވެ ޚިދުމަތް ހޯދާފައިވާ ކަމަށެވެ.

އީފާހަކީ ސަރުކާރާއި ދައުލަތުގެ ބައެއް މުއައްސަސާތަކުން އޮންލައިންކޮށް ފޯރުކޮށްދޭ ޚިދުމަތްތައް ފޯރުކޮށްދިނުމުގައި، ހިދުމަތް ހޯދާ ފަރާތް ޑިޖިޓަލްކޮށް ކަށަވަރުކުރުމަށް ބޭނުންކުރަމުން އަންނަ ޑިޖިޓަލް އައިޑެންޓިޓީގެ ނިޒާމެވެ.

އޮންލައިން ވެރިފިކޭޝަންގެ ޚިދުމަތް ތައާރަފު ކުރުމުގެ ކުރިން، އީފާސް ވެރިފައިކުރަން ބޭނުންވާ ފަރާތްތަކުން އެކަން ކުރަމުން އައީ، ވެރިފައިކުރުމުގެ ޚިދުމަތްދޭ ސަރުކާރުގެ އިދާރާތަކުގެ ކައުންޓަރުތަކަށް ހާޒިރުވެގެންނެވެ. އަލަށް މި ތައާރަފުކުރި ވެބް ވަރޝަންއިން ފޭސް ނަމަވެސް ރެކޮގްނިޝަން ޓެކްނޯލޮޖީ މެދުވެރިކޮށް، ކޮންމެ ތަނެއްގައި އަދި ކޮންމެ ވަގުތެއްގައި ވެސް އަމިއްލައަށް އީފާސް ވެރިފައިކުރެވޭނެ މަގު މިހާރުވަނީ ތަނަވަސްވެފައެވެ. އީފާސް ވެރިފައިކުރުމުން، އީފާސް ނިސްބަތްވާ މީހާގެ އީފާސްކަން ކަށަވަރު ކުރެވެއެވެ. އަދި އޮންލައިންކޮށް ޚިދުމަތްދޭ ފަރާތްތަކަށް، ހިދުމަތް ދެވެނީ ސައްހަ މީހާއަށްކަން ދެނެގަނެވޭނެއެވެ.

މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އިން ބުނީ އައި.ޓީގެ ހެލްޕް ޑެސްކް 3345050 އަށް ރަސްމީ ގަޑީގައި ގުޅުމުން އެހީތެރިކަން ފޯރުކޮށްދޭނެ ކަމަށެވެ.