ޗާޓަޑް އެކައުންޓަންޓުން ތަމްރީން ކުރުމަށް މިނިސްޓްރީ އޮފް ހަޔަރ އެޑިއުކޭޝަނުން ހުޅުވާލާފައިވާ 200 ސްކޮލަރޝިޕަށް ކުރިމަތިލާނެ މީހުން ހޯދުމަށް މައުލޫމާތު ދިނުމުގެ ޕްރޮގްރާމްތަކެއް ހިންގުމަށް ހަމަޖެހިފައިވާކަމަށް ސީއޭ މޯލްޑިވްސްގެ ކައުންސިލް މެންބަރު އަދި އިކޮނޮމިކް ކޮމިޓީގެ ޗެއާޕާސަން މުހައްމަދު ހަލީމް ވިދާޅުވެއްޖެއެވެ.

ހަޔަރ އެޑިޔުކޭޝަން މިނިސްޓްރީން ބުރާސްފަތި ދުވަހު ކޮށްފައިވާ އިއުލާނުގައި ބުނެފައިވާ ގޮތުގައި މި ފުރުސަތުގެ ދަށުން ޕަބްލިކް ސެކްޓަރުން 50 ފުރުސަތު އަދި އޯޕަން ކެޓަގަރީން އިން 150 ފުރުސަތު ވަނީ ހުޅުވާލާފައެވެ. މި ސްކޮލަރޝިޕްތައް ދޭ ކޯހުގެ ދާއިރާތަކުގެ ތެރޭގައި ހިމެނެނީ އެސޯސިއޭޝަން އޮފް ޗާޓަޑް އެކައުންޓަންޓްސް (އޭސީސީއޭ) ސްކިލްސް ލެވެލް އަދި ޕްރޮފެޝަނަލް ލެވެލް އާއި ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ) މެނޭޖްމަންޓް ލެވެލް އަދި ސްޓްރެޓީޖިކް ލެވެލްއެވެ.

މިސްކޮލަރޝިޕާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މުހައްމަދު ހަލީމް ވިދާޅުވީ އެސްކޮލަރޝިޕަށް ކުރިމަތިލާން ބޭނުންވާ ފަރާތްތަކަށް ސީއޭ މޯލްޑިވްސް އިން އެހީތެރިކަން ފޯރުކޮށްދޭނެކަމަށެވެ. އެގޮތުން ޑޮކިޔުމަންޓްތައް ފުރިހަމަކުރުމުގައި ސީއޭ މޯލްޑިވްސްއިން އެހީތެރިކަން ފޯރުކޮށްދޭނެކަމަށް ހަލީމު ވިދާޅުވިއެވެ.

މީގެއިތުރުން ސްކޮލަރޝިޕާއި ގުޅޭގޮތުން ސާފުކުރަން ބޭނުންވާ މައުލޫމާތު ސާފުކުރުމުގަޔާއި ޕްރޮގްރާމާ ބެހޭ ގޮތުން މައުލޫމާތު ދިނުމަށް ރޭވިފައިވާކަމަށް ހަލީމު ވިދާޅުވިއެވެ. އެގޮތުން މައުލޫމާތު ދިނުމަށް ހަމަޖެހިފައިވަނީ ހަޔަރ އެޑިޔުކޭޝަން މިނިސްޓްރީ އާއި ސީމާ ގުޅިގެންކަމަށް ހަލީމު ވިދާޅުވިއެވެ.

މި 200 ފުރުސަތުގެ ތެރެއިން 50 ފުރުސަތު ޕަބްލިކް ސެކްޓަރަށް ހާއްސަކޮށްފައިވާ ފުރުސަތުތަކެވެ. ބާކީ 150 ފުރުސަތަކީ އޯޕަން ކެޓަގަރީއެވެ. ނަމަވެސް ޕަބްލިކް ސެކްޓަރުން 50ށް ވުރެ ގިނަ މީހުން ކުރިމަތިލައިފިނަމަ އޯޕަން ކެޓަގަރީގެ ދަށުން ޕަބްލިކް ކެޓަގަރީއަށް ކުރިމަތިލީ ފަރާތްތައް އިވެލުޔޭޓްކުރެވޭނެއެވެ.

މި ސްކޮލަރޝިޕްގެ ދަށުން ސަރުކާރުން ރަޖިސްޓްރީކުރުމުގެ ފީ ނުވަތަ ރީ-ރަޖިސްޓްރޭޝަން ފީ އާއި އެނުއަލް ސަބްސްކްރިޕްޝަން ފީ އާއި އެގްޒެމްޝަން ލިބޭ ފަރާތްތަކަށް އެގްޒެމްޝަން ފީ އާއި އެގްޒާމް ފީ އާއި އެފްލިއޭޝަން ފީ އާއި ދެ އަހަރު ތެރޭގައި ދަރިވަރު ނިމޭ ކަމުގައިވާނަމަ މެންބާޝިޕް ފީ އާއި ބުކް އެލަވަންސްގެ އިތުރުން ރާއްޖޭގައި ރަޖިސްޓްރީކޮށްގެން ހިންގާ ކޮލެޖް ނުވަތަ ޔުނިވާސިޓީތަކުން ކިޔަވާނަމަ ޓިއުޝަން ފީ ދޭނެއެވެ.

މިއީ ޗާޓަޑް އެކައުންޓިންގ ދާއިރާއިން ސްކޮލަރޝިޕް ދިނުމަށް ހުޅުވާލި ދެވަނަ ފަހަރެވެ. މިދިޔަ އަހަރުވެސް މި ދާއިރާއިން ކިޔެވުމަށް 173 ސްކޮލަރޝިޕް ވަނީ ދީފައެވެ. މިދިޔަ އަހަރުގެ ސްކޮލަރޝިޕްތައް ކާމިޔާބުކުރި ކެންޑިޑޭޓުންގެ ތެރެއިން 100 އަށްވުރެ ގިނަ ކެންޑިޑޭޓުން ވަނީ ސްކޮލަރޝިޕްގައި ކިޔެވުން ފަށައިފައެވެ.

މި ސްކޮލަރޝިޕްތަކަށް ހޮވޭ ފަރާތްތައް 2 އަހަރުގެ މުއްދަތަކަށް ރާއްޖޭގައި ޚިދުމަތް ކުރުމަށް ބޮންޑު ކުރެވޭނެއެވެ.

މި ސްކޮލަރޝިޕަށް އެދޭ ފަރާތްތަކުން އެޕްލިކޭޝަން ހުށަހަޅަން ޖެހެނީ މިނިސްޓްރީ އޮފް ހަޔަރ އެޑިއުކޭޝަންގެ މައި އެޑިޔު ޕޯޓަލް މެދުވެރިކޮށެވެ. އެޕްލިކޭޝަން ހުށަހަޅުމުގެ އެންމެ ފަހުގެ ތާރީޚަކީ 26 ފެބުރުވަރީ 2023 ވާ އާދީއްތަ ދުވަހެވެ.