ސިނާއީ ބޭނުމަށް ތިލަފުށިން ބިން ވިއްކަނީ
3 ފެބުރުއަރީ 2023 | ހުކުރު 04:17ފުރަތަމަ ވިއްކުމަށް ހަމަޖެހިފައިވަނީ ތިލަފުށި 'ޒޯން އޭ'ގެ ބިންތައް
ކ. ތިލަފުށި
ތިލަފުށިން ސިނާއީ ބޭނުމަށް ފިޔަވަހިތަކަށް ބަހާލައިގެން ބީލަމުގެ އުސޫލުން ބިން ވިއްކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިން ނިންމައިފިއެވެ.
ސިނާއީ މައި މަރުކަޒަށް ތިލަފުށި ބަދަލުކުރުމުގެ މަޝްރޫއުގެ ދަށުން، ތިލަފުށިން ބިން ވިއްކުމަށް ހުޅުވާލާ މިއީ ފުރަތަމަ ފަހަރެވެ. ބީލަމުގެ އުސޫލުން ފުރަތަމަ ވިއްކުމަށް ހަމަޖެހިފައިވަނީ ތިލަފުށި 'ޒޯން އޭ'ގެ ބިންތައް ކަމަށް އެޗްޑީސީން ބުރާސްފަތި ދުވަހު ނެރުނު އިއުލާނުގައި ވަނީ ބުނެފައެވެ.
އެ ކުންފުނިން ނެރުނު އިއުލާނުގައި ވަނީ ބީލަމުގެ އުސޫލުން ބިން ވިއްކާނެ އުސޫލުވެސް އާއްމުކޮށްފައެވެ. އެގޮތުން ދިވެހިންނާއި ބޭރު ފަރާތްތައް ހިމެނޭހެން އަމިއްލަ ފަރުދަކަށް ނުވަތަ ކުންފުންޏަކަށް ވެސް ބީލަން ހުށަހެޅިދާނެއެވެ. އަދި ބީލަން ކާމިޔާބު ކުރާ ފަރާތަކީ ދިވެހި ފަރުދެއް ނުވަތަ ކުންފުންޏެއްނަމަ އެ ފަރާތަކަށް ބިން މިލްކު ކުރެވޭނެއެވެ. ބޭރުގެ ފަރާތްތަކަށް ބިން ކުއްޔަށް ދޫކުރާނީ 99 އަހަރަށެވެ.
މި އުސޫލުގެ ދަށުން ސިނާއީ ބޭނުމަށް ވިއްކާ ބިންތަކުގެ ބީލަން ހުށަހެޅޭނެ އެންމެ ދަށް އަގަކީ އަކަފޫޓަކަށް 1700 ރުފިޔާއެވެ.
އެޗްޑީސީން ބުނެފައިވާ ގޮތުގައި ބީލަމުގެ އުސޫލުން ބިން ވިއްކުމަށް ހަމަޖެހިފައިވަނީ ދެ މަރުހަލާއަކަށް ބަހާލައިގެންކަމަށެވެ. އެގޮތުން ފުރަތަމަ މަރުހަލާއަކީ ޝަޢުގުވެރިވާ ބިމަށް އެކްސްޕްރެޝަން އޮފް އިންޓްރެސްޓް ހުށަހެޅުން ކަމަށާއި ދެވަނަ މަރުހަލާއަކީ އީއޯއައި ހުށަހަޅާފައިވާ ބިމަށް ބިޑްކުރުން ކަމަށް އެ ކުންފުނިން ބުނެއެވެ.
އެޗްޑީސީން ބުނީ ޝަޢުގުވެރިވާ ފަރާތްތަކުން ބީލަމުގެ އުސޫލުން ބިންގަތުމަށް ކުރިމަތިލުމަށް ހަމަޖެހިފައިވަނީ އޮންލައިން ޕޯޓަލެއް މެދުވެރިކޮށްކަމަށެވެ. މި ޕޯޓަލް ޢާންމުންމަށް ހުޅުވާލާނީ މި މަހުގެ ހަތް ވަނަ ދުވަހުއެވެ. އެ ތާރީހުގައި ޕޯޓަލާ ގުޅޭ އިތުރު މައުލޫމާތާއި ބީލަމާ ގުޅޭ އިތުރު މައުލޫމާތު ވެސް އާއްމުކުރާނެ ކަމަށް އެޗްޑީސީން ބުނެއެވެ.
