ރެއާލް މެޑްރިޑަށް ކުޅެމުން އަންނަ ފްރާންސްގެ ފާލަންޑް މެންޑީ އަށް އަނިޔާވެ ކުޅުމާ ދުރަށް ދާން ޖެހުނު ނަމަވެސް، އެ މަޤާމަށް ކުޅުމުން އޮޕްޝަންތަކެއް އެބަ ހުރި ކަމަށް ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ ސްޕެނިޝް ލީގުގައި ބުރާސްފަތި ދުވަހުގެ ރޭ އަމިއްލަ ދަނޑުގައި ވެލެންސިއާއާ ދެކޮޅަށް ނިކުންނަ މެޗުގެ ކުރިން ވާހަކަ ދައްކަމުންނެވެ. މެންޑީ އަށް ލިބުނު އަނިޔާގެ ސަބަބުން އޭނާ ދެ މަސް ދުވަހަށް ކުޅުމާ ދުރުގައި ހުންނަން ޖެހޭނެކަން ވަނީ އަންގާރަ ދުވަހު އެނގިފަ އެވެ. ރެއާލްގެ މެޑިކަލް ޓީމާ ހަވާލާދީ ބޭރުގެ މީޑިއާ ތަކުގައި ބުނެފައިވާ ގޮތުން މެންޑީ އަށް ލިބުނީ މަސްގަނޑުގެ އަނިޔާ އެކެވެ.
އަންޗެލޮޓީ ބުނީ މެންޑީ އަންނަނީ ރެއާލްގައި އިތުބާރާއެކު ކުޅެމުން ކަމަށާއި، އެހެންކަމުން އޭނާ ނެތުމަކީ ޓީމަށް ލިބޭ ހިތާމައެއް ކަމަށެވެ. ނަމަވެސް އަންޗެލޮޓީ ބުނީ އެ މަޤާމަށް ކުޅެވޭނެ ކުޅުންތެރިން ރެއާލްގެ ސްކޮޑުގައި ތިބި ކަމަށާއި، އެކަމަށް އެހެން ކުޅުންތެރިޔަކު ހޯދަން ނުޖެހޭނެ ކަަމަށެވެ. އަންޗެލޮޓީ ބުނީ ރެއާލްގައި އޭނާއާއެކު އޮތީ އެންމެ އެކަށީގެންވާ ސްކޮޑު ކަމަށާއި، ޖެނުއަރީގައި ރެއާލުން ކުޅުންތެރިޔަކު ހޯދަން ބޭނުންނުވީ ވެސް އެ ސަބަބަށްޓަކައި ކަމަށެވެ. އަންޗެލޮޓީ ބުނީ އޭނާގެ ކުޅުންތެރިންނާއެކު ރެއާލަށް ދާން ބޭނުންވާ ހިސާބަށް ދެވޭނެ ކަމަށާއި، ކޮންމެ ކުޅުންތެރިޔަކީ ވެސް އޭނާ އަށް އޮޕްޝަނެއް ކަމަށެވެ.
އަންޗެލޮޓީ ރެއާލާ ހަވާލުވި ފަހުން މެންޑީ އަކީ ރެއާލްގެ ފަހަތުގައި އެންމެ މުހިންމު އެއް ކުޅުންތެރިޔާ އެވެ. ރެއާލްގައި ތިބި ކުޅުންތެރިންނަށް ބަލާއިރު، މެންޑީ ނެތް ނަމަވެސް އެ މަގާމަށް ކުޅޭނެ ކުޅުންތެރިން އެބަ ތިއްބެވެ. އޭގެ ތެރޭގައި ނާޗޯ ފެނާންޑޭޒް އާއި ޑޭވިޑް އަލަބާ ހިމެނެ އެވެ. ރެއާލުން ވެލެންސިއާއާ ދެކޮޅަށް ނިކުންނާނީ ބުރާސްފަތި ދުވަހުގެ ރޭ ދަންވަރު ރާއްޖެ ގަޑިން އެކެއް ޖަހާއިރު އެވެ.
