ޕީއެސްޖީން މޮންޓްޕެލިއޭ ބަލިކުރި މެޗުގައި ޒައިރް އެމެރީ އަށް ރެކޯޑެއް

ފްރާންސް ލީގުގައި މޮންޓްޕެލިއޭއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) މޮޅުވެއްޖެ އެވެ.

ބުދަ ދުވަހުގެ ރޭ މޮންޓްޕެލިއޭގެ ދަނޑުގައި ކުޅުނު މެޗު ޕީއެސްޖީން ކާމިޔާބު ކުރީ 3-1 އިންނެވެ. މެޗުގައި ޕީއެސްޖީގެ ފަހު ލަނޑު ޖެހި އުމުރުން 16 ޒައިރް އެމެރީ އަށް ވަނީ ރެކޯޑެއް ވެސް ލިބިފަ އެވެ. އޭނާ އަކީ ޕީއެސްޖީގެ ތާރީޚުގައި ވެސް އެ ޓީމަށް ލަނޑު ޖަހައިދިން އެންމެ ޒުވާން ކުޅުންތެރިޔާ އެވެ.

މެޗު ފަށައިގެން 10 ވަނަ މިނެޓުގައި ޕީއެސްޖީ އަށް ވަނީ ލީޑު ނަގާނެ ރަނގަޅު ފުރުސަތެއް ލިބިފަ އެވެ. އެ ޓީމަށް ލިބުނު ޕެނަލްޓީގައި ފްރާންސް ތަރި ކީލިއަން އެމްބާޕޭ ފޮނުވާލި ބޯޅަ މޮންޓްޕެލިއޭގެ ގޯލް ކީޕަރު ވަނީ މަތަކޮށްފަ އެވެ. އޭގެ ފަހުން 35 ވަނަ މިނެޓުގައި ޕީއެސްޖީގެ ކިކީ ކޯޔާޓް ލަނޑެއް ޖެހި ނަމަވެސް ވީއޭއާރުން ވަނީ ލަނޑު ބަލައިނުގެންފަ އެވެ. ދެ ވަނަ ހާފު ފަށައިގެން ކުރީކޮޅު ޕީއެސްޖީ އަށް ކުޅެމުން އަންނަ މޮރޮކޯގެ ޑިފެންޑަރު އަޝްރަފް ހަކީމީ ލަނޑެއް ޖެހި ނަމަވެސް، މިފަހަރު ވެސް ހުރަސްއެޅީ ވީއޭއާރު އެވެ. މެޗުގައި ޕީއެސްޖީ އަށް ލީޑު ނަގައިދިނީ ފަބިއަން ރުއިޒް އެވެ. އެއީ މެޗުގެ 55 ވަނަ މިނެޓުގައި ހޫގޯ އެކިޓައިކް ބޮލުން ޖައްސާލި ބޯޅައެއް ގޯލަށް ފޮނުވާލައިގެން ރުއިޒް ޖެހި ލަނޑެކެވެ. މެޗުގެ 72 ވަނަ މިނެޓުގައި ޕީއެސްޖީގެ ލީޑު ފުޅާކޮށްދިނީ އާޖެންޓީނާގެ ކެޕްޓަން ލިއޮނަލް މެސީ އެވެ. އެއީ ރުއިޒް އޭރިޔާ ތެރެއަށް ޖައްސާލި ބޯޅަ އަށް މޮންޓްޕެލިއޭގެ ކީޕަރުގެ ކައިރިން ގޯލަށް ފޮނުވާލައިގެންނެވެ. މޮންޓްޕެލިއޭގެ ހަމައެކަނި ލަނޑު މެޗުގެ 89 ވަނަ މިނެޓުގައި ޖެހީ ސްޓެފީ މަވިޑިޑީ ތަނަވަސްކޮށްދިން ފުރުސަތެއްގައި އާނައުޑް ނޯޑިން އެވެ. މެޗުގެ އިތުރު ވަގުތުގައި ހަކީމީ ޔަނަވަސްކޮށްދިން ފުރުސަތެއްގައި ޒައިރް އެމެރީ ވަނީ ޕީއެސްޖީގެ ތިން ވަނަ ލަނޑު ޖަހައިފަ އެވެ.

މެޗުން މޮޅުވެ ޕީއެސްޖީ އެއް ވަނައިގައި އޮތީ ކުޅުނު 21 މެޗުން 46 ޕޮއިންޓާއެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް މާސޭ އަށް ލިބެނީ 46 ޕޮއިންޓެވެ.