ނިޝާހް އަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް - ރައީސް
31 ޖެނުއަރީ 2023 | އަންގާރަ 10:04ނިޝާހް ނިޔާވީ އދ. އަތޮޅުގެ މާފުށިވަރުގައި ބޮއި އަޅަން ގޮސް އުޅުމުގެ ތެރޭގައި
ނިޝާހް ޢަބްދުލްޣަފޫރަށް ރައީސް ޚާއްސަ އިނާމު ދެއްވަނީ
އދ. މާފުށިވަރު ރިސޯޓް ކައިރިއަށް ބޮއެ އަޅަން ގޮސް އުޅުމުގެ ތެރޭގައި ނިޔާވި ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ފުލުހުން ބުނީ އދ. އަތޮޅުގެ މާފުށިވަރުގައި ބޮއި އަޅަން ގޮސް އުޅުނު 18 އަހަރުގެ ފިރިހެނަކު ހާލުދެރަވަގެން ހޮސްޕިޓަލަށް ގެންދިޔަކަން ފުލުހުންނަށް ރިޕޯޓްކުރީ ހޯމަ ދުވަހުގެ އިރުއޮއްސި 6:54 އެހާއިރު ކަމަށެވެ. އޭނާ އަށް މަހިބަދޫ ހޮސްޕިޓަލްގައި ފަރުވާ ދެމުން ދަނިކޮށް ނިޔާވެފައިވާ ކަމަށް ހޮސްޕިޓަލާއި ހަވާލާދީ ފުލުހުން ވަނީ ބުނެފައެވެ. ފުލުހުން ބުނީ އެ ހާދިސާ އާއި ގުޅިގެން އިތުރަށް ބަލަން ޖެހޭ ކަންކަން ބަލަމުންދާ ކަމަށެވެ.
ރައީސް ޞާލިހް ވިދާޅުވީ ވަކިވެގެންދިޔަ ނިޝާހް ޢަބްދުލްޣަފޫރަކީ ހިތްވަރުގަދަކަމާއި އިންސާނިއްޔަތުކަމުގެ ލާމަސީލު މިސާލެއް ކަމަށެވެ. ސްކައުޓް އެސޯސިއޭޝަނަށް ރީތި ނަން ހޯދައިދިން ޒުވާނެއް ކަމަށެވެ. ރައީސް ވަނީ މަރުޙޫމްގެ ފުރާނައަށް މާތް ﷲ ހެޔޮ ރަޙުމަތް ލައްވައި ޢާއިލާއަށް ކެތްތެރިކަން ދެއްވުމަށް އެދި ދުއާ ކުރައްވާފައެވެ.
ރ. އިނގުރައިދޫ, މާހާ, ނިޝާހް ޢަބްދުލްޣަފޫރަކީ ނޮވެމްބަރު 18، 2018 ގައި އިނގުރައިދޫގައި މޫދަށް އެރި އުޅުނު ކުއްޖަކަށް ދިމާވި ހާދިސާ އަކާއި ގުޅިގެން އޭނާގެ ފުރާނަ ސަލާމަތްކުރި ސްކައުޓެކެވެ. އޭނާގެ އަގުވަޒަންކުރުމަށްޓަކައި 2019 ވަނަ އަހަރު އޭނާ އަށް ރައީސުލްޖުމްހޫރިއްޔާ ދެއްވާ ޚާއްސަ އިނާމު ވަނީ ދެއްވާފައެވެ.
