ސ. ފޭދޫގައި 75 ހައުސިން ޔުނިޓު އަޅަން ހަވާލުކޮށްފި
ކޮންމެ އެޕާޓްމެންޓެއްގައި 1،000 އަކަފޫޓު ހުންނާނެ
75 ހައުސިން ޔުނިޓު އަޅަން އެސްޖޭ ކޮންސްޓްރަކްޝަންއާ ހަވާލުކުރުން
ސ. ފޭދޫގައި 75 ހައުސިން ޔުނިޓު އިމާރާތްކުރުމަށް ބަޔަކާ ހަވާލުކޮށްފިއެވެ.
ޑިޒައިން އެންޑް ބިލްޑް އުސޫލުން މި މަސައްކަތް ހަވާލުކޮށްފައިވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެވެ.
ޕްލޭނިން މިނިސްޓްރީގައި މިކަމަށްޓަކާ ބޭއްވި ރަސްމިއްޔާތުގައި އެ މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އަހުމަދު ވިޝާން ނަސީމެވެ. އެސްޖޭ ކޮންސްޓްރަކްޝަންގެ ފަރާތުން ސޮއިކުރެއްވީ އެކުންފުނީގެ ޑިރެކްޓަރ ޝިހާދް އިބްރާހިމްއެވެ.
މި މަޝްރޫއުގެ ދަށުން ފޭދޫގައި މަލްޓި ސްޓޯރީ ބިލްޑިންގ އެއްގައި 75 އެޕާޓްމެންޓް ތަރައްގީކުރާނެއެވެ. 2 ލިފްޓު ހިމެނޭ މި އިމާރާތުގެ އެންމެ ތިރި ވިޔަފާރިތަކަށާއި، ބިލްޑިންގ ސަރވިސް އޭރިއާއަކަށް ޚާއްސަކުރާނެއެވެ.
މި އިމާރާތުގެ ކޮންމެ އެޕާޓްމެންޓެއްގެ ބޮޑުމިނުގައި 1،000 އަކަފޫޓު ހުންނާނެއެވެ. ކޮންމެ އެޕާޓްމެންޓެއް ޑިޒައިންކުރާނީ 3 ކޮޓަރިއާއި، 3 ފާހާނާ، ސިޓިން ރޫމް، ބަދިގެ، ކާގެ، ލޯންޑްރީ އަދި ސްޓޯރޫމެއް ހިމެނޭ ގޮތަށެވެ.
މިއީ 121.5 މިލިއަން ރުފިޔާގެ މަޝްރޫއެކެވެ. މި މަސައްކަތް އެއް އަހަރުގެ ތެރޭގައި ނިންމަންޖެހެއެވެ.
