ގެދޮރުވެރިޔާ ސްކީމްގެ ފްލެޓް ދޫކުރުމާ ބެހޭ ގޮތުން ރައީސް ވިދާޅުވާ އެއްޗަކާ އޮފިޝަލުން ބުނާ އެއްޗަކާ ދިމަލެއް ނުވޭ!
މި މައްސަލައިގައި ސަރުކާރުން ބުނާ އެއްޗަކާއި ކުރާ ކަންތައް ތަފާތު ކަމަށް ފްލެޓް ލިބުނު ފަރާތްތަކުން ބުނޭ
ގަރުދިޔަ ކައްކާގެން ކެވޭނީ ވެސް ފްލެޓުތައް ދޫކޮށްގެން، ސަރުކާރުން ޖަވާބުދާރީވޭ: މުޒާހަރާގެ ބައިވެރިން
ގެދޮރުވެރިޔާ ސްކީމްގެ ދަށުން ރައީސް އިބްރާހީމް މުޙައްމަދު ސާލިޙުގެ ސަރުކާރުން ދޫކުރި ފްލެޓްތައް ލިބުނު ފަރާތްތަކަށް ފްލެޓް ހަވާލު ކުރުމާ ބެހޭ ގޮތުން ރައީސް މުއިއްޒު ދައްކަވާފައިވާ ވާހަކަފުޅުތަކާ ޚިލާފަށް ސަރުކާރުގެ މުވައްޒަފުން ލައްވައި އެހެން ގޮތަކަށް މިކަން އަނބުރާލަން މަސައްކަތް ކުރަމުންދާ ކަމުގެ ކަންބޮޑުވުން ފްލެޓް ލިބުނު ފަރާތްތަކުން ފާޅުކޮށްފިއެވެ.
މި ނޫހާ ވާހަކަދެއްކި ފްލެޓް ލިބިފައިވާ ބައެއް ފަރާތްތަކުން ބުނި ގޮތުގައި މި މައްސަލައިގައި ސަރުކާރުން ބުނާ އެއްޗަކާއި ކުރާ ކަންތައް ތަފާތެވެ.
ފްލެޓް ލިބުނު ފަރާތަކުން ކިޔައިދިން ގޮތުގައި، ރައީސް ޑރ. މުއިއްޒު ވިދާޅުވި ވާހަކައާ ޚިލާފަށް، ހައުސިންގ މިނިސްޓްރީގެ މުވައްޒަފުން ޓީވީ ޕްރޮގްރާމްތަކަށް އަރުވައިގެން، ވާހަކަދައްކަމުންދާ ކަމަށާއި މިކަމުގައި ވާނުވާ ނޭނގޭ ކަމަށެވެ.
ފްލެޓް ލިބުނު ފަރާތްތަކުން ކަންބޮޑުވުން ފާޅުކުރީ ފްލެޓް ލިސްޓް މުޅިން ރިވިއު ކުރާ ކަމަށް ހައުސިންގ މިނިސްޓްރީގެ މުވައްޒަފުން ޓީވީ ޕްރޮގްރާމެއްގައި ބުނުމާ ގުޅިގެންނެވެ.
ހައުސިންގ މިނިސްޓްރީގެ ސީނިއަރ ޕޮލިޓިކަލް ޑިރެކްޓަރުން ޓީވީ ޕްރޮގްރާމެއްގައި މައުލޫމާތު ދެއްވަމުން ވިދާޅުވީ ކުރީ ސަރުކާރު ނިމުމުގެ ކުރިން ފްލެޓް ދޫކުރުން އޭސީސީން ހުއްޓުވާފައިވާ ކަމަށާއި، އަދި މިސަރުކާރު އައިސް ރައީސް ވަނީ ލިސްޓުގައި ވަނީ ހައްޤުވެރި ފަރާތްތައްތޯ ކަށަވަރުކުރުމަށް ހައުސިންގ އެޑްވައިޒަރީ ކޮމެޓީއެއް އަދި އެޑްވައިޒަރީ ކޮމެޓީއެއް އުފައްދަވާފައިވާ ކަމަށާއި، މި ދެ ކޮމެޓީ އާއި އޭސީސީގެ މަސައްކަތުން މިނިސްޓްރީން މިހާރު ނިންމާފައިވަނީ މުޅި ސްކީމް އެއްކޮށް ރިވިއުކޮށް ލިސްޓު އަލުން އެކުލަވާލުމަށް ކަމަށެވެ.
މިއާ ޚިލާފަށް، ދާދި ފަހުން ފަހި ޔޫނިއަންގެ އިސް އޮފިޝަލުންނާއެކު 2 ސެޕްޓެންބަރ 2024 ގައި ރައީސް އޮފީހުގައި އޮތް ބައްދަލުވުމެއްގައި ރައީސް ޑރ. މުޙައްމަދު މުޢިއްޒު ވިދާޅުވެފައިވަނީ އިންތިޚާބުގައި ވެވަޑައިގެންނެވި ވަޢުދާ އެއްގޮތަށް ފްލެޓްގެ ހައްޤުވެރިންނަށް ފްލެޓް ދެއްވާނެ ކަމަށެވެ.
އިންތިޚާބުގެ ތެރޭގައި ޑރ. މުއިއްޒު ވިދާޅުވެފައިވަނީ ސަރުކާރުން ކަނޑައަޅާފައިވާ ލިސްޓާ އެއްގޮތައް އެމަނިކުފާނުގެ ސަރުކާރެއްގައި ފްލެޓް ދެއްވާނެ ކަމަށެވެ. ވެރިކަމަށް ވަޑައިގެންނެވި ފަހުންވެސް ރައީސް ވިދާޅުވެފައިވަނީ ރައްޔިތަކަށް ދީފައިވާ ބޯހިޔާވަހިކަމެއް އަތުނުލައްވާނެ ކަމަށެވެ.
ފްލެޓް ލިސްޓަށް ފްލެޓް ދޫކުރުން ހުއްޓާލާފައިވަނީ އެންޓި-ކޮރަޕްޝަން ކޮމިޝަނުން އެންގުމާ ގުޅިގެން ކަމަށާއި، ކުރިއަށް އޮތް މަހުގެ ނިޔަލަށް ފްލެޓް ޙަވާލުކުރެވޭނެ ކަމަށާއި އަދި އެކި އެކި ގޮތްގޮތައް ފްލެޓް ލިސްޓް ބަހާލާން އުޅޭ ވާހަކަ ދެކެވޭ ވާހަކައަށް ރައްދުދެއްވަމުން އެކަން އެހެން ނުހިނގާނެ ކަމަށް ރައީސް ވިދާޅުވި ކަމަށް، ސެޕްޓެމްބަރު 2 ވަނަ ދުވަހު ރައީސް އޮފީހުގައި ރައީސުލްޖުމްހޫރިއްޔާ އާއެކު ބޭއްވި ބައްދަލުވުމަށްފަހު މީޑިއާ އަށް މައުލޫމާތު ދެއްވަމުން ފަހި ޔޫނިއަންގެ ފައުންޑަރ ނާއިފް އަބޫބަކުރު ވިދާޅުވެފައިވެއެވެ.
މިދިޔަ ސަރުކާރުން ހިންގި "ގެދޮރުވެރިޔާ" ސްކީމުގެ ދަށުން 4,000 ފްލެޓް ލިބޭ ފަރާތްތައް ގެޒެޓްކޮށް، އޭގެ ތެރެއިން 3,778 ފަރާތާއެކު އެގްރީމެންޓް ވެސް ވަނީ ހަދާފައެވެ.
ފްލެޓް ދޫކުރުމުގެ މައްސަލައާ ގުޅޭގޮތުން އަދިވެސް ވާނުވާ ނޭނގޭ ކަމަށް ފްލެޓް ލިސްޓުގައި ހިމެނޭ ބައެއް ފަރާތްތަކުން ފާހަގަކޮށްފައިވާއިރު، ސަރުކާރުން ދައްކާ ވާހަކަތަކުގެ ރާގު އެކި ފަހަރު ބަދަލުވަމުންދާތީ އެކަމުގެ ކަންބޮޑުވުން އެތައް ފަހަރެއްގެ މަތިން ފާޅުކޮށް، ސިލްސިލާކޮށް މުޒާހަރާވެސް ދަނީ ކުރަމުންނެވެ.
