ރައީސް ދެއްވީ މަހުގެ ޑިއުޓީ ކަނޑާލާނެކަމުގެ ޔަގީންކަން
މަސްވެރިކަމުގެ ސިނާއަތް ކުރީ ސަރުކާރުތަކުން ތަރައްގީ ނުކުރާ ވަރަށް މި ސަރުކާރުން އެ ސިނާއަތް ތަރައްގީކުރެވިއްޖެ
އެމްޑީޕީ އިން އައްޑޫގައި ބޭއްވި ޖަލްސާގައި ރައީސް ޞާލިހް ވާހަކަފުޅުދައްކަވަނީ
ރާއްޖެއިން ބޭރުކުރާ މަހުން، ޔޫރަޕާއި އިނގިރޭސީ ވިލާތުން ނަގާ ޑިއުޓީ ވަރަށް އަވަހަށް ކަނޑާލާނެކަމުގެ ޔަގީންކަން ރައީސުލްޖުމްހުރިއްޔާ އިބްރާހީމް މުހައްމަދު ޞާލިހް ދެއްވައިފިއެވެ.
ހޮނިހިރު ދުވަހު އޮންނަ އެމްޑީޕީގެ ރިޔާސީ ޕްރައިމަރީއާ ގުޅިގެން އައްޑޫ ސިޓީގައި ބޭއްވި ކެމްޕޭން ޖަލްސާގައި ވާހަކަފުޅުދައްކަވަމުން ރައީސް އިބްރާހިމް މުހައްމަދު ޞާލިހް ވިދާޅުވީ އެ ޓެކްސް ކަނޑާލިކަމުގެ އިއުލާން މަސްވެރިންނަށް ލިބިގެންދާނެކަން ޔަޤީންކަމާއެކު ވިދާޅުވާކަމަށެވެ. އެއިރުން މަހުގެ އަގަށް ހެޔޮ ބަދަލެއް ގެނައުމުގެ މަސައްކަތް ފައްޓަވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ރާއްޖޭގެ މަސްވެރިކަމުގެ ސިނާއަތް ކުރީ ސަރުކާރުތަކުން ތަރައްގީ ނުކުރާ ވަރަށް މި ސަރުކާރުން އެ ސިނާއަތް ތަރައްގީކޮށްފައިވާ ކަމަށެވެ. އެގޮތުން، މަސްވެރިން ބާނާ މަސް ގަނެ، ފިނިކޮށް، ރައްކާކުރުވެނެ ކެޕޭސިޓީ 4 ގުނައަށް އިތުރުކުރުމުގެ މަސައްކަތް ކުރިއަށްދާކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނުގެ ކުރީ ދަތުރުފުޅުގައި ހުޅުމީދޫއަށް ވަޑައިގެންނެވި ކަމަށެވެ. އަދި ހުޅުމީދޫގެ މަސް ފެކްޓްރީގައި މިހާރު ހުރި ސްޓޯރޭޖް ކެޕޭސިޓީ ވަރަށް ފަސޭހައިން ޑަބަލް ކުރެވޭނެ ޖާގަ އެބަހުރި ކަމަށާއި، އިރާދަކުރެއްވިއްޔާ ވަރަށް އަވަހަށް އެކަން ކުރައްވާނެ ކަމަށެވެ.
