ކޯފްސިރަޕް ވިހަވެގެން މަރުވި ދަރިފުޅާއެކު ހުރިހާ ޢުއްމީދެއްވެސް ކަފުނަށް

ދިރިއުޅެމުން ދިޔަ ގޭ ދޮރުމަތީގައި، އަންހެން ދަރިފުޅުގެ ފައިވާންތައް ތަރުތީބު ކުރަމުން ދިޔައިރު، އޭނާގެ ފިރިހެން ދަރިފުޅުގެ ފައިވާންތައް ދެން އެތަނަކުން ނުފެންނާނެކަން، ޢުމުރުން 26 އަހަރުގެ ސިއްތީ ސުރްހަރްދިޔާތީ ޤަބޫލު ކުރެއެވެ.

ޢުމުރުން 2 އަހަރުގެ ޢުމަރު އަބޫ ބަކްރުއަކީ، ތަޣައްޔަރު ވެފައިވާ ކޯފްސިރަޕްގެ ޝިކާރައަކަށްވެ، އިންޑޮނޭޝިއާގައި މި ފަހުން މަރުވި އެތައް ސަތޭކަ ކުދިންނެއްގެ ތެރޭގައި ހިމެނޭ ކުއްޖެކެވެ. 

އެއީ 2022 ވަނަ އަހަރެވެ. ޢުމަރު ބަލިވުމުން، ސިއްތީ ސުރްހަރްދިޔާތީ، އެ ދަރިފުޅު ގޮވައިގެން ކުލިނިކަށް ދިޔައެވެ. ޑޮކްޓަރު އިރުޝާދު ދިނީ ޕެރަސެޓަމޯލް ކޯފްސިރަޕެއް ދިނުމަށެވެ. ޢުމަރުގެ ޙާލު ރަނގަޅު ވާ ގޮތެއް ނުވިއެވެ. ކުޑަ ކަމުދާންވެސް އުނދަގޫ ވާން ފެށިއެވެ. ކަންބޮޑުވެފައި އިން ސިއްތީ ސުރްހަރްދިޔާތީ، އޭނާގެ ދަރިފުޅު، އެކި ހޮސްޕިޓަލުތަކަށް ގެންދަން ފެށިއެވެ. ދަރިފުޅަށް ލުޔެއް ލިބޭތޯއެވެ. ނަމަވެސް، އެގޮތުގައި 2 ހަފުތާ ފާއިތުވީތަނާ، އެ ދަރިފުޅު، މި ދުނިޔެއާ ވަކިވެއްޖެއެވެ. ސިއްތީ ސުރްހަރްދިޔާތީ އަދިވެސް އިނީ، ޙަޤީޤަތް ޤަބޫލު ކުރާނެ ގޮތެއް ނޭނގިފައެވެ.

ކިޑްނީއަށް ސީރިއަސް އަނިޔާތަކެއް ލިބިގެން މިދިޔަ އަހަރު އިންޑޮނޭޝިއާގައި 200 އެއްހާ ކުދިންގެ ފުރާނަ ގެއްލިފައިވެއެވެ. އެ ކުދިންގެ ބަލި ގުޅިފައި ވަނީ، ޕެރަސެޓަމޯލް ދިޔާ ބޭހުގެ ބައެއް ބާވަތްތަކުން ފެނުނު 2 މާއްދާއެއް ކަމަށް ވާ އެތިލީން ގްލައިކޯލްއާއި ޑައިއެތިލީން ގްލައިކޯލްއާ ކަމަށް، އިންޑޮނޭޝިއާގެ ކަމާ ބެހޭ ފަރާތްތަކުން ވަނީ ބުނެފައެވެ. މި 2 މާއްދާއަކީ އެއްޗެހި ގަނޑުވިޔަ ނުދިނުމަށާ، ބްރޭކް ފްލުއިޑްގެ އިތުރުން ސިނާޢީ އެހެން ބައެއް ކަންކަމުގައި ބޭނުން ކުރާ 2 މާއްދާއެކެވެ. އަދި ފެންވަރު ދަށް ސިއްހީ އުފެއްދުންތަކުގައިވެސް ބޭނުން ކުރެއެވެ. އެގޮތުން، ފެންވަރު ދަށްކޮށް  އުފައްދާ ކޯފްސިރަޕް ފަދަ ބޭސްތަކުގެ އޮލަކަން ހިފެހެއްޓުމަށްވެސް މި މާއްދާތައް ބޭނުންކޮށްފައި ހުއްޓާ ފެނެއެވެ. މިއީ ހަށިގަނޑަށް އެތެރެވުމުން ބައެއް ފަހަރު، ވިހަކޮށްލާ މާއްދާތަކެކެވެ.

ސިއްތީ ސުރްހަރްދިޔާތީއާއެކު އިތުރު 25 ޢާއިލާއަކުން ދަނީ އިންޑޮނޭޝިއާގެ ސިއްހަތާ ބެހޭ ވުޒާރާއާއި މާލީ ވުޒާރާގެ އިތުރުން ޑްރަގް ރެގިއުލޭޓަރާއި ބޭސް އުފައްދާ 8 ކުންފުންޏަކާ ދެކޮޅަށް ދަޢުވާ ކުރަމުންނެވެ. ބަދަލު ހޯދުމުގެ ގޮތުންނެވެ. ކޯޓުގެ އަޑު އެހުންތައް ފެށީ ޖެނުއަރީ 17 ވަނަ ދުވަހުއެވެ.

ބައިނަލްޤައުވާމީ ފެތުރުމުގައި ގިނަ ބައެއްގެ އިތުބާރު ހޯދާފައި ވާ ރޮއިޓަރޒްއިން ބުނި ގޮތުގައި މާލީ ވުޒާރާގެ އިތުރުން ސިއްތީ ސުރްހަރްދިޔާތީ ދަޢުވާ ކުރާ ކުންފުނިތަކުގެ ތެރެއިން 5 ކުންފުންޏަކުން، ސުވާލަށް ޖަވާބުދާރީ ވެފައެއް ނުވެއެވެ. އަދި އަނެއް 3 ކުންފުންޏާ ގުޅޭ ގޮތް ވެފައި ނުވާ ކަމަށް ޚަބަރު ލިބެއެވެ.

މިހާރު ކުރިއަށްދާ ޝަރުޢީ މަރުހަލާއަށް އިހުތިރާމް ކުރާ ކަމަށް ޑްރަގް ރެގިއުލޭޓަރ ބީޕޮމްއިން ބުނެފައި ވާއިރު، ސިއްހަތާ ބެހޭ ވުޒާރާއިން ވަނީ މިމައްސަލާގައި ކޮމެންޓް ކުރުމަށް އިންކާރު ކޮށްފައެވެ.

އިންޑޮނޭޝިއާގެ ކަމާ ބެހޭ ފަރާތްތަކުން ވަނީ ތަފާތު އެކި ބާވަތްތަކުގެ ކޯފްސިރަޕްތައް ބޭނުން ކުރުން މަނާކޮށް، ބައެއް ކުންފުނިތަކާ ދެކޮޅަށް ޤާނޫނީ ފިޔަވަޅު އަޅަން ފަށާފައެވެ. އެ ކުންފުނިތަކަކީ، އެ ކުންފުނިތަކުގެ އުފެއްދުންތަކުގައި ނުރައްކާތެރި މާއްދާތައް އެކުލެވޭ ކުންފުނިތަކެވެ.

ޝަރުޢީ މަރުހަލާގެ ތެރެއިން ބަޔަކު ޖަވާބުދާރީ ކުރުވާ، އިންސާފު ހޯދުނު ކަމުގައި ވީ ނަމަވެސް، ދަރިފުޅުގެ ވަކިވެދިއުމާއެކު ސިއްތީ ސުރްހަރްދިޔާތީގެ ދިރިއުޅުމަށް ލިބިފައި ވާ އުނިކަން ފޫ ބެދޭނެ ހަމަ އެއްވެސް ގޮތެއް ނެތެވެ. ސިއްތީ ސުރްހަރްދިޔާތީ ބުނާ ގޮތުގައި ދިރިއުޅުމުގެ ހުރިހާ މާނައެއް މިއަދު އޭނާއަށް ގެއްލިއްޖެއެވެ. ކުރިހާ ޢުއްމީދެއް ވިއްސިވިހާލި ވެއްޖެއެވެ.