ޕްރައިމަރީ އާާއި މެދު ޕާޓީގެ ޗެއަރޕާސަން ފައްޔާޒު އިސްމާއީލަށް އިތުބާރު އެބަ އޮތް: ރައީސް ނަޝީދު
އެމްޑީޕީން އާއްމުކޮށްފައިވާ ގޮތުގައި ޕްރައިމަރީގައި ވޯޓުލުމަށް މުޅި ޖުމްލަ 243 ވޯޓު ފޮއްޓެއް ބަހައްޓާނެ
ރައީސް މުހައްމަދު ނަޝީދު
މި ޖެނުއަރީ މަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމެރީގެ ކަންކަމުގައި އެޕާޓީގެ ޗެއަރޕާސަން ފައްޔާޒު އިސްމާއީލަށް އިތުބާރުކުރައްވާކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ ކުރީގެ ރައީސް މުހައްމަދު ނަޝީދާއި ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހުއެވެ. އެ ދެބޭފުޅުންވެސް ގެންދަވަނީ ވަަރަށް ފޯރީގައި ޕްރައިމަރީ އަށް ކެމްޕެއިން ކުރައްވަމުންނެވެ. އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޕްރައިމަރީ އާއި މެދު ވާހަކަދައްކަަވަމުން ރައީސް ނަޝީދު ވަނީ ވޯޓްގެ ސައްކަން ކަށްވަރުކުރަން ޖެހޭ ކަމަށް ވިދާޅުވެފައެވެ. އެ މަސއްކަތް ކުރުމަށްޓަކާ ވޯޓުލުމަށް ދާ މީހުންގެ އައިޑީކާޑާއި ލިސްޓާއި ދިމާވޭތޯ ބެލުމާއި ވޯޓް ނިމުމަށްފަހު ކަރުދާހުގެ އަދަދު ދިމާވޭތޯ ބެލުން ކަހަލަ ކަންކަން ކުރަން ޖެހޭކަން އެމަނިކުފާނު ފާހަގަކުރެއްވިއެވެ.
ވޯޓަކީ އެމްޑީޕީ އަށް ފަރިތަ އެއްޗެއް ކަމަށް ފާހަގަކުރައްވާ ނަޝީދު ވިދާޅުވީ ކުރިއަށް އޮތް ޕްރައިމަރީގެ ކަންކަން އިންސާފުވެރިކަމާއި އެކު ކުރިއަށް ގެންދިއުމަށް ވަރަށް ރަނގަޅަށް ކަންކަން ކުރިއަށް ގެންދަން ޖެހޭ ކަމަށެވެ. އެ މަސައްކަތް ކުރުމަށް ޕާޓީގެ ޗެއަރޕަރސަން އަށް އިތުބާރު އޮތް ކަމަށާއި އިންތިޚާބުގެ އިންތިޒާމް ކޮމިޓީ އަށް އިތުބާރުކުރައްވާ ކަމަށް އެމަނިކުފާނު ވިދާޅުވިއެވެ.
އެމްޑީޕީން އާއްމުކޮށްފައިވާ ގޮތުގައި ޕްރައިމަރީގައި ވޯޓުލުމަށް މުޅި ޖުމްލަ 243 ވޯޓު ފޮއްޓެއް ބަހައްޓާނެއެވެ. އެގޮތުން މާލޭގައި 49 ވޯޓު ފޮއްޓާއި ހުޅުމާލޭގައި އެއް ފޮށި އަދި ވިލިމާލޭގައި އެއް ފޮށި ބަހައްޓާއިރު އަތޮޅުތެރޭގައި 194 ވޯޓު ފޮށި ބަހައްޓާނެއެވެ. މިފަހަރު ޕްރައިމަރީ އިންތިޚާބުގައި ވޯޓު ލެވޭނީ އެމްޑީޕީގެ 57،255 މެންބަރުންނަށެވެ. ވޯޓުލުން އޮންނާނީ މި ހިނގާ ޖެނުއަރީ މަހުގެ 28 ވަނަ ދުވަހު ހެނދުނު 9:00 އިން ހަވީރު 5:00 އަށް ކަމަށް އެ ޕާޓިން ބުނެއެވެ.
