މަޖިލިސް މަސައްކަތްތައް ކުރަން ދަތިކަމެއް ނެތް: ރައީސް ނަޝީދު
ރިޔާސީ ބަޔާން އިއްވުމުގެ ގޮތުން ބައްވާ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އޮންނާނީ ފެބްރުއަރީ 6 ވަނަ ދުވަހު
ރައީސް ނަޝީދު
ރައްޔިތުންގެ މަޖިލީހުގެ މަސައްކަތްތައް ކުރިއަށް ގެންދަން ދަތިކަމެއް ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ރައީސް ކަމުގެ މަގާމުގައިވެސް ހުންނެވި ރައީސް ނަޝީދު ވިދާޅުވީ ރައްޔިތުންގެ މަޖިލީހުގެ މަސައްކަތްތައް ފަށާއިރު ކޮންމެ ފަހަަރަކުވެސް ލެޖިސްލޭޓިވް އެޖެންޑާ އެއް ގެންގުޅުއްވާ ކަމަށާއި އަދި އެ މަސައްކަތަށް ވަރަށް ޚާއްސަ އިސްކަމެއް ދެއްވާ ކަަމަށެވެ. ރައީސް ނަޝީދު އިތުރަށް ވިދާޅުވީ ކުރިއަށް އޮތް އެމްޑީޕީގެ ރިޔާސީ ޕްރައިމަރީ އަށް އެމަނިކުފާނު ކުރިމަތިލެއްވީ މަޖިލީހުގެ ތެރެއިން ސަރުކާރު ޒިންމާދާރުކުރުވަން ދަތިތައް ހުރުމުން ކަމަށެވެ. އަދި ބައެއް ބިލްތައް އަވަސްނުކުރެވެނީ ސަރުކާރުން ބިލްތައް ފޮނުވާއިރު އެ ބިލްތަކުގައި އިސްލާހުކުރަން ޖެހޭ ގިނަ ކަންކަންހުރުމުން ކަަމަށް ވެސް އެ މަނިކުފާނު ވިދާޅުވިއެވެ. އެހެންނަމަވެސް ބިލްތަކުގެ މަސައްކަތް އަވަސްކުރަން މަސައްކަތްކުރައްވާނެ ކަމަށް އެމަނިކުފާނު ވިދާޅުވިއެވެ. ރައީސް ނަޝީދު ވަނީ ރައްޔިތުންގެ މަޖިލީހުގެ ކޮންޓްރޯލް އޮތީ ރައީސް އިބްރާހިމް މުހައްމަދު ޞާލިހުގެ އަތްޕުޅުގައި ކަމަށް ވެސް ވިދާޅުވެފައެވެ.
ރިޔާސީ ބަޔާން އިއްވުމާއި ރައްޔިތުންގެ މަޖިލީހުގެ މި އަހަރުގެ ފުރަތަމަ ޖަލްސާ އަންނަ ފެބްރުއަރީ މަހުގައި ބާއްވާ ގޮތަށް ވަނީ ހަމަޖައްސާފައެވެ. ރައްޔިތުންގެ މަޖިލީހުގެ އިދާރާއިން ވަނީ ރައީސުލްޖުމްހޫރިއްޔާ އިއްވަވާ ރިޔާސީ ބަޔާން އިއްވުމުގެ ގޮތުން ބައްވާ މި އަހަރުގެ ފުރަތަމަ ދައުރުގެ ފުރަތަމަ ޖަލްސާ އޮންނާނީ ފެބްރުއަރީ 6 ވަނަ ދުވަހު ކަމަށް ބުނެފައެވެ. އެ ޖަލްސާ ބާއްވަން ހަމަޖައްސާފައިވަނީ ފެބްރުއަރީ މަހުގެ 6 ވަނަ ދުވަހުގެ ހެނދުނު 9:00ގައެވެ.
މިދިޔަ އަހަރު ރައްޔިތުންގެ މަޖިލީހުގެ ޖަލްސާތަކުގައި އެމްޑީޕީގެ މެންބަރުންގެ ހުރި ޚިޔާލްތަފާތުވުންތައް ވަރަށް ބޮޑަށް ފެނިގެން ދިޔައެވެ. ރައީސް ޞާލިހަށް ތާއީދުކުރައްވާ މެންބަރުންނާއި، ރައީސް ނަޝީދަށް ތާއީދުކުރައްވާ މެންބަރުންގެ މެދުގައި ބައެއް ކަންކަމާއި މެދު ޚިޔާލުތަފާތުވެ ބަހުސްތައް ހިނގައިދިޔަ މަންޒަރު ވެސް ފެނިގެންދިޔައެވެ.
