ކަންކަމުގެ ހަޤީޤަތް ނުބަލާ ފިތުނަވެރި ވާހަކަ ދެއްކުމަކީ އެއީ ޤައުމަށް ހެޔޮ އެދުން ނޫން ކަމަށް ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ފުނަދޫގައި ބޭއްވެވި ޖަލްސާގައި ވާހަކަފުޅު ދައްކަވަމުން ޝާހިދު ވިދާޅުވީ ޤައުމަށް ހެޔޮ އެދުމަކީ ރައްޔިތުންނަށް ފައިދާވާ ގޮތަށް ކަންކަން ހިނގަމުންދަނިކޮށް އެކަން ތަޖުރިބާ ކުރެވިފައި ހުންނެވި ވެރިޔަކު ހުންނަވަނިކޮށް، އެކަން ރައްޔިތުންނާއި ހަމައަށް ގެނެސްދޭ ވެރިޔަކު ހުންނަވަނިކޮށް އެ ވެރިޔަކު ދުރުކޮށްލާފައި އެހެން ބޭފުޅަކާއި ދިމާލަށް ރައްޔިތުން ނުދާނެކަން ޤަބޫލުފުޅު ކުރެއްވުން ކަމަށެވެ.  

ރައީސް ސާލިހަކީ "ޕްރޫވަން" ލީޑަރެއް ކަމަށާއި އެއީ ސާބިތުކޮށްދެއްވާފައި ހުރި ޒައީމެއް ޝާހިދު ވިދާޅުވިއެވެ. އަދި ރާއްޖެ ކުރިއަށް ދިޔުމުގެ ހުރިހާ ވެސް ފުރުސަތެއް އޮތީ ރައީސް ސާލިހާއެކު ކަމަށް ވިދާޅުވެ، އެމަނިފާނަށް ޝާހިދު ވަނީ ތައުރީފު ކުރައްވާފައެވެ.

މި ސަރުކާރަށް ކަމެއް ނުވާކަމަށް ބައެއް ފަރާތްތަކުން ވާހަކަ ދައްކާތީ ޝާހިދު ވަނީ އެކަމަށް ފާޑުވިދާޅުވެފައެވެ.

ކޮވިޑުގެ ހާލަތުގައި ސަރުކާރުން އޭރު އެޅި ފިޔަވަޅުތަކަށް ޝާހިދު ވަނީ ތައުރީފުކުރައްވާފައެވެ. އަދި ކޮވިޑުގެ ދެ އަހަރުގައި އެއްވެސް މީހަކަށް އަސާސީ ކާނާ، ބޭސްފަރުވާ ނުލިބިގެން މަރުވިތޯ ޝާހިދު ވަނީ ސުވާލު އުފައްދަވާފައެވެ.

ކޮވިޑުގެ ތެރޭގައި އެކި މަޝްވަރާތައް ކުރިއަށް ދިޔައިރު އެކި މަޖިލިސްތަކުގައި ތަރައްޤީގެ މަޝްރޫއުތައް ހުއްޓާލުމަށް ބައެއް ބޭފުޅުން ލަފާ އެރުއްވި ނަމަވެސް މި ދަނޑިވަޅަކީ ފަހަތަށް ދާންވީ ވަގުތު ނޫންކަމަށް ރައީސް ވިދާޅުވި ކަމަށް ޝާހިދު ވިދާޅުވިއެވެ. އަދި އެ ހާލަތުގައި ވެސް މި ދިވެހިރާއްޖޭގެ އެއްވެސް ރައްޔިތަކު އަސާސީ ބޭސްފަރުވާ އާއި ކާނާއިން މަހްރޫމުވިޔަ ނުދޭނެ ރައީސް ނިންމެވިކަން ޝާހިދު ފާހަގަކުރެއްވިއެވެ.