އައްޑޫ ސިޓީ ރީޖަނަލް ވޭސްޓް މެނޭޖްމަންޓް ފެސިލިޓީގެ މަަސައްކަތް ނިމުމަކާ ގާތަށް
މިހާރު މަސައްކަތްދާގޮތުން ޖުލައި މަހުގައި ފެސިލިޓީގެ މަސައްކަތް ނިންމާ ހިދުމަތް ދެވެން ފަށާނެ
އައްޑޫ ސިޓީ ވޭސްޓް މެނޭޖްމަންޓް ފެސިލިޓީ
އައްޑޫ ސިޓީ ރީޖަނަލް ވޭސްޓްމެނޭޖްމަންޓް ފެސިލިޓީގެ މަަސައްކަތް ޖުލައި މަހުގެ ތެރޭގައި ނިމޭނެކަމަށް އެންވަޔަރމަންޓް މިނިސްޓްރީން ބުނެފިއެވެ.
ރާއްޖެ ޓީވީއަށް މައުލޫމާތުދެއްވަމުން އެންވަޔަރމަންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު ވިދާޅުވީ ރާއްޖޭގެ އެންމެ ދެކުނު ސަރަހައްދަށް އަމާޒުކޮށްގެން އެންވަޔަރމަންޓް މިނިސްޓްރީ އިން ކުރިއަށް ގެންދާ އައްޑޫ ސިޓީ ރީޖަނަލް ވޭސްޓް މެނޭޖްމަންޓް ފެސިލިޓީގައި ގާއިމްކުރުމަށް ހަމަޖެހިފައިވާ ވޭސްޓް ޓު އެނަރޖީ ޕްލާންޓް ރާއްޖެއިން ބޭރުގައި ޑިޒައިންކޮށް މެނުފެކްޗަރ ކުރުމަށްފަހު ރާއްޖެ ގެނެވި އިންސްޓޯލް ކުރުމުގެ 95 އިންސައްތަ މަސައްކަތް ނިމިފައިވާ ކަމަށެވެ.
އަލީ ސޯލިހު ވިދާޅުވީ މިހާރު މަސައްކަތްދާގޮތުން ޖުލައި މަހުގައި ފެސިލިޓީގެ މަސައްކަތް ނިންމާ ހިދުމަތް ދެވެން ފަށާނެ ކަމަށެވެ. މިހާރު ފެސިލިޓީގައި ކުރިއަށް ދަނީ ޕްލާންޓް ބެހެއްޓުމަށްޓަކައި ހަދަން ޖެހޭ ކޮންޓްރޯލް އިމާރާތާއި ވޭސްޓް އިންޓޭކް އިމާރާތުގެ މަސައްކަތް ކަމަށެވެ.
މި ފެސިލިޓީއަކީ ދުވާލަކު 50 ޓަނުގެ ކުނި އަންދައިގެން ހަކަތަ އުފެއްދުމަށް ޑިޒައިން ކުރެވިފައިވާ ޕްލާންޓެކެވެ. އަދި މި ޕްލާންޓުން 1.5 މެގަވޮޓްގެ ކަރަންޓް އުފެއްދޭނެއެވެ.
މި ޕްލާންޓުން އުފައްދާ ކަރަންޓުގެ ތެރެއިން 1 މެގަ ވޮޓް އައްޑޫ ސިޓީގެ ސެންޓްރަލް ގްރިޑަށް ފީޑް ކުރެވޭނެއެވެ. އަދި 500 ކިލޯ ވޮޓް ބޭނުން ކުރާނީ އެ ފެސިލިޓީގެ އެކި ބޭނުންތަކަށެވެ.
މިއީ މޯލްޑިވްސް ގްރީން ފަންޑުން 16 މިލިއަން ޑޮލަރު ޚަރަދު ކޮށްގެން ހިންގާ މަޝްރޫއެކެވެ.
މި ފްރޮޖެކްޓްގެ މައިގަނޑު ބޭނުމަކީ ދެކުނުގެ ކުނި ރަނގަޅު ގޮތުގައި މެނޭޖް ކުރުމެވެ. އިންސްޓޯލްކޮށް ނިމި ޕްލާންޓްގެ ބޭނުން އޮކްޓޯބަރ މަހު ކުރަންފެށޭނެ ކަމަށް އެމިނިސްޓްރީން މައުލޫމާތުދެއެވެ.
