ޑިޕާއި ހޯދުމާ ގާތަށް އެތުލެޓިކޯ އިން ޖެހިލައިފި

ސްޕެއިންގެ ބާސެލޯނާ އަށް ކުޅެމުން އަންނަ ނެދަލެންޑްސްގެ މެމްފިސް ޑިޕާއި ހޯދުމާ ގާތަށް ވާދަވެރި އެތުލެޓިކޯ މެޑްރިޑުން ޖެހިލައިފި ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 28 އަހަރުގެ ފޯވާޑް ހޯދުމަށް އެތުލެޓިކޯ އިން ބޭނުންވަނީ އެ ޓީމަށް ކުޅެމުން އައި ޕޯޗުގަލްގެ ޔާއޯ ފެލިކްސް ލޯނު އެއްބަސްވުމެއްގެ ދަށުން ޗެލްސީ އަށް ބަދަލުވުމުންނެވެ. ޑިޕާއި ހޯދުމަށް އެތުލެޓިކޯ އިން ބާސެލޯނާގައި އެދުނު ކަމަށާއި، އެކަމުގެ މަޝްވަރާތައް ދެ ކުލަބުގެ މެދުގައި ކުރިއަށް ދިޔަ ކަަމަށް ވެސް ރިޕޯޓުތައް ބުނެ އެވެ. މީގެ އިތުރުން ރިޕޯޓުތައް ބުނާ ގޮތުގައި ޑިޕާއި ހޯދުމަށް އެތުލެޓިކޯ އަށް މިހާރު ވަނީ ބާސެލޯނާއާއެކު އެއްބަސްވުމަކަށް އާދެވިފަ އެވެ. އެކަމުގެ ކަންކަން މިހާރު އޮތީ އެންމެ ފަހުގެ މަރުހަލާގައި ކަމަށާއި، ޑިޕާއި އެތުލެޓިކޯ އަށް ބަދަލުވާނީ ދާއިމީ އެއްބަސްވުމެއްގެ ދަށުން ކަމަށް ވެސް ރިޕޯޓުތައް ބުނެ އެވެ. ޑިޕާއި ހޯދުމަށް އެތުލެޓިކޯ އިން ބާސެލޯނާ އަށް ގާތްގަނޑަކަށް ތިން މިލިއަން ޔޫރޯ ދައްކާނެ ކަމަށާއި، ޑިޕާއި ވެސް ބޭނުންވަނީ އެތުލެޓިކޯ އަށް ބަދަލުވާން ކަމަށް ވެސް ރިޕޯޓުތައް ބުނެ އެވެ.

ޑިޕާއި ބާސެލޯނާ އަށް ބަދަލުވީ 2021 ވަނަ އަހަރު އެވެ. ލިއޯން ދޫކޮށް ބާސެލޯނާ އަށް ބަދަލުވެ އޭނާ ވަނީ އެ ކުލަބަށް ކުޅެދިން 42 މެޗުގައި 14 ލަނޑު ޖަހައިފަ އެވެ. ބާސެލޯނާގެ ކޯޗުކަމާ ޒަވީ ހެނާންޑޭޒް ހަވާލުވެ އަންނަނީ ޑިޕާއި އަށް ފުރުސަތު ދެމުންނެވެ. މީގެ ކުރިން ޒަވީ ބުނީ ބާސެލޯނާއިން ޑިޕާއި ދޫކޮށްލަން ބޭނުންނުވާ ކަމަށެވެ. ނަމަވެސް މިހާރު ބާސެލޯނާ އިން އެ ކުލަބުގައި ތިބި ބައެއް ކުޅުންތެރިން ދޫކޮށްލަން ބޭނުންވާ ކަމަށް ރިޕޯޓުތައް ބުނެ އެވެ. ޑިޕާއި އަންނަނީ 2013 ވަނަ އަހަރުން ފެށިގެން ނެދަލެންޑްސްގެ ޤައުމީ ޓީމަށް ވެސް ކުޅެމުންނެވެ. މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕް މުބާރާތުގައި ވެސް ޑިޕާއި ވަނީ ނެދަލެންޑްސްގައި މޮޅު ކުޅުމެއް ދައްކައިފަ އެވެ.