ޕްރިމިއާ ލީގު: ބޯންމައުތް ބަލިކޮށް ސިޓީ ދެވަނަ އަށް ޖެހިލައިފި

ޕްރިމިއާ ލީގުގައި އޭއެފްސީ ބޯންމައުތް ބަލިކުރުމަށްފަހު، މެންޗެސްޓާ ސީޓީ ޕޮއިންޓް ތާވަލުގެ ދެވަނަ އަށް ޖެހިލައިފި އެވެ.

ހޯމަ ދުވަހުގެ ރޭ ކުޅުނު މެޗު ބޯންމައުތްއާ ވާދަކޮށް ސިޓީން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

ބޯންމައުތް ދަނޑުގައި ކުޅުނު މި މެޗުގައި ސީޓީގެ ފަރާތުން މޮޅު ކުޅުމެއް ފެނިގެންދިޔައިރު، ލަނޑު ޖަހަން ގިނަ ފުރުސަތުތަކެއްވެސް ފުރަތަމަ ހާފްގައި އެޓީމަށް ވަނީ ލިބި ބޭކާރުވެފައެވެ.

ސިޓީން މެޗުގެ ލީޑު ނެގީ 29 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ރަހީމް ސްޓާލިން އެވެ. މި ލަނޑަށްފަހުވެސް އެޓީމަށް ވަނީ ލީޑު ފުޅާކުރުމަށް ގިނަ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ބޯންމައުތްގެ މައްޗަށް ސިޓީ ކުރިހޯދައިގެންނެވެ.

ދެވަނަ ހާފް ފެށިގެންވެސް ސީޓީގެ ފަރާތުން ވަނީ މޮޅު ކުޅުމެއް ފެނިގެންގޮސްފައެވެ. ސިޓީން މެޗުގެ ލީޑު ފުޅާކުރީ 69 ވަނަ މިނެޓުގައެވެ. މި ލަނޑަކީ ބޯންމައުތްގެ މިންގްސް އަތުން ބައިކޮޅަށް ވަތް ލަނޑެކެވެ.

މި ލަނޑަށްފަހުވެސް ސިޓީން ދިޔައީ އެޓޭކިން ކުޅުމެއް ދައްކަމުންނެވެ. އެގޮތުން ބޯންމައުތްގެ ހާފަށް ބާރުބޮޑުކޮށް ގިނަ ހަމަލާތަކެއް އެޓީމުން ވަނީ ފޮނުވާލާފައެވެ. އެހެންނަމަވެސް ބޯންމައުތުން ވަނީ މެޗުގެ ފަހުކޮޅު ވަރުގަދަޔަށް ޑިފެންސްކޮށްފައެވެ.

މި ނަތީޖާއާއެކު ސިޓީ އޮތީ ކުޅުނު 25 މެޗުން ލިބުނު 52 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ. މެޗުން ބަލިވި ބޯންމައުތް އޮތީ ކުޅުނު 25 މެޗުން ލިބުނު 26 ޕޮއިންޓާއެކު ޕޮއިންޓް ތާވަލުގެ 14 ވަނައިގައެވެ.