ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އައި ސްޕެއިންގެ އެޓޭކިން މިޑްފީލްޑަރު ޕަބްލޯ ސަރަބިއާ ޕްރިމިއާ ލީގުގެ ވުލްވްސް އަށް ބަދަލުވެއްޖެ އެވެ.

އުމުރުން 30 އަހަރުގެ ކުޅުންތެރިޔާ ވުލްވްސް އަށް ބަދަލުވީ ދެ އަހަރު ދުވަހުގެ ދާއިމީ އެއްބަސްވުމެއްގެ ދަށުންނެވެ. ވުލްވްސްއާއެކު ސަރަބިއާ ހެދި އެއްބަސްވުމުގެ މުއްދަތު ހަމަވާނީ 2025 ވަނަ އަހަރު އެވެ. ސަރަބިއާ ހޯދުމަށް ވުލްވްސް އިން ވަނީ ޕީއެސްޖީ އަށް ފަސް މިލިއަން ޔޫރޯގެ ފީއެއް ދައްކައިފަ އެވެ.

ސަރަބިއާ ޕީއެސްޖީ އަށް ބަދަލުވީ ސްޕެއިންގެ ސެވިއްޔާގައި ހުރުމަށްފަހު އެވެ. އޭގެ ކުރިން އޭނާ ވަނީ ސްޕެއިންގެ ރެއާލް މެޑްރިޑާއި، ގެޓާފޭ އަށް ވެސް ކުޅެފަ އެވެ. ޕީއެސްޖީގައި ހޭދަކުރި މުއްދަތުގައި ސަރަބިއާ ވަނީ އެ ޓީމަށް 98 މެޗު ކުޅެދީ 22 ލަނޑު ޖަހައިފަ އެވެ. ޕީއެސްޖީއާއެކު ސަރަބިއާ ވަނީ ފްރާންސް ލީގާއި، ފްރާންސް ކަޕް، ކަޕް ލީގު އަދި ޓްރޮފީ ޑީ ޗެމްޕިއަން ކާމިޔާބުކޮށްފަ އެވެ. މީގެ އިތުރުން 20-2019 ވަނަ ސީޒަންގެ ޔުއެފާ ޗެމްޕިއަންސް ލީގުގެ ފައިނަލް ކުޅުނު ޕީއެސްޖީގެ ސްކޮޑުގައި ވެސް އޭނާ ވަނީ ހިމެނިފަ އެވެ. ޕީއެސްޖީގައި ހުރުމަށްފަހު ސަރަބިއާ ވަނީ ލޯނު އެއްބަސްވުމެއްގެ ފަށުން ސްޕޯޓިން ލިސްބަން އަށް ކުޅެފަ އެވެ.

ސަރަބިއާ އަކީ ސްޕެއިންގެ ޤައުމީ ޓީމުގައި ވެސް ހިމެނޭ ކުޅުންތެރިޔެެކެވެ. މިދިޔަ އަހަރު އޮތް ފީފާ ވޯލްޑް ކަޕަށް ސްޕެއިން އިން އެކުލަވާލި ސްކޮޑުން ވެސް އޭނާ އަށް ޖާގަ ލިބުނެވެ. އެ މުބާރާތުގައި ސަރަބިއާ އަށް ކުޅުމުގެ ފުރުސަތު ލިބުނީ ގަދަ 16ގައި މޮރޮކޯއާ ދެކޮޅަށް ކުޅުނު މެޗުގަ އެވެ. އެ މެޗުގައި އޭނާ ކުޅެން ނުކުމެފައިވަނީ ބަދަލު ކުޅުންތެރިޔެއްގެ ގޮތުގަ އެވެ. ދެ ޓީމު އެއްވަރުގެ ނަތީޖާ ނެރުމަށް ޖެހި ޕެނަލްޓީގައި ސަރަބިއާ ޖެހި ޕެނަލްޓީ ނާކާމިޔާބު ވެސްވި އެވެ. މިހާތަނަށް އޭނާ ވަނީ ސްޕެއިންގެ ޤައުމީ ޓީމަށް ކުޅެދިން 26 މެޗުގައި ނުވަ ލަނޑު ޖަހައިފަ އެވެ.