އިންޑިއާގެ ދަނޑުވެރިކަމާ ބެހޭ ވަޒީރު ރޯމާ ދުވާލު ކޮޅަށް ހުންނަވާ ފާރަކަށް ކުޑަގިފިލި ކުރައްވައިފި
ސޯޝަލް މީޑިއާގައި ފާޑުކިޔަމުން ބުނެފައިވަނީ، ވަޒީރު އާ އިރިގޭޝަން ސްކީމެއް ފައްޓަވައި ދެއްވީ ކަމަށް
އިންޑިއާގެ މައި ސަރުކާރުގެ ދަނޑުވެރިކަމާ ބެހޭ ވަޒީރު ކޮޅަށް ހުންނަވާ ފާރަކަށް ކުޑަގިފިލި ކުރައްވަނީ
ބޮޑު ވަޒީރު މޯދީގެ ކެބިނެޓްގައި ހިމެނިވަޑައިގަންނަވާ ދަނޑުވެރިކަމާ ބެހޭ ވަޒީރު ރާދާ މޯހަން ސިންގ ރޯމާ ދުވާލު ކޮޅަށް ހުންނަވާ ފާރަކަށް ކުޑަގިފިލި ކުރެއްވި ފޮޓޯތަކެއް ސޯޝަލް މީޑިއާގައި ވައިގައި ހިފައިފިއެވެ.
މި ފޮޓޯތަކާއެކު މިނިސްޓަރ މިކަން ކުރެއްވިކަން ފަޅާ އެރުމުން ސޯޝަލް މީޑިއާގައި އިންޑިއާގެ އާއްމު ރައްޔިތުން ގެންދަނީ ހަޖޫ ޖަހާ ވަރަށް ބޮޑަށް ފާޑު ކިޔަމުންނެވެ.
ފޮޓޯތަކުން ފެންނަ ގޮތުގައި މިނިސްޓަރ ކޮޅަށް ހުންނަވާ ފާރަކަށް ކުޑަގިފިލި ކުރައްވާއިރު ހަތިޔާރު އެޅި ސިފައިން އޭނާގެ ފާރައަށް ތިބެއެވެ.
ފޮޓޯ ހާމަކުރި ޓްވީޓުގައި މިކަމަށް ހަޖޫ ޖަހަމުން ހިންދީ ބަހުން ލިޔެފައިވާ ލިޔުންކޮޅުގެ މާނައިގައި އޮންނަނީ، ވަރުގަދަ ސެކިއުރީޓީއާ އެކު ޔުނިއަން މިނިސްޓަރ ފޯ އެގްރިކަލްޗަރ އައު އިރިގޭޝަން ސްކީމެއް ފައްޓަވައި ދެއްވައިފި ކަމަށެވެ. ހަމަ އެއާއެކު، ބޮޑުވަޒީރު މޯދީގެ ސާފު އިންޑިއާ ކެމްޕޭން އަށް މިނިސްޓަރ އިތުރު ބާރެއް ދެއްވައިފި ކަމަށެވެ.
އިންޑިއާގެ މީޑިއާއިން ރިޕޯޓު ކޮށްފައިވާ ގޮތުގައި އީދު ބަންދަށް މިނިސްޓަރ ވަޑައިގަތީ ގާނޫނު ހަދާ މަޖިލީހުގައި އޭނާ ތަމްސީލް ކުރައްވާ ބިހާރުގެ މޮތިހާރީ އަށެވެ. އަދި މިދިޔަ ހޯމަ ދުވަހު އެ ޒިޔާރަތައް ފަހު އެނބުރި މިނިސްޓަރ ވަނީ ދިއްލީ އަށް އެނބުރި ވަޑައިގެންފައެވެ. މިހާދިސާއާ ގުޅޭ ގޮތުން މިނިސްޓަރާ ހަވާލާދީ ރިޕޯޓުތަކުގައިވަނީ، އެ ހިސާބުގައި ފާޚާނާއެއް ނެތުމުން، ދަތުރުމަތީގައި، ކެތް ނުކުރެއްވިގެން ކުޑަގިފިލި ކުރައްވަން މަޖުބޫރުވެ ވަޑައިގަތީ ކަމަށެވެ.
ބިހާރަކީ އިންޑިއާގެ އެހެން ސަރަހައްދުތަކާ އަޅާ ބަލާއިރުވެސް ފާޚާނާ އެންމެ މަދު އެއް ސަރަހައްދު ކަމަށާއި، ސާފު އިންޑިއާ ޕްރޮގްރާމްގައިވެސް އެންމެ ފަހަތުގައި އުޅޭ ސަރަހައްދު ކަމަށްވެސް ރިޕޯޓުތަކުގައި ވެއެވެ.
ބޮޑުވަޒީރު މޯދީގެ ސާފު އިންޑިއާ ކެމްޕޭން ލޯންޗު ކުރެއްވީ، 2014 ވަނަ އަހަރުގެ އޮކްޓޯބަރު މަހުގެ 2 ވަނަ ދުވަހުއެވެ. މި ކެމްޕޭންގެ ދަށުން މަގުމައްޗަށް ކުޑަގިފިލި ކުރުން ވަރަށް ބޮޑަށް އިންޑިއާގައިވަނީ ދައްކުރެވިފައެވެ. ކެމްޕޭން ފެށުމާއެކު، ބައެއް އަންހެން ކުދިން އަލަތު ކައިވެނި ކުރާނީވެސް ފާޚާނާ އެއް ހަދައިދިނުމުން ކަމަށް ބުނެފައިވާ ކަމަށް ވެއެވެ. ބައެއް ވިލެޖްތަކުގައި ރައްޔިތުން ޗަންދާ ނަގައިގެން އާއްމު ފާޚާނާތައްވެސް ވަނީ މި ކެމްޕޭންގެ ދަށުން ގާއިމް ކޮށްފައެވެ.
