އަމީނީ މަގުގައި ތާރު އަޅަން ބޭނުންވާ ތަކެތި ގެނެސްފި، މާޗްގައި ތާރު އަޅަން ފަށާނެ

އަމީނީ މަގު ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން, ތާރު އެޅުމަށް ބޭނުންވާ ހުރިހާ ސާމާނެއް މާލެއް ގެނެސްފައިވާކަމަށް، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ މެނޭޖިންގ ޑިރެކްޓަރު މޫސާ އަލީ މަނިކު (މޫކޭ) ވިދާޅުވެއްޖެއެވެ.

އަމީނީ މަގުގެ މަސައްކަތް ހުއްޓިފައިވާކަމަށް ބުނެ ސޯޝަލް މީޑިއާގައި ދެކެވޭ ވާހަކަތަކަށް ރައްދު ދެއްވައި އަންގާރަ ދުވަހު މޫކޭ ކުރެއްވި ޓްވީޓެއްގައި ވިދާޅުވީ، އަމީނީ މަގުގެ މަސައްކަތް ހުއްޓުމެއްނެތި ކުރިއަށްދާކަމަށެވެ. އަދި ތާރު އެޅުމަށް ބޭނުންވާ ތަކެތިވެސް ގެނެސްފައިވާކަމަށް ވިދާޅުވެ، އެ ތަކެތީގެ ފޮޓޯވެސް އޭނާ ވަނީ ހިއްސާ ކުރައްވާފައެވެ.

Advertisement

އާރްޑީސީން "ރާއްޖެ އެމްވީ"އަށް މައުލޫމާތު ދީފައިވާގޮތުގައި، ތާރު އެޅުމުގެ މަސައްކަތް އަންނަ މާޗް މަހުގެ މެދު ތެރޭގައި ނުވަތަ އޭޕްރިލް މަސް ފެށޭ ހިސާބު ފެށިގެންދާނެއެވެ. އެ މަސައްކަތް ކުރިއަށްގެންދާނީ މިހާރު ކުރިއަށްދާ މަސައްކަތްތައް ބިލަބޮންގ ހައި އިންޓަނޭޝަނަލް ސްކޫލާ ހަމައަށް ނިމުމުންނެވެ. އެއީ ކުރިންވެސް ޕްލޭންކޮށްފައި އޮތް ގޮތްކަމަށް، މީގެ ކުރިންވެސް އާރްޑީސީން ވަނީ ބުނެފައެވެ.

އާރްޑީސީން މިހާރު އަންނަނީ އަމީނީ މަގުގެ ދެ ސެގްމަންޓެއްގެ މަސައްކަތް ކުރަމުންނެވެ. ސެގްމަންޓު އެކެއްގައި ތާރު އެޅުން ފިޔަވައި އެހެން ހުރިހާ މަސައްކަތެއް މިހާރު ނިމިފައިވާއިރު، ސެގްމަންޓް ދޭއް އަދި ތިނެއްގެ 95 އިންސައްތަ މަސައްކަތް މިހާރު ނިމިފައިވާ ކަމަށްވެސް އެ ކުންފުނިން ބުނެއެވެ. އެގޮތުން، މި ދެ ސެގްމަންޓުގައި މިހާރު ކުރަމުން އަންނަނީ ތާރު އެޅުމުގެ ކުރިން ނިންމަން ޖެހޭ މަސައްކަތްތަކެވެ.

އަމީނީ މަގުގެ މަސައްކަތް ހުއްޓިފައިވާކަމަށްބުނެ، ތާރު ނާޅައި ފުރަތަމަ ސެގްމަންޓް ހުޅުވާލުމުން ބައެއް ފަރާތްތަކުން ވަނީ އާރުޑީސީއަށް ފާޑުކިޔާފައެވެ. ފުރަތަމަ ސެގްމަންޓް އާއްމުކޮށް ހުޅުވާލާފައިވަނީ، ވަކިވަކި ސެގްމަންޓުތައް ނިންމައި ތާރުއަޅާނަމަ އެސަރަހައްދު އެއްކޮށް ބަންދު ކުރުމުން ދުއްވާ ތަކެއްޗަށާއި އާއްމުންނަށް ދަތިވާނެތީ ކަމަށް އާރްޑީސީން ވަނީ ބުނެފައެވެ. އެގޮތުން، އަމީނީ މަގަކީ ކާރުބާރު ބޮޑު މަގަކަށްވާތީ، އެ މަގު ހަދާއިރު ކުދިކުދި ސެގްމަންޓްތަކުގެ މަސައްކަތް ނިންމައި، ތާރު އެޅުމުގެ މަސައްކަތް އޭގެ ފަހުން ކުރުމުން އާއްމުންނަށްވެސް އޭގެ ސަބަބުން ދަތިތަކާ ދިމާނުވާނެ ކަމަށް އެ ކުންފުނިން ބުންޏެވެ.

އަމީނީ މަގު ޒަމާނީ ފެންވަރަށް ތަރައްގީކޮށް، ތާރު އެޅުމުގެ އަމަލީ މަސައްކަތް އާރްޑީސީން ފެށީ 12 ސެޕްޓެމްބަރު 2022ގައެވެ. އެ މަސައްކަތް ކުރިއަށްދިޔައިރު އަމީނީ މަގަކީ ފެނާއި ނަރުދަމާގެ މައި ހޮޅިތަކުގެ އިތުރުން އެހެން ނެޓްވޯރކްތަކުގެވެސް މައި ހޮޅިތައް ވަޅުލާފައިވާ މަގަކަށްވުމުން، އެ މަގު ޒަމާނީ ފެންވަރަށް ތަރައްގީކުރަން ދަތިތައް ހުރިކަން އާރްޑީސީން ފާހަގަކުރިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އާރްޑީސީއާ މި މަސައްކަތް ހަވާލުކުރީ 84.4 މިލިއަން ރުފިޔާއަށެވެ.

މި މަޝްރޫއުގެ ދަށުން، އަމީނީމަގުގެ 1.7 ކިލޯމީޓަރުގެ ސަރަަހައްދެއްގައި ތާރު އެޅުމަށް ވަނީ ހަމަޖެހިފައެވެ. އަދި އެ މަގުގެ ފެން ހިންދާ ނިޒާމު ޑިޒައިންކޮށްފައިވަނީ އަމީނީމަގުގެ ދެފަރާތުންވެސް މަގު ނިމެންދެން އެއްކޮޅުން އަނެއް ކޮޅަށް ކާނު އަޅާ ގޮތަށެވެ. މަގުގައި ފެންބޮޑުވުމުގެ މައްސަލައަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައްވެސް ބަހައްޓާނެއެވެ.

މީގެ އިތުރުން، އިމާރާތްކުރުމުގެ މަސައްކަތްތައް ކުރަމުންދާއިރު ބޭރުކުރާ ފެނަށް ޚާއްސަ ޑީވޯޓަރިންގ ނެޓްވޯކް އަޅާނެއެވެ. މީގެ ސަބަބުން ދުވާރުމަތީގައި ހޮޅި އަޅައިގެން އިމާރާތްތަކުން ފެން ބޭރުކުރުން ނިމުމަކަށް އަންނާނެއެވެ.

އަމީނީމަގު ތަރައްގީކުރުމުގެ މަޝްރޫއުގައި، ނުކުޅެދުންތެރިކަން ހުންނަފަރާތްތަކަށް ހިނގާބިނގާވެ އުޅުމަށް ފަސޭހަވާނެ ގޮތަށް، ދުވާރުގައި ބްރެއިލް ބްލޮކް ޖެހުމާއި ވީލްޗެއަރ އެކްސެސް ގާއިމްކުރުން ހިމެނެއެވެ. އަދި ސްޓޭކް ހޯލްޑަރުންގެ ކޭބަލްތައް އެޅުމަށްޓަކައި ކޭބަލްޓްރޭ މަގުގެ ދެފަޅީގައި އެޅުމާއެކު، އެޗްވީ ކޭބަލަށް ޚާއްސަކޮށްގެން ޖަންގުޝަންތަކެއްވެސް ބަހައްޓާނެއެވެ.