މެންޗެސްޓަރ ޔުނައިޓެޑަށް ކުޅެމުން އަންނަ ޕޯޗުގަލްގެ މިޑްފީލްޑަރު ބްރޫނޯ ފެނާންޑޭޒްގެ ނަން ބޭނުންކޮށްގެން ކްރިސްޓިއާނޯ ރޮނާލްޑޯއާ ދިމާނުކުރުމަށް އޭނާ އެދެފި އެވެ.
ބްރޫނޯ އާއި ރޮނާލްޑޯ އަކީ ކުރިން ޔުނައިޓެޑަށް އެކުގައި ކުޅުނު ދެ ކުޅުންތެރިންނެވެ. ނަމަވެސް މި ފަހުން ރޮނާލްޑޯ ވަނީ ޔުނައިޓެޑު ދޫކޮށް ސައުދީ އަރަބިޔާގެ އަލް ނަސްރަށް ބަދަލުވެފަ އެވެ. އޭގެ ކުރިން ރޮނާލްޑޯ ޔުނައިޓެޑުގައި ހުރި އިރު ވެސް އެވާހަކަތައް މީޑިއާތަކުގައި ވަނީ ދައްކައިފަ އެވެ. އެގޮތުން ރޮނާލްޑޯ އައި ފަހުން ބްރޫނޯ އަށް އެންމެ އެކަށީގެންވާ މިންވަރަށް ނުކުޅެވޭ ކަމަށާއި، އޭގެ ކުރިން ބްރޫނޯ ވަރަށް މޮޅަށް ކުޅުނު ކަމަށް ބުނެފައިވެ އެވެ. ނަމަވެސް އެފަހަރުތަކުގައި ވެސް ބްރޫނޯ ވަނީ އެ ވާހަކަތަކަށް ރައްދު ދީފަ އެވެ. އޭނާ އޭރު ބުނީ ރޮނާލްޑޯ އައުމުގެ ސަބަބުން އޭނާގެ ކުޅުމަށް އެއްވެސް އަސަރެއް ކޮށްފައިވާ ކަމަށް ޤަބޫލު ނުކުރެވޭ ކަމަށެވެ.
މިފަހުން އެ ވާހަކަ އަނެއްކާ ވެސް ބޭރުގެ މީީޑިއާތަކުގައި ދައްކާފައި ވަނީ ބްރޫނޯ ބުނި ވާހަކައަކާ ގުޅުވައިގެންނެވެ. އިނގިރޭސި ޕްރިމިއާ ލީގުގައި ވާދަވެރި މެންޗެސްޓަރ ސިޓީގެ މައްޗަށް ޔުނައިޓެޑުން ކުރި ހޯދި މެޗަށްފަހު ވާހަަކަ ދައްކަމުން ބްރޫނޯ ބުނީ މިހާރު ޔުނައިޓެޑުން އަންނަނީ އެކުއެކީގައި ޓީމެއްގެ ގޮތުގައި ކުޅެމުން ކަމަށެވެ. ބައެއް މީޑިއާތަކުން ބުނީ ބްރޫނޯ އެ ދައްކަނީ ރޮނާލްޑޯގެ ވާހަކަ ކަމަށާއި، ރޮނާލްޑޯ ހުރި އިރު ޔުނައިޓެޑު ޓީމެއްގެ ގޮތުގައި އޮންނަން އުނދަގޫ ވާހަކަ ކަމަށެވެ. ނަމަވެސް އެކަމަށް ރައްދު ދީ ބްރޫނޯ ބުނީ، ޔުނައިޓެޑުން ރަނގަޅު ފޯމުގައި ކުރިއަށްދާ ތަން ފެނުމަކީ ބައެެއް މީހުންނަށް އުނދަގޫ ކަމެއް ކަމަށެވެ. ނަމަވެސް ބްރޫނޯ ބުނީ އޭނާގެ ނަން ބޭނުންކޮށްގެން ރޮނާލްޑޯއާ ދިމާ ނުކުރުމަށެވެ. އިތުރަށް އޭނާ ބުނީ ޔުނައިޓެޑުގެ ކުޅުންތެރިޔެއްގެ ގޮތުގައި ސީޒަންގެ މެދަކާ ހަމަ އަށް ރޮނާލްޑޯ ހުރި ކަމަށާއި، ކުރިން ވެސް އޭނާ އެ ވާހަކަތައް އެކި އިންޓަވިޔުތަކުގައި ދައްކާފައިވާނެ ކަމަށެވެ.
ސީޒަންގެ ކުރީ ކޮޅު ޔުނައިޓެޑުގެ ފަރާތުން ދަށް ކުޅުމެއް ފެނުނު ނަމަވެސް މިހާރު އެ ޓީމުން އަންނަނީ މޮޅަށް ކުޅެމުންނެވެ. އެންމެ ފަހުން ސިޓީ ބަލިކޮށް އެ ޓީމު ވަނީ ތާވަލްގެ ތިން ވަނަ އަށް ޖެހިލައިފަ އެވެ. ދެ ވަނައިގައި އޮތް ސިޓީ އާއި ޔުނައިޓެޑާ ދެމެދު އޮތީ ޕޮއިންޓެއްގެ ފަރަގެކެވެ.
