އަލިފުށީގެ ކަރަންޓަށް އަވަސް ހައްލެއް ލިބޭނެކަމުގެ އުއްމީދެއް ނެތް: ކައުންސިލް ރައީސް

ރ އަލިފުއްޓަށް ދިމާވާ ކަރަންޓުގެ މައްސަލައަށް އަވަސް ހައްލެއް ލިބޭނޭ ކަމުގެ އުއްމީދެއް އަދިވެސް ލިބިފައި ނުވާކަމަށް އެރަށު ކައުންސިލުން ބުނެފިއެވެ.

ރާއްޖެ އެމްވީއަށް މައުލޫމާތު ދެއްވަމުން އަލިފުށީ ކައުންސިލްގެ ރައީސް ޢަބްދުﷲ ރާޟީ ވިދާޅުވީ ރަށަށް ވަގުތީ ކަރަންޓް ދިނުމަށް ރަށުން ބޭރުން ގެނައި 200 ކިލޯވޯޓްގެ ޖަނަރޭޓަރަކާއި އެރަށުގައި ހުރި 400 ކިލޯވޯޓްގެ ޖަނަރޭޓަރަކާއި ގުޅުވައިގެން ރަށަށް ބޭނުންވާ ކަރަންޓް އުފެއްދޭތޯ ފެނައިކައިގެ ޓެކްނިކަލް ޓީމުން މަސައްކަތް ކުރަމުންދާ ކަމަށެވެ.

ރާޟީ ވިދާޅުވީ އެގޮތައް ކަރަންޓް ދިންނަމަވެސް ޕެނަލް ބޯޑުގެ މައްސަލައަކާހުރެ ލޯޑް ބޮޑުވެ ހޫނުވާތީ ގިނައިރު އެކަރަންޓް ނުހިފެެހެއްޓޭ ކަމަށެވެ. އެހެންކަމުން 24 ގަޑިއިރު ކަރަންޓް ދެވޭނެ ގޮތެއް އަދި ނެތްކަމަށް ޓެކްނިކަލް ބޭފުޅުން ވިދާޅުވާކަމަށް ރާޟީ ވިދާޅުވިއެވެ.

ކައުންސިލްގެ ރައީސް ވިދާޅުވީ އެބޭފުޅުން ވިދާޅުވާ ގޮތުގައި އަވަސް ހައްލެއް ލިބޭނެ ކަމުގެ އުއްމީދެއް ނެތްކަމަށާއި އިރުއިރުކޮޅުން ކަރަންޓް ކެނޑޭފަދަ ގޮތަކަށް ކަރަންޓް ދޫކުރަން ރައްޔިތުން ބޭނުން ނުވާތީ ކައުންސިލުން ރައްޔިތުންގެ އެދުމާ އެއްގޮތައް އެގޮތައް ކަރަންޓު ދޭން ބޭނުން ނުވާކަމަށް ނިންމާފައިވާ ކަމަށެވެ.

ރާޟީ ވިދާޅުވީ މިއީ ކުއްލިއަކަށް ދިމާވި މައްސަލައެއް ނޫން ކަމަށާއި މިކަމަށް ހައްލެއް ހޯދައިދިނުމަށް އެދޭތާ އެތައް ދުވަހެއް ވެއްޖެ ކަމަށެވެ. އަދި މިކަމަށް ދާއިމީ ހައްލެއް ލިބޭނީ 600 ކިލޯވޯޓް ޖަނަރޭޓަރގެ ރޭޑިއޭޓަރ ލިބިގެންކަމަށެވެ.

ފެނަކައިގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެފައިވަނީ ރޭޑިއޭޓަރ ލޯޑް ކުރެވޭނެ ކަމަށް މައުލޫމާތު ލިބިފައިވަނީ އަންނަމަހުގެ ކުރީކޮޅު ކަމަށެވެ. އެހެންކަމުން އަދި އެ ރޭޑިއޭޓަރ ރާއްޖެއަށް ގެނައުމަށް ދުވަސްކޮޅެއް ނަގާނެ ކަމަށެވެ.

މިވަގުތު އަލިފުށީގައި ހުންނެވި އެދާއިރާގެ ރައްޔިތުންގެ މަޖިލީހުގެ މެންބަރ މުހައްމަދު ރަޝީދު ރާއްޖެ ޓީވީއަށް ވިދާޅުވީ ރައްޔިތުން ތިބީ ވަރަށް ނިކަމެތި ހާލުގައި ކަމަށާއި ބުދަދުވަހުގެރޭ ކަރަންޓް ދިނަސް އިރުއެރުމާއެކު ކަރަންޓް ކަނޑާލަން ޖެހިފައިވާ ކަމަށެވެ.

ރަޝީދު ވިދާޅުވީ ރަށުގައި ކަރަންޓް ދެވޭނެ ގޮތެއް ނެތިގެން ރަށުން ބޭރުން ގެނައި އިންޖީނު އިންސްޓޯލް ކުރުމަށްޓަކައިވެސް ލައްކަ ކަންކަން ކުރަން ޖެހިފައިވާކަމަށާއި ފެނަކައިގެ ބޭފުޅުންނާއެކު ރަށުގެ ޒުވާނުންވެސް އެކަމުގައި ހަރަކާތްތެރިވާ ކަމަށެވެ. އަދި މިހާރު ދިމާވެގެން އުޅެނީ ޕެނަލް ބޯޑަށް ދިމާވެގެން އުޅޭ ކަމެއް ކަމަށާއި ފަހުން ގެނައި ޖަނަރޭޓަރާއި ރަށުގައި ހުރި ޖަނަރޭޓަރެއް ގުޅާލައިގެން ކަރަންޓު އުފެއްދުނު ނަމަވެސް ޕެނަލް ބޯޑުން އެކަރަންޓު ނުހިފަހައްޓާ ކަމަށެވެ.

އަލިފުށިން ކަރަންޓް ކެނޑި އެކަމަށް އެކަށޭނަ ހައްލެއް ނުލިބޭތާ މިހާރު ހަފްތާއެއް ވާން ކައިރިވާއިރު މިކަމަށް ދާއިމީ ހައްލެއް ލިބޭނެ ދުވަހެއް އަދި ވަނީ ނޭނގިއެވެ.