އައްޑޫ ސިޓީގެ މަރަދޫގައި ހުރި އާސާރީ ބިނާ އެއް ކަމަށްވާ ބޮނޑޮގެ، މުޅި އައްޑޫގެ ތާރީޚް އެއްތަނަކުން ފެންނަ ގޮތަށް ތަރައްޤީކޮށް ޒަމާނީ އާރޓް ގެލަރީ އެއް ހުޅުވައިފި އެވެ.

ހޮނިހިރު ދުވަހުގެ ރޭ ބޮނޑޮގެ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން، އައްޑޫ ސިޓީގެ މޭޔަރ އަލީ ނިޒާރު ވިދާޅުވީ، ބޮނޑޮގެ އަކީ އައްޑޫ ސިޓީގެ ތާރީޚާއި ވަރަށް ބޮޑަށް ގުޅިފައިވާ ބިނާ އެއް ކަމަށާއި އެގޮތުން މިއިމާރާތް އެކި އެކި ބޭނުންތަކުގައި މީގެ ކުރިންވެސް ބޭނުންފައި ހުރުމަށްފަހު، މިހާރު މިނިންމާލި މަސައްކަތަކީ މުޅި އައްޑޫގެ ތާރީޚް އެއްތަނަކުން ފެންނަން ހުންނާނެ ފަދަ ގޮތަކަށް، އާރޓް ގެލަރީއެއް ގޮތަށް މިއިމާރާތް ބަދަލުކޮށް އެކި ބޭނުންތަކަށް މިއިމާރާތް ބޭނުންކުރެވޭ ގޮތަށް ފަރުމާކޮށް ހުޅުވި މަންޒަރު ކަމަށެވެ.

އެގޮތުން އެންމެ ކުރީ ޒަމާނުގައި އައްޑޫގައި މީހުން ދިރިއުޅުނު ގޮތާއި، އަދި ދެވަނަ ބޮޑު ހަނގުރާމައިގެ ދުވަސްވަރު ކަންތައް ހިނގައިދިޔަ ގޮތް ފެންނަން ހުންނާނެ ގޮތަށް ފަރުމާ ކުރަމުންދާ ކަމަށާއި، ކުރެހުންތެރިންނާއި އަމިއްލަ އުފެއްދުންތައް އުފައްދާ ފަރާތްތަކަށްވެސް އެތަނުން ފުރުސަތު ލިބިގެންދާނެ ކަމަށް ނިޒާރު ވިދާޅުވިއެވެ.

އާރޓްގެލަރީ އެއް ގޮތަށް މިތަން ހުޅުވިއިރު، އައްޑޫ ސިޓީގެ ސްކޫލުތަކަށް ހުޅުވާލައިގެން، ކުރެހުމުގެ މުބާރާތެއް ވަނީ ބާއްވާފަ އެވެ.

އެގޮތުން ވަނަތަކަށް ހޮވުނު ކުރެހުންތަކަށް ފާއިސާ އިނާމާއި، ސެޓްފިކެޓް އަދި ޓްރޮފީ ދީފައިވާއިރު، މިކުރެހުންތައް އާރޓް ގެލަރީގައި ޑިސްޕްލޭކޮށްފައި ހުންނާނެ އެވެ.

މިމުބާރަތަށް ލިބުނު ތަރުހީބު ފާހަގަކޮށް ނިޒާރު ވިދާޅުވީ، ގިނަ އަދަދެއްގެ ކުރެހުންތައް ލިބިފައިވާ ކަމަށާއި މިއީ ނުހަނު އުފާވި ކަމެއް ކަމަށެވެ.

އިމާރާތަށް އިތުރު އެއްވެސް ބަދަލެއް ނުގެނެސް މާރާމާތުކޮށް އަލުން ހުޅުވާފައިވާއިރު، ބޮނޑޮގެ އަކީ ދެވަނަ ބޮޑު ހަނގުރާމައިގެ ބިނާއެކެވެ. އެދުވަސްވަރު އައްޑު އަތޮޅުގައި އޮތް އިނގިރޭސި ލަޝްކަރުގެ މުޢާސަލާތީ މަރުކަޒެއްގެ ގޮތުގައި ބޭނުންކުރުމަށް 1943 ވަނަ އަހަރު ބިނާކުރެވުނު އިމާރާތެކެވެ. ވޭދުވެދިޔަ ދިގު މުއްދަތުގައި ބޮނޑޮގެ ވަނީ ތަފާތު ކަންކަމުގައި ބޭނުންކުރެވިފައެވެ.

1950 އިން 1957 އަށް މަރަދޫ ރައްޔިތުންގެ މަދްރަސާ 'މަދްރަސަތުލް އަފީފިއްޔާ" ހިންގުނެއެވެ. 1959 ޖެނުއަރީ 1 އިން 1963 ސެޕްޓެމްބަރ 24 އައްޑު އަތޮޅުގައި ހިންގިނި އައްދައުލަތުލް ސުވާދީބިއްޔާގެ ފަރާތުން އޭޓީސީ (އައްޑު ޓްރޭޑިން ކޯޕަރޭޝަން) މިނަމުގައި ވިޔަފާރި މަރުކަޒެއް ހިންގުނެއެވެ.

1964 އޮގަސްޓް 2 ގައި ހިތަދޫ އާރްއެފް ހުސައިން ޖަގަޑާގެ ނަމުގައި ހިންގި ދެކޮޅުވެރި ހަރަކާތުގައި ކުށްވެރިން ބަންދުކުރީ ބޮނޑޮގޭގައެވެ. 1964 އިން 1 ޖޫން 1966އަށް މަރަދޫ އޮފީސް ވަގުތީ ގޮތުން ހިންގުނެއެވެ. 16 މާރޗް 1975 އިން 1979 އަށް މަސްޓް ކްލަބް (މަރަދޫ ޔުނައިޑެޓް ސްޕޯޓްސް ޓްރެއިނިން) ހިންގުނެއެވެ. ޓްރޮޕިކާ މިނަމުގައި ރަޖިސްޓްރީ ކޮށްގެން ހިންގި ބޭންޑްގެ ފަރިތަ ކުރުން ބޭއްވުނުއެވެ. އަދި މަރަދޫ މަދްރަސަތުލް އިމްދާދިއްޔާ ވަގުތީ ގޮތުން ހިންގުނެއެވެ. އެސްޓީއޯގެ ފަރާތުން ސިނަމާއެއްވެސް ހިންގާފައިވެއެވެ. އެއީ 7 އޮކްޓޯބަރ 1982 އިން ފެށިގެން އެސްޓޯއީން ދޫކުރީ 7 ޖުލައި 1993 ގައެވެ.

އައްޑޫ ސިޓީ ކައުންސިލުން 2015 ވަނަ އަހަރު މިއިމާރަތަކީ އާސާރީ ތަނެއްގެ ގޮތުގައި ކަނޑއަޅައި އިމާރާތް އާބާތުރަ ފިލުވުމަށްފަހު ހުޅުވީ 2016 ނޮވެމްބަރު 11 ގައެވެ.

މީގެ އިތުރުން މަރަދޫ އޭޕީއެސް ޕްރީ ސްކޫލް ހިންގުމާއި، ސިނަމާއެއްގެ ގޮތުއި ވެސް މިތަން ބޭނުންކޮށްފައިވެއެވެ.

އެކި ގޮތްގޮތުން އައްޑޫއަށް ޒިޔާރަތްކުރާ ފަރާތްތަކުންނާއި، ފަތުރުވެރިންގެ މެދުގައި މަގްބޫލު ތަނެކެވެ.