ލިވަޕޫލްގެ ނަތީޖާއާމެދު ކްލޮޕްގެ ކަންބޮޑުވުން އިންތިހާ އަށް

އިނގިރޭސި ޕްރިމިއާ ލީގުގައި ބްރައިޓަން އަތުން ބަލިވުމުން އެކަމުގެ ކަންބޮޑުވުން އިންތިހާ އަށް އޮތް ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.

ލީގުގައި ބްރައިޓަން އަތުން ލިވަޕޫލް ބަލިވީ 3-0 އިންނެވެ. މެޗަށްފަހު ކްލޮޕް ބުނީ ލިވަޕޫލްގެ ނަތީޖާ އަކީ ވަރަށް ވަރަށް ގޯސް ނަތީޖާއެއް ކަމަށެވެ. އަދި އެމެޗަށްވުރެ ލިވަޕޫލްގެ ކުޅުން ދަށްކޮށް ދިޔަ އެހެން މެޗެއް ހަނދާން ނުހުންނަ ކަމަށެވެ. ކްލޮޕް ބުނީ ފަހަރުގައި މެޗަކީ އުނދަގޫ މެޗަކަށް ނުވެދާނެ ކަމަށެވެ. ނަމަވެސް ބްރައިޓަން އަކީ މޮޅު ޓީމެއް ކަމަށާއި، މެޗުގައި އެ ޓީމުން ކުޅުނީ ވަރަށް ރަނގަޅަށް ކަމަށެވެ. އެހެންކަމުން ބްރައިޓަން އަށް އެ މެޗުން މޮޅެއް ހައްގު ކަމަށް އޭނާ ދެކޭ ކަމަށެވެ. މީގެ އިތުރުން ކްލޮޕް ބުނީ މެޗުގައި ފެނުނީ ވަރަށް ބޮޑަށް ރޭވުންތެރިކަމާއެކު ކުޅެމުން ދިޔަ ޓީމަކާއި، އެއްވެސް ރޭވުންތެރިކަމެއް ނެތި ކުޅެމުން ދިޔަ ޓީމެއް ކަމަށެވެ. ހަމައެއާއެކު ލިވަޕޫލަށް ބޯޅަ ނުހިފެއްޓޭ ކަމަަށާއި، އިދިކޮޅު ޓީމަށް ނުރައްކާ ކުރެވޭ މިންވަރަށް ނުކުޅެވުނު ކަމަށެވެ.

އިތުރަށް ވާހަކަ ދައްކަމުން ކްލޮޕް ބުނީ މެޗުގައި ބްރައިޓަން ކުޅުނީ މާ ބޮޑު އިތުބާރަކާއެކު ކަމަށާއި، ލިވަޕޫލުން ކަންތައް ކުރީ އޭގެ އިދިކޮޅަށް ކަމަށެވެ. އޭނާ ބުނީ މެޗުގައި ދެއްކި ކުޅުމުން ބްރައިޓަންގެ ކުޅުންތެރިން ފެންނަނީ ވަރަށް އުފާވެރިކޮށް ކަމަށާއި، މެޗުގެ ގިނަ ވަގުތުތަކުގައި ލިވަޕޫލަށް މާ ފަސޭހަކޮށްލެވުނު ކަމަށެވެ. އަދި މެޗުގައި ޓީމު ކުޅެމުން ދިޔަ ފޯމޭޝަން ބަދަލުކުރުމަށް ވެސް ވިސްނުން ގެންގުޅުނު ކަމަށާއި، އޭގެން ޓީމަށް ކޮންމެވެސް ވަރެއްގެ ފައިދާއެއް ލިބޭނެ ކަމަށެވެ. އެ ޚިލާޔު ގެންގުޅުނު ނަމަވެސް އެކަން އެންމެ ފުރިހަމަ އަށް މަސައްކަތް ނުކުރިކަން ފާހަގަކޮށް ކްލޮޕް ބުނީ، ލިވަޕޫލަށް އެއަށްވުރެ ރަނގަޅަށް ކުޅެވެން ޖެހޭނެ ކަމަށެވެ.

ލީގު ތާވަލްގައި ލިވަޕޫލް އޮތީ ނުވަ ވަނަ މަގާމުގަ އެވެ. އެއީ މިހާތަނަށް ކުޅުނު 18 މެޗުން 28 ޕޮއިންޓާއެކު އެވެ. ލީގުގައި މިހާތަނަށް ލިވަޕޫލް ވަނީ އަށް މެޗުންނެވެ. ހަތަރު މެޗެއް އެއްވަރުވެފައިވާއިރު، ހަ މެޗުން އެ ޓީމު ވަނީ ބަލިވެފަ އެވެ.