130 ކިލޯ ޑްރަގް މައްސަލަ: ޝަހީބުގެ މައްޗަށް ކުރާ ދައުވާގެ ޝަރީއަތް ފަށައި، މެއި މަހަށް މައްސަލަ ނިންމަނީ

130 ކިލޯގެ މަސްތުވާތަކެތީގެ މައްސަލައިގައި ދައުލަތުން އުފުލާފައިވާ ދައުވާތަކުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

130 ކިލޯ ޑްރަގް މައްސަލައިގައި އިސްކޮށް އުޅުނުކަމުގެ ތުހުމަތުކޮށް، އެކަމާއި ގުޅޭ ދައުވާ އުފުލާފައިވާ އެއް ފަރާތަކީ ގއ. ވިލިނގިލި، ލައިޓްހައުސް، ޝަހީބް އިބްރާހިމްއެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލްއެވެ.

މި މައްސަލައިގައި މީގެ ކުރިން ދައުވާލިބެ ފަރާތުންނާއި ދިފާއުން ވަނީ ޝަރީއަތުގެ ކުރީގެ ހުށަހެޅުންތައް ހުށަހަޅާފައެވެ. އަދިއްތަ ދުވަހުގެ އަޑުއެހުމަކީ މި މައްސަލައިގެ ޝަރީއަތުގެ ކުރީގެ ހުށަހެޅުންތަކަށް ގޮތް ނިންމުމަށް ބޭއްވި އަޑުއެހުމެކެވެ.

ޝަހީބުގެ މައްޗަށް ކުރާ ދައުވާއާ ގުޅިގެން ދައުލަތުން ހުށަހަޅާފައިވަނީ އެންމެ ހުށަހެޅުމެކެވެ. އެއީ އޭނާގެ ފަރާތުން ހުށަހަޅާފައިވާ ދިފާއީ ހެކިން ބަލައިނުގަތުމަށް އެދި ހުށަހަޅާފައިވާ ހުށަހެޅުމެކެވެ.

ޝަހީބުގެ ފަރާތުން ހުށަހަޅާފައިވަނީ ޙާދިސާ ހިނގި ތަނުގައި ނެތްކަމުގެ ދިފާއުކަމަށް ދައުލަތުން ބުނެއެވެ. ދައުލަތުގެ ވަކީލު ވިދާޅުވާ ގޮތުގައި އެ ދިފާއު ނަގާނަމަ، ތަޙުޤީޤު މަރުޙަލާގައި އެ މައުލޫމާތު ދުރާލާ ފޯރުކޮށްދޭން ޖެހޭކަމަށް ޖިނާއީ އިޖުރާއަތުގެ ޤާނޫނުގެ 122 ވަނަ މާއްދާއިން ލާޒިމު ކުރެއެވެ.

އެގޮތަށް އެ މައުލޫމާތު ހާމަ ކުރުމުން އޭނާ ދައްކާ ވާހަކައިގެ ޙަޤީޤަތް ތަޙުޤީޤު މަރުޙަލާގައި ބެލުމުގެ ފުރުސަތު އޮންނަކަން ފާހަގަ ކުރައްވައި ދައުލަތުގެ ވަކީލު ވިދާޅުވީ، މި މައްސަލައިގައި ޝަހީބުގެ ފަރާތުން އެފަދަ އެއްވެސް ކަމެއް ތަޙުޤީޤުގައި ފާހަގަ ކޮށްފައިނުވާ ކަމަށެވެ.

އިސްގާޒީ ޝަކީލު ވަނީ ދައުލަތުގެ އެ ހުށަހެޅުން ބަލައިގަތުމަށް ނިންމަވާފައެވެ.

މި މައްސަލައިގައި ޝަހީބު އިބްރާހިމްގެ ފަރާތުން ހުށަހަޅާފައިވާ ހުށަހެޅުންތަކަށް ބަލާއިރު، ދައުލަތުގެ ހެކިތަކުގެ ތެރެއިން ބައެއް ހެކިތައް ޝަރީއަތަށް ބަލައިނުގަތުމަށް އެދިފައިވެއެވެ. ސަބަބެއްގެ ގޮތުގައި ބަޔާންކޮށްފައިވަނީ އެއީ ޝަހީބް އިބްރާހިމްއާ ސީދާ ގުޅުމެއް އޮތް ހެކިތަކެއް ނޫން ކަމަށެވެ.

އެހެންނަމަވެސް ހައިކޯޓުން ނިންމާފައިވާ ނިންމުމަކާ ޙަވާލާދެއްވައި އިސްގާޒީ ޝަކީލު ވަނީ، އެ ހުށަހެޅުން ބަލައިނުގަތުމަށް ނިންމަވާފައެވެ.

ދެވަނަ ހުށަހެޅުމެއްގެ ގޮތުގައި ޝަހީބު އިބްރާހިމް ހުށަހަޅާފައިވަނީ މި މައްސަލައިގައި ދައުވާލިބޭ އެހެން ފަރާތްތަކުގެ ބަޔާންތައް ޝަރީއަތަށް ބަލައިނުގަތުމަށް އެދި ހުށަހަޅާފައިވާ ހުށަހެޅުމެކެވެ. އެހެންނަމަވެސް، ދައުލަތުގެ ފަރާތުން އެ ބަޔާންތަަކަށް ބާރު ލިބިދޭ އިތުރު ހެކިތައް ހުށަހަޅާފައިވާކަން ފާހަގަ ކުރައްވައި އިސްގާޒީ ޝަކީލު ވަނީ އެ ހުށަހެޅުންވެސް ބަލައިނުގަތުމަށް ނިންމަވާފައެވެ.

ތިންވަނަ ހުށަހެޅުމެއްގެ ގޮތުގައި ޝަހީބުގެ ފަރާތުން ހުށަހަޅާފައިވާ ހުށަހެޅުމަކީ މި މައްސަލައަކީ މައުޟޫއީ ގޮތުން ކުރިއަށް ގެންދެވޭނެ މައްސަލައެއް ނޫންކަމަށެވެ. އެގޮތުން މި މައްސަލައިގައި ޝަހީބުއާ ދެކޮޅަށް ހުށަހެޅިފައިވާ ހެކިތަކަށް ބަލާއިރު، މިއީ އެކަށީގެންވާ ތަހުގީގެއް ކުރިއަށް ގެންގޮސްފައިވާ މައްސަލައެއް ނޫންކަމަށް ވިދާޅުވެ، މި މައްސަލައަކީ ޝަރީއަތެއް ކުރެވޭނެ މައްސަލައެއް ނޫންކަމަށް ކަނޑައަޅުއްވައިދެއްވުމަށް ވަނީ ހުށަހަޅާފައެވެ.

ނަމަވެސް އެ ހުށަހެޅުންވެސް ބަލައިގަނެވޭނެ ފަދަ ޤާނޫނީ އަސާސެއް އޭނާގެ ފަރާތުން ދެއްކިފައި ނުވާތީ އެ ހުށަހެޅުން ބަލައިގެންފައެއް ނުވެއެވެ.

އިސްގާޒީ ވަނީ މި މައްސަލައަކީ މައުޟޫއީ ގޮތުން ކުރިއަށް ގެންދެވޭނެ އަޑުއެހުމެއްކަމަށް ނިންމަވައި، ދެން އޮންނާނީ ޝަރީއަތް ފަށައި އިފްތިތާހީ ބަޔާން އިއްވުންކަން ފާހަގަ ކުރައްވާފައެވެ. އެގޮތުން އިފްތިތާހީ ބަޔާން ކުރިއަށް ގެންދިއުން އޮންނާނީ 25 ޖެނުއަރީގައެވެ.

އިސްގާޒީ ވިދާޅުވީ، މި މައްސަލައިގެ ހެކިބަސް ނެގުމުގެ އަޑުއެހުންތައް ފެބްރުއަރީ މަހު ފައްޓަވާނެ ކަމަށެވެ. މިއީ ގިނަ ހެކިތަކެއް ހިމެނޭ މައްސަލައަކަށްވާތީ، ދެ ދަންފަޅިއަކަށް ހެކިބަސް ނެގުން ކުރިއަށް ގެންދަވާނެކަމަށް އިސްގާޒީ ވިދާޅުވިއެވެ.

ހެކިބަސް ނެގުން ކުރިއަށް ގެންދަވާނީ ދައުވާލިބޭ ފަރާތްތައް އެކުއެކީގައެވެ.

އިސްގާޒީ ވިދާޅުވާ ގޮތުގައި މި މައްސަލައިގެ ޚުލާސާ ބަޔާން އިއްވުން ކުރިއަށް ގެންދެވޭނެކަމަށް ބެލެވެނީ އޭޕްރީލް 27 ގައެވެ. އެއަށްފަހު، ޙުކުމް ކުރެއްވުން މެއި މަހުގެ 25 ވަނަ ދުވަހުގެ މެންދުރު 13:00 ގައި އޮންނާނެކަމަށް ލަފާ ކުރައްވާފައިވެއެވެ.