އަށާރަ ސަތޭކައިގެ އަހަރުތަކުގެ ރިހި ފައިސާ ފޮތިތަކެއް ސަލްޓަން ޕާކުން ފެނިއްޖެ
29 ޖޫން 2017 | ބުރާސްފަތި 11:03ފައިސާ ފޮތިތަކަކީ 1835 ވަނަ އަހަރުގެ އީސްޓް އިންޑިއާ ކުންފުޏަށް ނިސްބަތްވާ ފައިސާ ފޮތިތަކެއް
ސަލްޓަން ޕާކް މަސައްކަތުގައި ސިފައިން ހަރަކާތްތެރިވަނީ -- ފޮޓޯ:ހައުސިންގް މިނިސްޓްރީ
ސަލްޓަން ޕާކް ކޮނުނުއިރު، އަށާރަ ސަތޭކައިގެ އަހަރުތަކުގެ ރިހި ފައިސާ ފޮތިތަކެއް ފެނިފައިވާ ކަމަށް ހެރިޓޭޖް ޑިޕާޓްމަންޓުން ބުނެފި އެވެ.
ހެރިޓޭޖް ޑިޕާޓްމަންޓްގެ މީޑިއާ އޮފިޝަލް ހަސަން މުޙައްމަދު ވިދާޅުވީ ރިހި ފައިސާ ފޮތިތައް ފެނިފައިވަނީ އެމްއެންޑީއެފްގެ ފަރާތުން ސަލްޓަންޕާކު ކޮނުމުގެ މަސައްކަތުގެ ތެރެއިން ކަމަށާއި އަދި މި ރިހި ފައިސާ ފޮތިތައް އެމްއެންޑީއެފްގެ ފަރާތުން މިހާރު ހެރިޓޭޖް ޑިޕާޓްމަންޓާ ހަވާލުކޮށްފައިވާ ކަމަށެވެ.
މި ފައިސާ ފޮތިތަކަކީ 1835 ވަނަ އަހަރުގެ އީސްޓް އިންޑިއާ ކުންފުޏަށް ނިސްބަތްވާ ފައިސާ ފޮތިތަކެއްކަމަށް ހަސަން ވިދާޅުވިއެވެ.ނަމަވެސް ފެނިފައިވަނީ ކިހާ އަދަދެއްގެ ރިހި ފައިސާ ފޮތިކަމެއް އޭނާ ވިދާޅެއް ނުވެ އެވެ. މި ރިހި ފައިސާ ފޮތިތަކާއި ބެހޭގޮތުން އިތުރު ދިރާސާތަކެއް ކުރަމުން ދާތީ، މި ރިހި ފައިސާ ފޮތިތައް އާއްމުންނަށް ފެންނަގޮތަށް ބެހެއްޓުމާމެދު ވަކި ގޮތެއް ނުނިންމާކަމަށްވެސް އޭނާ ވިދާޅުވިއެވެ.
ރިހި ފައިސާ ފޮތިތަކާ ބެހޭގޮތުން ޔުމްނާ މައުމޫން ބުރާސްފަތި ދުވަހު ކުރެއްވި ޓްވީޓެއްގައި ވިދާޅުވީ ސަލްޓަންޕާކު ކޮނެގެން ބައެއް އާސާރީތަކެތި ފެންނަ ވާހަކަ އަޑުއިވޭ ކަމަށެވެ. މިފަދަ އެއްޗެހި ފެންނަކަމުގެ މައުލޫމާތާއި، އެއްޗިސްއަށް ހަދާ ގޮތުގެ މައުލޫމާތު ހެރިޓޭޖް ޑިޕާޓްމަންޓުން ރައްޔިތުންނަށް އޮޅުންފިލުވައިދޭން ޖެހޭނެކަމަށެވެ.
މާލޭގައި ހުރި ތާރީހީ މިސްކިތެއް ކަމުގައިވާ، ކަޅުވަކަރު މިސްކިތް ވެސް ސަރުކާރުން ވަނީ ނަގައިފަ އެވެ. އެ މިސްކިތް ގދ. ތިނަދުއަށް ބަދަލުކުރަން ނިންމާފައި އޮތަސް މިހާތަނަށް މިސްކިތް ބަދަލުކުރަން މަސައްކަތެއް ނުކުރެ އެވެ.
މިހާރު ވެސް އަލިރަސްގެފާނު ޒިޔާރަތް ކޮންނަމުންދާއިރު، އެ ތަން ކޮންނަނީ ޕަމްޕް ސްޓޭޝަނެއް ގާއިމުކުރަން ކަމަށް ހައުސިން މިނިސްޓްރީން ވަނީ ބުނެފަ އެވެ.
