އެއަރ އިންޑިއާ ޕްރައިވެޓައިޒް ކުރުމަށް އިންޑިޔާގެ ކެބިނެޓުން ނިންމައިފި

އިންޑިއާގެ ގައުމީ އެއަރލައިން "އެއަރ އިންޑިއާ" ޕްރައިވެޓް ކުރުމަށް އެގައުމުގެ ކެބިނެޓުން ނިންމައިފިއެވެ.

އިންޑިއާގެ ފިނޭންސް މިނިސްޓަރު އަރުން ޖެއިޓްލީ ބުދަ ދުވަހު ވިދާޅުވީ ޕްރައިވެޓައިޒް ކުރުމަށް ކުންފުނި އޮތީ ވަރަށް ބޮޑަށް ތައްޔާރުވެފައި ކަމަށާއި މިކަމުގެ މައުލޫމާތު ހިއްސާކުރަމުންގެންދާ ކަމަށެވެ.

އިންޑިއާގެ ގައުމީ އެއަރލައިންގެ ގޮތުގައި އެއަރ އިންޑިއާ އޮތުމަށް ފަހު ޕްރައިވެޓައިޒް ކުރާއިރު ޓާޓާ ގުރޫޕުންނާއި ސިންގަޕޯ އެއަރލައިންސްއިން ހިއްސާ ގަންނާނެ ކަމަށް ރިޕޯޓްތައް ބުނެއެވެ.

އެއަރ އިންޑިއާ ޕްރައިވެޓައިޒް ކުރުމަށް އެގައުމުން ނިންމީ ކުންފުނީގައި އޮތް ދަރަނި އަދާކުރުމާއި އެހެން ބޮޑެތި ކުންފުނިތަކުގެ ބައިވެރިވުމާ އެކު އިތުރަށް ހިދުމަތްތައް ފުޅާކޮށްގެން ހިދުމަތް ދިނުމަށެވެ. މީގެ އިތުރުނ އެއާލައިނަށް ބޮޑެތި ގެއްލުންތަކެއް ވުމަކީ ވެސް ޕްރައިވަޓައިޒްކުރުމަށް ނިންމި ސަބަބެކެވެ. އެގޮތުން އެއަރ އިންޑިޔާ ފާއިތުވި 10 އަހަރު ދުވަހުގެ ތެރޭގައި ވެސް ހިނގަމުން އައިސްފައި ވަނީ 52،000 ކްރޯރްގެ ގެއްލުމާ އެކުގައެވެ.

އެގޮތުން ކުންފުނީގެ ހިއްސާދާރުންގެ ގޮތުގައި އަންނަ އެހެން ކުންފުނިތަކަށް ހިއްސާ ވިއްކާނީ އެއްވަރަކަށް ކަމަށް އިންޑިޔާގެ ޔޫނިއަން ކެބިނެޓުން ވަނީ ނިންމާފައެވެ.

މިހާރު ވެސް އާންމު ހިއްސާދާރުންގެ 17 އިންސައްތައާ އެކީ ހިންގަމުން އަންނަ އެއާ އިންޑިއާއަކީ އެގައުމުގެ އެންމެ ބޮޑު އެއާލައިނެވެ. އެގޮތުން 1953 ވަނަ އަހަރު އުފެއްދި އެއާލައިން 140 ފްލައިޓާއެކު އެތެރޭގެ 72 މަންޒިލަކަށް ދަތުރުކުރާއިރު ބައިނަލްއަޤްވާމީ 41 މަންޒިލަކަށް ދަތުރުކުރެއެވެ.

އެއަރ އިންޑިއާ ގައުމީ އެއަލައިނަކަށް ބަދަލުކުރި އިރު ކުރިން އެކުންފުނި ހިނގަމުން އައީ ޓާޓާ ގުރޫޕުންނެވެ.

އެހެން ކަމުން އެއަރ އިންޑިއާގެ ކުންފުނި ޕްރައިވެޓައިޒްކުރުމަށް ހުޅުވާލަން ނިންމުމާ އެކު އެކުންފުނީގެ ހިއްސާދާރަކަށް ވުމުގެ ޝައުގުވެރިކަން ޓާޓާ ގުރޫޕުން ވަނީ ފާޅުކޮށްފައެވެ.