މަޝްރޫއުތަކުގެ މޮނިޓަރިން ރިޕޯޓް ހުށަނާޅާ ނަމަ އީޕީއޭ އިން ފިޔަވަޅު އަޅަނީ

މަޝްރޫއުތައް ހިނގަމުންދާ އިރު އެ މަޝްރޫޢުތަކުގެ ސަބަބުން ވެއްޓަށް އަންނަމުންދާ ބަދަލުތައް ދެނެގަތުމުގެ ރިޕޯޓް، ނުވަތަ މޮނިޓަރިން ރިޕޯޓް ހުށަނާޅާ ނަމަ އެފަދަ ކުންފުނިތަކާމެދު ފިޔަވަޅު އަޅާނެ ކަަމަށް އެންވަޔަރަންމެންޓަލް ޕްރޮޓެކްޝަން އެޖެންސީ، އީޕީއޭއިން ބުނެފިއެވެ.

އީޕީއޭ އިން ބުނީ އެ ފިޔަވަޅުތައް އެޅުމަށް ހަމަޖެހިފައި ވަނީ 1 ޖަނަވަރީއިން ފެށިގެން ކަމަށެވެ. މީގެ އިތުރުން އީޕީއޭއިން ވަނީ މަޝްރޫއުތައް ހިންގާ ގިނަ ފަރާތްތަކުން މޮނިޓަރިން ރިޕޯޓް ހުށައަޅަމުން ނުދާތީ އެކަމުގެ ކަންބޮޑުވުން ފާޅުކޮށްފައެވެ. އެ އިދާރާ އިން އެކަން ފާހަގަކޮށް ނެރުނު ނޫސްބަޔާނެއްގައި ބުނެފައި ވަނީ ރާއްޖޭގައި މަޝްރޫއުތަށް ހިންގާ ބައެއް ފަރާތްތަކުން ތިމާވެށީގޮތުން ނިންމާ ނިންމުންތައް ލިޔުމުގައި ބަޔާންކުރާ ގޮތަށް އެއްބަސްވެގެން މަޝްރޫއުގެ މަސައްކަތް ފެށި ނަމަވެސް، މަޝްރޫޢު ފެށި ތާރީޚް އީޕީއޭއަށް އަންގަމުން ނުދާ ކަމަށެވެ.

އީޕީއޭއިން ބުނީ ޑިއުޑިލިޖަންސް ރިޕޯޓް ހެދުމުގެ ގޮތުން ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނާއި އެގާނޫނުގެ ދަށުން އީޕީއޭއިން ތަންފީޒް ކުރަމުންދާ ޤަވާއިދުގެ ދަށުން ނަގަންޖެހޭ ހުއްދަތައް ހޯދަން އެ އިދާރާގެ ކިބައިން އެދޭ ކަމަށެވެ. އަދި އެފަދަ ހުއްދަތަކާއި ގުޅުން ހުރި މަޢުލޫމާތާއި، އެ ހުއްދަތަކާ ޚިލާފަށް ކޮށްފައިވާ ކަންތައްތަކާއި، އީޕީއޭއިން އަޅާފައިވާ ފިޔަވަޅުތަކުގެ އިތުރުން މިފަދަ މައުލޫމާތު ހޯދަން ވެސް އެދެމުންދާ ކަމަށެވެ.

އެހެންކަމުން 2023 ވަނަ އަހަރުގެ ޖެނުއަރީ މަހުގެ 1 އިން ފެށިގެން މޮނިޓަރިން ރިޕޯޓް ހުށަނާޅާ ނަމަ ޑިއުޑިލިޖަންސް ރިޕޯޓްގެ ބޭނުމަށް އެއެޖެންސީ ހޯދުމަށް އެދޭ މަޢުލޫމާތުގައި އެކަން ބަޔާންކުރާނެ ކަމަށްވެސް އީޕީއޭއިން ވަނީ ބުނެފައެވެ. ހަމައެހެންމެ ޝެޑިއުލް އާއި އެއްގޮތަށް މޮނިޓަރިން ރިޕޯޓް ހުށަހަޅަމުން ނުދާ ފަރާއްތަކުން އެ ރިޕޯޓްތަށް ޝެޑިއުލް އާއި އެއްގޮތަށް ހުށަހަޅަމުން ގެންދިޔުމަށް އީޕީއޭ އިން ވަނީ އިލްތިމާސްކޮށްފައެވެ.