ނީލަން ފިހާރާގައި ރޯވި ހާދިސާގައި ހާލުގައި ޖެހުނު ބިދޭސީންގެ ހާލު ވަރަށް ގާތުން އެބަ ބަލަން - އެޗްއާރުސީއެމް
މި ހާދިސާގައި ރޯވި ލޭބަރ ކުއާޓަރތަކުން 299ށްވުރެ ގިނަ މީހުންނަށް ވަނީ ރައްކާތެރި ބޯހިޔާވަހިކަން ހޯދައިދީފައި
ނީލަން ފިހާރަތައް ހުންނަ ސަރަޙައްދުގައި ހިނގި އަލިފާނުގެ ހާދިސާ
މިދިޔަ ހޯމަ ދުވަހު ފަތިހު، ނީލަން ފިހާރާގައި ރޯވި ހާދިސާގައި ހާލުގައި ޖެހުނު ބިދޭސީންގެ ހާލު ވަރަށް ގާތުން ބަލަމުންދާކަމަށް، ރާއްޖޭގެ ހިއުމަން ރައިޓްސް ކޮމިޝަން (އެޗްއާރްސީއެމް)އިން ބުނެފިއެވެ.
އެޗްއާރްސީއެމްއިން ނެރުނު ނޫސްބަޔާނެއްގައި ބުނެފައިވަނީ، އެ ހާދިސާ ހިނގުމާއެކު އެ އިދާރާގެ ރެޕިޑް ރެސްޕޮންސް ޓީމުން، އެ ހާދިސާގައި ގެއްލުން ލިބުނު ފަރާތްތަކަށް ވަގުތީ ބޯހިޔާވަހިކަން ފޯރުކޮށްދީފައިވާ ތަން ކަމަށްވާ އިމާދުއްދީން ސްކޫލަށް ޒިޔާރަތްކޮށް، އެތަނުގެ ހާލަތު ބަލާފައިވާކަމަށެވެ. މީގެ އިތުރުން، ސިޓީ ކައުންސިލްގެ އެކޮމޮޑޭޝަން ބްލޮކްގައި ރޯވުމުން ހާލުގައި ޖެހުނު ބިދޭސީން ބައިތިއްބާފައިވާ ކޮވިޑް ފެސިލިޓީގެ ހާލަތުވެސް ބަލާކަމަށާއި، ކަމާބެހޭ އިދާރާތަކުން މައުލޫމާތު ސާފުކޮށްފައިވާކަމަށް އެޗްއާރްސީއެމްއިން ވަނީ ބުނެފައެވެ. އެ ބިދޭސީންގެ ފެނާއި ކެއުމާއި އަދި ފާޚާނާކުރުންފަދަ ޒަރޫރީ ބޭނުންތަކަށް ހަމަޖެހިފައިވާ އިންތިޒާމްތައް ވަރަށް ގާތުން ބަލަމުންދާކަން އެ ކޮމިޝަނުން ވަނީ ފާހަގަކޮށްފައެވެ. އަދި ކަމާާބެހޭ އިދާރާތަކުން އެކަމަށްޓަކާ ހަމަޖައްސާފައި ހުރި އިންތިޒާމްތައް ރަނގަޅު ކަމަށްވެސް އެ ކޮމިޝަނުން ވަނީ ބުނެފައެވެ.
އެޗްއާރްސީއެމްއިން ބުނީ ރާއްޖޭގެ ގާނޫނުއަސާސީއާ އެއްގޮތަށް ބިދޭސީންނަސް ލިބިގެންވާ ހައްގުތައް ލިބޭކަން ކަށަވަރުކުރުމަށް އެ ކޮމިޝަނުން ކެނޑިނޭޅި މަސައްކަތްކުރަމުންދާ ކަމަށެވެ.
ނީލަން ފިހާރާގައި ރޯވި އަލިފާންގަނޑު ފެތުރި، ސިޓީ ކައުންސިލްގެ އެކޮމޮޑޭޝަން ބްލޮކްގައި ވަނީ ރޯވެފައެވެ. ނޭޝަނަން ޑިޒާސްޓަރ މެނޭޖްމަންޓް އޮތޯރިޓީއާއި ސިޓީ ކައުންސިލާއި ދިވެހި ރެޑްކްރެސެންޓް ގުޅިގެން، ހާދިސާގެ އަސަރުކުރި ލޭބަރ ކުއާޓަރސްތަކުގައި ދިރިއުޅުނު ބިދޭސީންގެ މައުލޫމާތު ވަނީ އެއްކޮށްފައެވެ. ސިޓީ ކައުންސިލުން ބުނީ ރޯވި އެކޮމޮޑޭޝަން ބްލޮކްގައި ދިރިއުޅެމުންދިޔައީ 202 މުވައްޒަފުންކަމަށެވެ. ހާލުގައި ޖެހުނު މީހުންގެ ތެރޭގައި ހާދިސާ ހިނގި ސަރަހައްދުގައި ހުރި އަމިއްލަ ކުންފުންޏެއްގެ އެކޮމޮޑޭޝަން ބްލޮކަކަށް ނިސްބަތްވާ 100 އެއްހާ މީހުން ހިމެނެއެވެ. މި ހާދިސާގައި ރޯވި ލޭބަރ ކުއާޓަރތަކުން 299ށްވުރެ ގިނަ މީހުންނަށް ވަނީ ރައްކާތެރި ބޯހިޔާވަހިކަން ހޯދާދީފައެވެ.
