ގެއްލުންވި އިމާރާތުން އެއްވެސް މީހެއްގެ ގޭގެ ރަޖިސްޓަރީ ގެއްލިއްޖެ ކަމަށްވަންޏާ އަޅުގަނޑުމެންނަށް ކުރެވޭނެ ކަމެއްނެތް: ޑެޕިއުޓީ މޭޔަރ ނަރީޝް
ރަށްވެހި ކަމާ ބެހޭ ހުރިހާ ޚިދުމަތްތަކާއި އިމާރާތްތަކާ ބެހޭ ހުރިހާ ޚިދުމަތްތަކެއް ހިނގަމުން ދިޔައީ އަލިފާނުގެ ހާދިސާ ހިނގި ކޮށީގައި ހުރި އިމާރާތުގައި
ހައުސިންގ މިނިސްޓްރީ އަނދާ ހުލިވެފައި
ބުރާސްފަތި ދުވަހު މާލޭގައި ހުންނަ ހައުސިންގ މިނިސްޓްރީ ހުރި ކޮށީގައި ހިނގި ބޮޑު އަލިފާނުގެ ހާދިސާ އާ ގުޅިގެން އެ ކޮށީގައި ހިނގަމުންދިޔަ މާލޭ ސިޓީގެ ރަށްވެހިކަމާއި ގޯތި ގެދޮރާއި ބެހޭ އޮފީހުން އެއްވެސް މީހެއްގެ ގޯތީގެ ރަޖިސްޓަރީ ގެއްލިއްޖެ ނަމަ ކުރެވޭނެ އެއްވެސް ކަމެއް ނޯންނާނެ ކަމަށް މާލޭ ސިޓީގެ ޑެޕިއުޓީ މޭޔަރ އަހްމަދު ނަރީޝް ވިދާޅުވެއްޖެއެވެ.
ބުރާސްފަތި ދުވަހު ހިނގި ބޮޑު ހުޅުގެ ހާދިސާ އާ ގުޅިގެން މާލޭގެ ރަށްވެހި ކަމާއި ގޯތި ގެދޮރާ ބެހޭ ޚިދުމަތްތައް މިވަގުތައް ހުއްޓޭނެ ކަމަށް ވެސް ނަރީޝް ވިދާޅުވެއްޖެއެވެ.
އަލިފާނުގެ ހާދިސާ ހިނގި ލޮކޭޝަންގައި ހުންނަވައިގެން މީޑިއާ އާ ވާހަކަ ދައްކަވަމުން ބުރާސްފަތި ދުވަހު ހެނދުނު ނަރީޝް ދެއްވި ބަސްދީގަތުމުގައި، ވިދާޅުވީ، "ވަގުތީ ސެޓަޕެއް ޖެހުމުގެ މަސައްކަތް މި ވީކެންޑްގެ ތެރޭގައި ފަށާނަން؛" ކަމުގައެވެ.
މިކަމުން އަރައިގަންނަން ވަގުތު ކޮޅެއް ބޭނުންވާނެ ކަމަށާއި، މި ހާދިސާ އާ ގުޅިގެން މުހިންމު ގިނަ ޚިދުމަތްތަކެއް ހުއްޓުމަކަށް އަންނާނެ ކަން އޭނާ ފާހަގަ ކުރެއްވިއެވެކަމަށެވެ.
ރަށްވެހި ކަމާ ބެހޭ ހުރިހާ ޚިދުމަތްތަކާއި އިމާރާތްތަކާ ބެހޭ ހުރިހާ ޚިދުމަތްތަކެއް ހިނގަމުން ދިޔައީ އަލިފާނުގެ ހާދިސާ ހިނގި ކޮށީގައި ހުރި އިމާރާތުގައި ކަން އޭނާ ފާހަގަ ކުރެއްވިއެވެ. އެގޮތުން މިވަގުތައް ހުއްޓޭނެ ޚިދުމަތްތަކުގެ ގޮތުގައި ނަރީޝް ފާހަގަ ކުރެއްވި:
- ރެޖިސްޓަރީ ހެދުން؛
- އިން ވަކިކުރުން؛
- އިންފާރު ތެޅުމަށްޓަކައި ދޭން ޖެހޭ ހުއްދަތައް ދިނުން؛
- އުފަންދުވަހުގެ ސެޓްފިކެޓް ހެދުން؛
- ރަށްވެހި ކަމުގެ ރަޖިސްޓަރީ ހެދުން؛ އަދި
- ރަށްވެހި ކަމުގެ ރަޖިސްޓަރީ ބަދަލު ކުރުން ހިމެނެއެވެ.
މާލޭ ސިޓީގެ ކައުންސިލަރ ސައިފް ފާތިހް ވިދާޅުވީ އިމާރާތް ކުރުމުގެ ހުއްދަ ދިނުން ހުއްޓޭނެ ކަމަށެވެ.
މާލޭގެ ހުރިހާ ގޯތި ގެދޮރުގެ ފައިލްތައް ހުންނާނީ އެތަނުގައި ކަމަށް ސައިފް ވިދާޅުވިއެވެ.
އަލިފާނުގެ ހާދިސާ އާ ގުޅިގެން ޑޮކިއުމެންޓްތައް އެކި ތަންތަނަށް ގެންދިޔަ ކަމަށާއި އެހުރިހާ އެއްޗެއް އެއްތާކަށް ގެނެސް ލިޔުންތައް ހަމަޔަކަށް އަޅުވައިގެން ނޫނީ ޚިދުމަތް ދިނުން އެއީ އެއްގޮތަކަށް ވެސް ކުރެވޭނެ ކަމެއް ނޫންކަން ނަރީޝް ފާހަގަ ކުރެއްވިއެވެ.
"ޚިދުމަތް އަލުން ފެށޭނެ އިރެއް ދަންނަވަން މިވަގުތު ވަރަށް ދަތި،" ނަރީޝް ވިދާޅުވިއެވެ.
ގެއްލުނު ޑޮކިއުމެންޓެއް ވެފައި ހުރި ގޮތެއް އަދި އެސެސް ކުރެވިފައި ނެތީމާ، ޚިދުމަތް ފެށޭނެ އިރެއް ނޭނގޭ ކަމަށް ސައިފް ވެސް ވިދާޅުވިއެވެ.
ނަރީޝް ފާހަގަ ކުރެއްވި ގޮތުގައި، 1960 ން ފެށިގެން މާލޭގައި އުފަންވެފައި ތިބި މީހުންގެ ސެޓްފިކެޓްތަކާއި އަދި އޭގެ ކުރިއަށް ވެސް އެތައް ލިޔެކިޔުމަކާއި ގޭގޭގެ ރަޖިސްޓްރީ އާއި ގުޅޭ ހުރިހާ ލިޔެކިޔުންތައް ހުންނާނީ އެ އޮފީހުގައި ކަމަށެވެ.
އެއްވެސް ޑޮކިއުމެންޓެއް ގެއްލިއްޖެއްޔާ އެއީ ރައްޔިތަކަށް ލިބިގެންދާނެ ވަރަށް ބޮޑު ގެއްލުމަކަށް ނަރީޝް ވިދާޅުވިއެވެ.
"އެއީ އިއާދަ ނުކުރެވޭނެ އެއްޗެއް، އެއީ އެހެން ތާކު ހުންނާ އެއްޗެއް ވެސް ނޫން."
މިލްކުވެރިކަން ސާބިތު ކުރާކަށްވެސް އަދި ވާރުތަ މުދަލެއް ސާބިތު ކުރާކަށްވެސް އެއްވެސް ތާކުން ލިބެން ހުންނާނެ ލިޔެކިޔުމެއް ނޫން ކަމަށް ނަރީޝް ވިދާޅުވިއެވެ.
ރަށްވެހި ކަމާއި އިމާރާތްތަކާ ބެހޭ ޚިދުމަތްތަކާ ބެހޭ ބަޔަށް ލިބުނު ގެއްލުން އަންދާޒާ ކުރާކަށް އަދި ނޭގޭ ކަމަށް ނަރީޝް ވިދާޅުވިއެވެ.
"ހެނދުނުން ފެށިގެން ޑޮކިއުމެންޓްތައް ސަލާމަތް ކުރެވޭތޯ މަސައްކަތް ކުރަނީ؛" އޭނާ ވިދާޅުވިއެވެ.
އުފަންދުވަހުގެ ސެޓްފިކެޓް ގެއްލިއްޖެއްޔާ އޭތި "ރިކަވަރ ކުރެވޭނެ ގޮތެއް ހޯދިދާނެ، ނަމަވެސް އެއްވެސް މީހެއްގެ ގޭގެ ރަޖިސްޓަރީ ގެއްލިއްޖެ ކަމަށް ވަންޏަކާ އަޅުގަނޑުމެންނަށް ކުރެވޭނެ ކަމެއް ނޯންނާނެ އެޔަކު" ނަރީޝް ވިދާޅުވިއެވެ.
