ބަންދުކުރި 3 ޑްރައިވަރުންގެ ތެރެއިން 2 މީހުންނަށް މުއްދަތު ޖަހައިފި
ބުރާސްފަތި ދުވަހު ޑްރައިވަރުންގެ މުއްދަތު ޖަހަން ގެންދިޔުމުން ކޯޓުގެ ވެއިޓިންގައި އޭރިއާގެ ތިބި ޑްރައިވަރުންގެ ޖަމިއްޔާގެ މަންދޫބުންނާއި ޑްރައިވަރުން ޕޮލިހުން އައިސް ވަނީ ފޮނުވާލާފައި
މުހައްމަދު ޝާމިން: މުއްދަތު ޖަހަން ކޯޓަށް ގެންނަނީ
ބުރާސްފަތި ވިލޭރޭ މާލޭގައި ހިނގި ޓެކްސީ ޑްރައިވަރުންގެ މުޒާހަރާ އިން ހައްޔަރު ކުރި 3 ޑްރައިވަރުންގެ ތެރެއިން 2 މީހުންގެ މުއްދަތު ކޯޓުން ޖަހައިފިއެވެ.
ތިންވަނަ މީހާ ވަނީ ބަންދުން ދޫކޮށްލާފައެވެ.
ސަރުކާރުގެ ސިޔާސަތުތަކުގެ ސަބަބުން ޓެކްސީ ޑްރައިވަރުން ދިރިއުޅެން ކުރާ މަސައްކަތްކައް ބޮޑެތި ގެއްލުންތަކެއް ލިބި ޒަމާނުއްސުރެ އަމިއްލަ ފަރާތްތަކުން ދޭ ޚިދުމަތެއްގެ ގޮތުގައި އޮތް ޓެކްސީ ޚިދުމަތުގެ ތެރެއަށް ސަރުކާރުން ވަންނަން އުޅޭތީ އެކަމާ ހިތްހަމަ ނުޖެހުން ޑްރައިވަރުން ފާހަގަ ކުރަމުންދާތާ އެތައް ދުވަހެއް ވަނީ ވެފައެވެ.
ސަރުކާރުގެ ކަމާބެހޭ ފަރާތްތަކާއި ރައްޔިތުންގެ މަޖިލީހުގެ މެމްބަރުންނާ ޑްރައިވަރުންނާ ދިމާވާ މައްސަލަތަކާ މަޝްވަރާ ކޮށްގެން މިހާތަނަށް އެއްވެސް ކުރިއެރުމެއް ނުލިބޭ ކަމަށް ޑްރައިވަރުން ބުނެއެވެ.
ބުރާސްފަތި ދުވަހު ޑްރައިވަރުންގެ މުއްދަތު ޖަހަން ގެންދިޔުމުން ކޯޓުގެ ވެއިޓިންގައި އޭރިއާގެ ތިބި ޑްރައިވަރުންގެ ޖަމިއްޔާގެ މަންދޫބުންނާއި ޑްރައިވަރުން ޕޮލިހުން އައިސް ވަނީ ފޮނުވާލާފައެވެ.
ބަންދުގައި ބައިތިއްބަން ނިންމި ދެމީހުންނަށް ފަސް ދުވަހަށް މުއްދަތު ޖެހީ ހުޅުމާލޭ މެޖިސްޓްރޭޓް ކޯޓުންނެވެ.
ބަންދުގެ މުއްދަތު ޖެހި ދެމީހުންނަކީ އަހްމަދު ޝަބީން އާއި މުހައްމަދު ޝާމިން އެވެ.
ބުދަ ދުވަހު ހަވީރުން ފެށިގެން ކުރިއަށް ގެންދިޔަ އިހްތިޖާޖުގެ ބައިވެރިން ވަނީ ޓްރާންސްޕޯޓް މިނިސްޓަރު އަމީން އަކީ އިތުބާރު ކުރެވޭ ފަރާތެއް ނޫން ކަމަށާއި އޭނާ އިސްތިއުފާ ދިނުމަށް ގޮވާލާފައެވެ. އިހްތިޖާޖު ކުރި ޑްރައިވަރުން ސަރުކާރުން ފަށަން އުޅޭ ޓެކްސީ ފްލީޓް ހުއްޓާލުމަށްވެސް ވަނީ ގޮވާލާފައެވެ.
ޓެކްސީ ޑްރައިވަރުންގެ އިހްތިޖާޖުގައި ބައިވެރިވި ގިނަ ކާރުތައްވެސް ފުލުހުން ވަނީ ޓޯ ކޮށްފައެވެ.
