ކެމްޕޭން ދަތުރުފުޅުތަކުގެ ތެރެއިން ރަސްމީ ހަރަކާތްތަކުގައި ބައިވެރިވެވަޑައިގަތުމަށް ރައީސަށް ހުރަހެއް ނޯވޭ: މިއުވާން
ރ އަތޮޅާއި އުތުރުގެ އަތޮޅުތަޅަށް ރައީސް ކުރެއްވީ ކެމްޕޭން ދަތުރުފުޅެއް
ރައީސް ސާލިހު އަލިފުއްޓަށް ވަޑައިގެންނެވުން
ކެމްޕޭން ދަތުރުފުޅުތަކުގެ ތެރެއިން ރަސްމީ ހަރަކާތްތަކުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާއަށް ހުރަހެއް ނޯންނަކަމަށް، ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ ރ އަތޮޅާއި އުތުރުގެ އަތޮޅުތަޅަށް ރައީސް ކުރެއްވީ ކެމްޕޭން ދަތުރުފުޅެއް ކަމަށެވެ. އަދި ރައީސް އައްޑޫއަށް ކުރައްވާ ކެމްޕޭން ދަތުރުފުޅުގައި ރަސްމީ ދެ ޖަލްސާއެއްގައި ރައީސް ބައިވެރިވެވަޑައިގަންނަވާނެ ކަމަށްވެސް ވިދާޅުވިއެވެ.
ރައީސުލްޖުމްހޫރިއްޔާގެ މަގާމުގައި ހުންނަވާއިރު ރަށްރަށަށް ކުރައްވާ ދަތުރުފުޅުތަކުގައި ވަރަށް ގިނަ އެހެން ބައްދަލުވުންތަކުގައިވެސް ބައިވެރިވެވަޑައިގަންނަވާނެކަން ފާހަގަކުރައްވައި މިއުވާން ވިދާޅުވީ، އެކި ގްރޫޕްތަކާއި ޕާޓީގެ ބޭފުޅުންނާވެސް ރައީސް ބައްދަލުކުރައްވާނެ ކަމަށެވެ.
އެހެންނަމަވެސް ދައުލަތުގެ ރިސޯރސްތައް ބޭނުންކުރައްވައިގެން ކޮރަޕްޝަނަށް މަގުފަހިވާގޮތަށް ރައީސް މަސައްކަތްޕުޅު ނުކުރައްވާނެ ކަމަށާއި، އަދި ކުރިއަށް އޮތްތަނުގައިވެސް އެހެން އަމަލުފުޅު ނުކުރައްވާނެ ކަމަށް ވިދާޅުވިއެވެ.
ރައީސްގެ ކެމްޕޭން ދަތުރުފުޅުތަކުގައި ސަޕޯޓް ޓީމުން ބައިވެރިވާތީ އެކަމާ ގުޅިގެން ނޫސްވެރިޔަކު ސުވާލު ދެންނެވުމުން މިއުވާން ވިދާޅުވީ، ރައީސްކަމުގެ މަގާމުގައި ހުންނަވާތީ އެމަނިކުފާނާއެކު އަބަދުވެސް ސަޕޯޓް ޓީމް ދަތުރު ކުރައްވާނެ ކަމަށެވެ. މިފަހަރު ކެމްޕޭން ދަތުރުފުޅުތަކުގައި ރައީސް ބޭނުންފުޅުކުރައްވަނީ ކެމްޕޭން ޓީމުން ޚަރަދުކުރެއްވި ލޯންޗުތައް ކަމަށްވެސް މިއުވާން ވިދާޅުވިއެވެ.
މާލޭގައި މާފަންނުގައި އޮންނަ ކެމްޕޭން އިވެންޓަކަށް ރައީސް ވަޑައިގަންނަވާއިރު މުލިއާގެއިން ނުކުމެވަޑައިގެން ރައީސް ވަޑައިގަންނަވާނީ ޓެކްސީއެއްގައި ނޫންކަން ވިދާޅުވެ މިސާލު ނަންގަވަމުން މިއުވާން ވިދާޅުވީ، އެމަނިކުފާނު އެތަނަށް ވަޑައިގަންނަވާނީ ސެކިއުރިޓީ ފުރިހަމަކޮށްދީފައި އޮންނަ ވެހިކަލްގައި ކަމަށެވެ. އެކަން ދެން މާނަކުރަންވީ ދައުލަތުގެ ވަސީލަތްތައް ނަހަމަގޮތުގައި ބޭނުންކުރެއްވުން ކަމަށްތޯ ވިދާޅުވެ މިއުވާން ވަނީ ސުވާލު އުފައްދަވާފައެވެ.
މިއުވާން ވަނީ ރައީސްގެ ކެމްޕޭން ދަތުރުފުޅުގައި ދައުލަތުން ޚަރަދު ނުކުރާކަމަށް ވިދާޅުވާ، ވާހަކަފުޅު ތަކުރާރު ކުރައްވާފައެވެ.
