ލޯނު އެއްބަސްވުމެއްގެ ދަށުން ފެލިކްސް ޗެލްސީ އަށް ބަދަލުވެއްޖެ

ސްޕެއިންގެ އެތުލެޓިކޯ މެޑްރިޑަށް ކުޅެމުން އައި ޕޯޗުގަލްގެ ޔާއޯ ފެލިކްސް ލޯނު އެއްބަސްވުމެއްގެ ދަށުން ޗެލްސީ އަށް ބަދަލުވެއްޖެ އެވެ.

ބުދަ ދުވަހުގެ ވަގުތެއްގައި ފެލިކްސް ވަނީ ޗެލްސީއާއެކު އެއްބަސްވުމުގައި ސޮއިކޮށްފަ އެވެ. ފެލިކްސް ޗެލްސީ އަށް ބަދަލުވީ ލޯނު އެއްބަސްވުމުގެ ދަށުން މިހާރު ކުރިއަށްދާ ސީޒަންގެ ނިޔަލަށެވެ. ސީޒަން ނިމުމާއެކު އޭނާ އެނބުރި އެތުލެޓިކޯ އަށް ބަދަލުވާނެ އެވެ. ޗެލްސީގެ އެއްބަސްވުމުގައި ދާއިމީ ގޮތެއްގައި ފެލިކްސް ގަނެވޭނެ މާއްދާ ހިމަނައިފައެއް ނުވެ އެވެ. ޗެލްސީގައި ފެލިކްސް ބޭނުންކުރާނީ 11 ނަންބަރު ޖާޒީ އެވެ. ޗެލްސީ އަށް ބަދަލުވުމަށްފަހު ފެލިކްސް ބުނީ، ޗެލްސީ އަކީ ދުނިޔޭގައި އޮތް އެންމެ ބޮޑު އެއް ކުލަބު ކަމަށާއި، އެ ޓީމުގެ ޓާގެޓުކަށް ވާސިލްވުމަށް އޭނާ އަށް އެހީތެރިވެވޭނެ ކަމަށް އުންމީދު ކުރާ ކަމަށެވެ. މީގެ އިތުރުން ފެލިކްސް ބުނީ، ޗެލްސީ އަށް ބަދަލުވެވުމުން ވަރަށް އުފާވާ ކަމަށާއި، އެ ޓީމުގެ ކުޅުންތެރިޔެއްގެ ގޮތުގައި ކުޅެލެން ލިބުމަކީ ވެސް އުފަލެއް ކަމަށެވެ.

ފެލިކްސް ޗެލްސީ އަށް ބަދަލުވިއިރު، އޭނާ މިހާރު ވަނީ އެތުލެޓިކޯއާއެކު އެއްބަސްވުން އައުކޮށްފަ އެވެ. އެތުލެޓިކޯއާއެކު ފެލިކްސް އައު ކުރި އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. ފެލިކްސް އަކީ ޗެލްސީ އެ ޓީމު ވަރުގަދަ ކުރުމުގެ މަސައްކަތުގެ ތެރެއިން ހޯދި ކުޅުންތެރިޔެކެވެ. ނަމަވެސް އެތުލެޓިކޯ އިން ދާއިމީ އެއްބަސްވުމެއްގެ ދަށުން އޭނާ ދޫކޮށްލަން ބޭނުމެއް ނުވެ އެވެ. އެހެންވެ ލޯނު އެއްބަސްވުމެއްގެ ދަށުން ފެލިކްސް ޗެލްސީ އަށް ބަދަވުމުން، އެތުލެޓިކޯ އިން އަންނަނީ ބަދަލުގައި އެހެން ކުޅުންތެރިޔަކު ހޮދުމުގެ މަސައްކަތް ކުރަމުން ކަމަށް ރިޕޯޓުތައް ބުނެ އެވެ.