ހެރީގެ ކަންތައް މިހާރު "ހައްދުން މައްޗަށް" ހިނގައްޖެ؟

އިނގިރޭސި ރަސްގެފާނު ޗާލްސްގެ އެންމެ ހަގު ދަރިފުޅު ނުވަތަ އާންމުން ކިއާ އުޅޭ ގޮތުން ނަމަ ޕްރިންސް ހެރީއާއި އިނގިރޭސި ޝާހީ އާއިލާއާ ދެމެދު އުފެދިފައި ވާ ދެބަސްވުންތަކުގެ ވާހަކައަކީ، މިދިޔަ ދެތިން އަހަރަށް ބަލާއިރު އެންމެ ގިނަ ބައެއްގެ ސަމާލުކަން ދަމައިގަތް އެއް ވާހަކައެވެ. ހަޔާތުގެ ބައިވެރިޔާއާއެކު އަމިއްލަ ދިރިއުޅުމަކަށް ފެށި ކަމުގައި ވީ ނަމަވެސް، ހެރީގެ ފަރާތުން ޝާހީ އާއިލާއާ ބެހޭ ގޮތުން އާންމުން ކުރަމުންދާ ވާހަކަތައްވެސް މަދެއް ނޫނެވެ. އެފަދަ ވާހަކަތަކެއް އެންމެ ފަހުން އާންމު ކުރީ، އޭނާގެ ހަޔާތުގެ ނަމާއެއްގެ ގޮތުގައި ލިޔެފައި ވާ "ސްޕެއަރ" ނަމަކަށް ކިއާ ފޮތަކުންނެވެ.

"ސްޕެއަރ"ގައި ޕްރިންސް ހެރީ އާންމު ކުރި ވާހަކަތަކަށް އާންމުންގެ ބޮޑު ސަމާލުކަމެއް ހުއްޓުނު ކަމުގައި ވީ ނަމަވެސް، އެކަމަކީ އިނގިރޭސިންނަށް ހަޖަމު ކުރަން މާ ފަސޭހަ ވާހަކަތަކަކަށް ނުވިއެވެ. ބައެއް މީހުން ބުނި ގޮތުގައި ރަސްގެފާނު ޗާލްސްގެ ފިރިހެން ދަރިކަލުން ވަނީ، ޒާތީ އަދި ހައްސާސް ވަހާކަތައް އާންމު ކުރުމުގައި ހައްދު ފަހަނައަޅާފައެވެ.

ޕްރިންސް ހެރީ ހިއްސާކޮށްފައި ވާ ބައެއް ވާހަކަތަކަށް ބަލާއިރު، އިނގިރޭސިވިލާތުގެ އަދުގެ ކުއީން ކޮންސޯޓް ކެމީލާއާ ކައިވެނިބައްލަވައި ނުގަތުމަށް، ބައްޕާފުޅު ޗާލްސް ގާތުގައި ޕްރިންސް ވިލިއަމްއާ ދެބޭން ރޮއި އާދޭސް ކުރި ވާހަކައާއި، ފުރާވަރުގެ ދުވަސްވަރު، ކޮކެއިންގެ ޝިކާރައަކަށް އޭނާ ވެގެން ދިޔަ ގޮތުގެ ވާހަކަތައް ހިއްސާ ކޮށްފައި ވެއެވެ.

ނުހަނު ޅަ އިރު، މަންމާފުޅު، ޕްރިންސަސް ޑަޔާނާ އަވާހަރަވުމުން ދެން އުފުލަން ޖެހުނު ތަކުލީފުތަކުގެ ވާހަކައާއި، އިނގިރޭސި އަސްކަރިއްޔާގައި ޚިދުމަތް ކުރި ދުވަސްވަރުގެ ވާހަކަތައްވެސް ހެރީ ވަނީ ހިއްސާކޮށްފައެވެ. އެގޮތުން އަފްޣާނިސްތާނުގެ ހަނގުރާމާގައި އޭނާ ހަރަކާތްތެރިވި ދުވަސްވަރު، ޠާލިބާނު ހަނގުރާމަވެރިންގެ 25 މީހަކު މަރާލާފައި ވާނެ ކަމަށްވެސް "ސްޕެއަރ" ގައި ހެރީ ވަނީ ކިޔައިދީފައެވެ.

މި ވާހަކަތަކުގެ އިތުރުން، ހެރީގެ މިހާރުގެ އަނބިމީހާ، މޭގަންގެ ކަމާ ގުޅިގެން ހިނގި ދެބަސްވުމެއްގައި، އިނގިރޭސިވިލާތުގެ އަދުގެ ވަލީއަހުދު ވިލިއަމް، ހެރީ ކޮއްޕާލާ، ބިންމައްޗަށް ވައްޓާލި ވާހަކަ ފަދަ، ޒާތީ ވާހަކަތައްވެސް ހެރީ ވަނީ "ސްޕެއަރ"ގައި ހިއްސާ ކޮށްފައެވެ.

ގިނަ ބަޔަކު ދަނީ މިފަދަ ވާހަކަތަކެއް ހިއްސާ ކުރި ކުރުމާ ދެކޮޅަށް އަޑު އުފުލަމުންނެވެ. އެފަދަ އެކަކީ ވިޔަފާރިވެރިޔާ ރޮބިން ޕާކަރއެވެ.

"ސްޕެއަރ"ގެ ރިލީޒް ކުރުމަށް ހަމަޖެހިފައި އޮތް ތާރީޚަކީ ޖެނުއަރީ 10 ވަނަ ދުވަސް ކަމުގައި ވީ ނަމަވެސް، ސްޕެއިން ބަހުގެ ތަރުޖަމާ ފޮތް، ޖެނުއަރީ މަހުގެ ފުރަތަމަ ހަފުތާ ތެރޭގައި ވަނީ އާންމު ކޮށްފައެވެ. ކަން މިހެން އޮތް އިރު، އައިޓީވީއިން ދަނީ، ރަސްކަމުގެ ތަޚުތަށް ޗާލްސް ރަސްމީކޮށް އިސްކުރެވުނު އިހުތިފާލުގައި ހެރީ ބައިވެރި ނުވި ނުވުން ދިފާޢުކޮށް، އޭނާ ދެއްކި ވާހަކަތަކެއް ހިމެނޭ އިންޓަރވިއުއެއްގެ ބައިތަކެއް ދުރަށް ފޮނުވަމުންނެވެ.

އުމުރުން 61 އަހަރުގެ އިންޖިނޭރެއް ކަމަށް ވާ ޖޫލިއަން ބޭކަރ ބުނި ގޮތުގައި އެފަދަ ވާހަކަތަކެއް ހާމަ ކުރީތީ ހިތާމަ ހުއްޓެވެ. ނަމަވެސް އެ ވާހަކަތަކުގެ ސަބަބުން، ޝާހީ އާއިލާއަށް، ދާއިމީ ގެއްލުމެއް ލިބުން ނާދިރު ކަމަށް އޭނާ ޤަބޫލު ކުރެއެވެ.

ހެރީގެ ޝާހީ މަޤާމުތަކާ ލަޤަބުތައް ދޫކޮށްލުމަށްފަހު ހެރީގެ ދެމަފިރިންވެސް ފާހަގަ ކުރެވެނީ ޝާހީ އާއިލާއަށް ބޮޑެތި ފާޑުކިއުންތަކެއް އަމާޒު ކުރަމުން ދާ ދެމަފިރިންގެ ގޮތުގައެވެ. ނަސްލީ ތަފާތު ކުރުން ކަހަލަ ބޮޑެތި އިލްޒާމްތަކެއްވެސް ޝާހީ އާއިލާއަށް އަމާޒު ކޮށްފައިވެއެވެ.