ސައީދު ވިދާޅުވީ ދިވެހި ކަނޑުމަހަށް ޔޫކޭގައި ޑިމާންޑް ބޮޑުކަމަށް، ޓެރިފްގެ ވާހަކައެއް ނުދައްކާ
19 ޖުލައި 2025 | ހޮނިހިރު 07:44ސައީދު ވިދާޅުވީ، ޔޫކޭގައި ދިވެހި ކަނޑުމަހަށް އޮންނަ ޑިމާންޑްވެސް ދުވަހެއް ދުވަހަކަށް އަންނަނީ އިތުރުވަމުން ކަމަށް
އިކޮނޮމިކް މިނިސްޓަރު ސައީދު
ޔޫކޭގައި ދިވެހި ކަނޑުމަހަށް އޮންނަ ޑިމާންޑްވެސް ދުވަހެއްދުވަހަކަށް އަންނަނީ އިތުރުވަމުން ކަމަށް ބުނި ނަމަވެސް އިކޮނޮމިކް މިނިސްޓަރު މުހައްމަދު ސައީދު ޓެރިފްގެ ވާހަކަ ދައްކާފައެއް ނުވެއެވެ.
ކޮމަންވެލްތަށް ނިސްބަތްވާ ކުދި ޖަޒީރާ ގައުމުތަކުގެ ތެރެއިން، އިނގިރޭސިވިލާތަށް އެތެރެކުރާ މުދަލުން ޓެރިފް ނަގަމުންދާ ހަމައެކަނި ގައުމަކީ ދިވެހިރާއްޖެއެވެ. ރާއްޖެއާ އެއް ހާލަތެއްގައި ހިމެނޭ އެހެން ކުދި ޖަޒީރާ ގައުމުތަކުން އެކިއެކި އިންތިޒާމުތައް މެދުވެރިކޮށް ޓެކްސް މާފްކޮށްފައި ވެއެވެ.
އިނގިރޭސިވިލާތުގެ ލަންޑަންގައި ބޭއްވި މޯލްޑިވްސް-ޔޫކޭ ބިޒްނަސް ފޯރަމްއާ ގުޅޭގޮތުން ކުރެއްވި ޕޯސްޓެއްގައި ސައީދު ވިދާޅުވީ، މިފޯރަމްގައި ޔޫކޭއަށް ނިސްބަތްވާ އަދި ޔޫކޭގައި ހަރަކާތްތެރިވާ 200 އަށްވުރެގިނަ ވިޔަފާރިވެރީން ބައިބެރިވެ، ރާއްޖޭގައި ހުރި ތަފާތު ވިޔަފާރިއާއި އިންވެސްޓް ކުރެވިދާނެ ދާއިރާތަކުގެ ފުރުސަތުތައް އޮޅުންފިލުވަފައިވާ ކަމަށެވެ.
ސައީދު ވިދާޅުވީ، ގިނަބަޔަކު އަބަދުވެސް ރާއްޖެއާއިމެދު ޝައުޤުވެރިވަނީ ފަތުރުވެރިކަމުގެ ދާއިރާގައި ކުރެވޭ އިންވެސްޓްމަންޓްތަކައް ކަމަށެވެ. އަދި ފާހަގަކޮއްލެވޭ އަނެއްކަމަކީ އިޔާދަކުރަނިވި ހަކަތައިގެދާއިރާ އާއި ތިމާވެއްޓާއި ގުޅުންހުރިދާއިރާގެ ޝައުގުވެރިކަން އިތުރުވަމުން އަންނަކަން ކަމަށާއި 2028 އަންނައިރު ރާއްޖޭގައި އުފައްދާހަކަތައިގެ %33 އަކީ އިޔާދަކުރަނިވިހަކަތައިން އުފައްދާ ހަކަތަކަމުގައި ހެދުމަކީ ރައީސް މުޢިއްޒުގެ ސިޔާސަތެއް ކަމަށް ސައީދުގެ ޕޯސްޓުގައި ބުނެފައިވެއެވެ. އަދި މަގްޞަދަކީ ގިނަފަރާތްތަކަކަށް ރާއްޖޭގައިހުރި ވިޔަފާރިއާއި އިންވެސްޓްކުރެވިދާނެ ދާއިރާތަކުގެ މަޢުލޫމާތު އެކަމަށް ޝައުގުވެރިވާ ފަރާތްތަކަށް ފޯރުކޮށްދިނުން ކަމަށް ސައީދު ވިދާޅުވިއެވެ.
މީގެ އިތުރުން، ވިޔަފާރީގެ ވާދަވެރިކަން ބޮޑުވެފައިވާ ދުނިޔެއެއްގައި ރާއްޖެ އިޝްތިހާރުކުރުމާއި، އިންވެސްޓްމަންޓްގެ ދާއިރާގެ ފުރުސަތުތައް މާކެޓްކުރުމަކީ ކެނޑިނޭޅި ކުރިއަށް ގެންދަންޖެހޭ ކަމެއް ކަމަށްވެސް ސައީދު ވިދާޅުވިއެވެ.
މޯލްޑިވްސް-ޔޫކޭ ބިޒްނަސް ފޯރަމްގައި، ދެ ގައުމުގެ ވިޔަފާރީގެ ގުޅުން އިތުރަށް ހަރުދަނާކުރުމަށްޓަކައި، ވެސްޓް ލަންޑަން ޗެމްބަރސް އޮފް ކޮމަރސް އާއި ރާއްޖޭގެ އިގްތިސާދީ ތަރައްގީ އާއި ވިޔަފާރިއާ ބެހޭ ވުޒާރާއާ ދެމެދު ފަހުމުނާމާއެއްގައިވެސް ވަނީ ސޮއިކުރައްވާފައެވެ.
