މި ސަރުކާރުން ކުޑަ ރަށެއް ނުބަލާ 1350 އަށް ވުރެ ގިނަ ޕްރޮޖެކްޓް ހިންގަމުން އެބަގެންދޭ: ރިޒާ
ކުރިއަށް އޮތް ޕްރައިމަރީ ރައީސް ޞާލިހު ކާމިޔާބު ކުރައްވާނީ ބޮޑު ތަފާތަކުން ކަމަށް ވެސް އޭނާ ވިދާޅުވި
ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ
މި ސަރުކާރުން ކުޑަ ރަށެއް ނުބަލާ 1350 އަށް ވުރެ ގިނަ ޕްރޮޖެކްޓް ހިންގަމުން އެބަގެންދާ ކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާ ވިދާޅުވެއްޖެއެވެ.
އެމްޑީޕީން ރޭ ނ،ވެލިދޫގައި "އެމްޑީޕީ ކުރިއަށް" ނަމުގައި ބޭއްވި ހާއްސަ ޖަލްސާގައި ވާހަކަ ދައްކަވަމުން، ކުޑަ ރަށެއް ބޮޑު ރަށެއް ނުބަލާ ތަރައްޤީކުރުމަކީ ސިޔާސަތެއް ނޫން ކަމަށް ބައެއް ފަރާތްތަކުން ބުނާ އިރު އެއީ އެމްޑީޕީގެ ސިޔާސަތު ކަަމަށް އޭނާ ވިދާޅުވިއެވެ. އެމްޑީޕީ އިން އައީ އަބަދުވެސް އެމްޑީޕީ އިން ދިވެހިންނަށް ތާހިރު ދިރިއުޅުމެއް ހޯދާދޭނެ ކަަމަށް ބުނަމުން ކަަމަށް އޭނާ ވިދާޅުވިއެވެ. ތާހިރު ދިރިއުޅުމެއް ހޯދާ ދެވޭނީ ކުޑަ ރަށް ތަރައްޤީކޮށްގެން ކަމަށް އޭނާ ވިދާޅުވިއެވެ. ކުޑަ ރަށްރަށަށް ބަނދަރާއި ފެނާއި ނަރުދަމާގެ ކަންކަން ފުރިހަމަ ކޮށްދިނުމަކީ ކަމުދާ ކަމެއް ނޫން ކަަމަށް ބައެއް މީހުން ބުނާކަން އޭނާ ފާހަގަކުރެއްވިއެވެ. ނަމަވެސް ރައީސް ޞާލިހު ގެންދަވަނީ ވަކި ރަށެއް ބެއްލެވުމެއް ނެތި ތަރައްޤީ ގެންނަވަމުން ކަމަށާއި ރައްޔިތުން ތިބީ އެކަމަށް ބޭނުންވެފައި ކަމަށް ރިޒާ ވިދާޅުވިއެވެ. ކުޑަ ރަށްރަށުގެ ފަރާތްތަކަށް އުޖާލާ ހަމަޖެހޭ ދިރިއުޅުމެއް ހޯއްދަވައިދެއްވީ ރައީސް ޞާލިހު ކަމަށް ވެސް ރިޒާ ވަނީ ވިދާޅުވެފައެވެ.
ރިޒާ އިތުރަށް ވިދާޅުވީ ރައްޔިތުން ބޭނުންވަނީ ދެ ކަމެއް ކަަމަށާއި އެއީ ތިމާ އަށް ރަނގަޅު ގޮތެއްވުމާއި ތިމާގެ މާހައުލަށް ރަނގަޅު ގޮތެއްވުން ކަމަށެވެ. އަދި ރައީސް އިބްރާހިމް މުހައްމަދު ޞާލިހުގެ ސަރުކާރުން އެކަންކަން ފުއްދައިދީފައިވާ ކަަމަށް އޭނާ ވިދާޅުވިއެވެ. ރިޒާ ވަނީ މިސަރުކާރުގެ ތަރައްގީގެ ވާހަކަ އިދިކޮޅުން ދައްކާކަމަށް ވެސް ވިދާޅުވެފައެވެ. އެގޮތުން ސަރުކާރުން ގާއިމްކޮށްދޭ ދަތުރުފަތުރުގެ ފެރީ ނިޒާމް ކަމުގައިވާ އާރްޓީއެލްގެ ފުރިހަމަކަމުގެ ވާހަކަ އިދިކޮޅު ޕީޕީއެމްގެ މެމްބަރުންވެސް ދައްކާކަމަށް އޭނާ ވިދާޅުވިއެވެ.
ކުރިއަށް އޮތް ޕްރައިމަރީ ރައީސް ޞާލިހު ކާމިޔާބު ކުރައްވާނީ ބޮޑު ތަފާތަކުން ކަމަށް ވެސް އޭނާ ވިދާޅުވިއެވެ. އަދި ރާއްޖޭގެ ހުރިހާ ހިސާބެއްގައި އެމަނިކުފާނު ގެންދަވަނީ ތަރައްގީގެ ޕްރޮޖެކްޓްތައް ހިންގަވަމުން ކަމަށް އޭނާ ވަނީ ވިދާޅުވެފައެވެ. އެހެންކަމުން އެމްޑީޕީ މެމްބަރުން ތިބީ ރައީސް ޞާލިހު އަށް އިތުރު ފުރުސަތެއް ދޭން ތައްޔާރަށް ކަމަށް ރިޒާ ވަނީ ފާހަގަކުރައްވާފައެވެ.
