ވިލަރެއާލް އަތް ދަށުވެ ރެއާލް މެޑްރިޑުން ފުރުސަތު ނަގާލައިފި

ސްޕެނިޝް ލީގުގައި ވިލަރެއާލާ ދެކޮޅަށް ކުޅުނު މެޗުން ބަލިވެ، އެއް ވަނަ އަށް ޖެހިލަން ލިބުނު ފުރުސަތު ޗެމްޕިއަން ރެއާލް މެޑްރިޑުން ނަގާލައިފި އެވެ.

ވިލަރެއާލްގެ ދަނޑުގައި ހޮނިހިރު ދުވަހުގެ ރޭ ކުޅުނު މެޗުން ރެއާލް ބަލިވީ 2-1 އިންނެވެ. މިއީ މި ސީޒަންގެ ސްޕެނިޝް ލީގުގައި ރެއާލްގެ ދެ ވަނަ ބައްޔެވެ. މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބެއް ނުކުރެވެ އެވެ. ނަމަވެސް ދެ ވަނަ ހާފަށް ނުކުމެ ވިލަރެއާލުން ވަނީ ލަނޑެއް ޖަހައި، ލީޑު ނަގައިފަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ވިލަރެއާލަށް ލީޑު ނަގައިދިނީ ޔެރެމީ ޕިނޯ އެވެ. އެއީ ޖެރާޑް މޮރެނޯގެ އެހީތެރިކަމާއެކު އޭނާ ޖަހައިދިން ލަނޑެކެވެ. ނަމަވެސް މެޗުގެ 60 ވަނަ މިނެޓުގައި ރެއާލުން ވަނީ ލަނޑެއް ޖަހައި ނަތީޖާ ހަމަހަމަކޮށްފަ އެވެ. ޕެނަލްޓީގައި ރެއާލަށް ނަތީޖާ ހަމަހަމަކޮށްދިނީ ކެޕްޓަން ކަރީމް ބެންޒެމާ އެވެ. ރެއާލުން ނަތީޖާ ހަމަކުރިތާ ތިން މިނެޓުގެ ތެރޭގައި ވިލަރެއާލުން ވަނީ ދެ ވަނަ ލަނޑު ޖަހައި، ލީޑު ނަގައިފަ އެވެ. އެ ޓީމުގެ ދެ ވަނަ ލަނޑު ޖަހައިދިނީ ފުރަތަަމަ ލަނޑު ޖެހުމަށް އެހީތެރިވެދިން މޮރެނޯ އެވެ.

މި ބައްޔާއެކު ރެއާލާއި، ބާސެލޯނާއާ އޮތީ ޕޮއިންޓުގެ ގޮތުން އެއްވަރުވެފަ އެވެ. ކުޅުނު 16 މެޗުން ރެއާލަށް ލިބެނީ 38 ޕޮއިންޓެވެ. އެ ޓީމަށް ވުރެ އެއް މެޗު މަދުން ކުޅެގެން ބާސެލޯނާ އަށް ވެސް ލިބެނީ 38 ޕޮއިންޓެވެ. އެއް ވަނައިގައި މިވަގުތު ބާސެލޯނާ އޮތީ ފައިދާ ގޯލުންނެވެ. ނަމަވެސް ލީގުގައި މި މަހުގެ ނުވަ ވަނަ ދުވަހު އެތުލެޓިކޯ މެޑްރިޑާ ދެކޮޅަށް ކުޅޭ މެޗުން މޮޅުވެ، އެއް ވަނައިގައި ބާސެލޯނާ އަށް ލީޑު ނެގުމުގެ ފުރުސަތު އެބަ އޮތެވެ.