ގިނަ ސިޔާސީ ޕާޓީތައް ގޮވައިގެން މަސައްކަތްނުކުރެވޭ ބޭފުޅަކަށް ދެން ރާއްޖޭގައި ވެރިކަން ކުރަން ފަސޭހައެއް ނުވާނެކަމަށް ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް އަދި ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެއްޖެއެވެ.

ހިނގަމުންމިދާ 24 ގަޑިއިރު ތެރޭގައި އިމްރާން ވަނީ ހިނގަމުންދާ އެމްޑީޕީގެ ރިޔާސީ ޕްރައިމަރީގެ ކެމްޕެއިނާ ގުޅޭގޮތުން ތިން ޓްވީޓެއްކުރައްވާފައެވެ. އެންމެ ފަހުން ކުރެއްވި ޓްވީޓުގައި ގިނަ ސިޔާސީ ޕާޓީތައް ގޮވައިގެން މަސައްކަތްނުކުރެވޭ ބޭފުޅަކަށް ވެރިކަންކުރަން ފަސޭހަނުވާނެކަމަށް ވިދާޅުވެފައިވާއިރު އެންމެ ފުރަތަމަ ކުރެއްވި ޓްވީޓްގައި ވިދާޅުވެފައިވަނީ އެންމެ ރަނގަޅު ވެރިކަމެއްކުރެވެނީ އެންމެ މޮޅަށް މީހުން މެނޭޖުކުރެވޭ މީހަކަށްކަމީ ޒަމާނުއްސުރެ އިންސާނުން ގަބޫލުކުރަމުން އަންނަ ހަގީގަތެއްކަމަށެވެ.

އޭގެފަހުން ކުރެއްވި ޓްވީޓްގައި ވިދާޅުވެފައިވަނީ ހުރިހާ ދިވެހިންނަށް އެންމެ ފައިދާ ހުރި ގޮތަށް، ގިނަ ދިވެހިންގެ ވިސްނުމާއި އެއްގޮތަށް ރާއްޖޭގެ ވެރިކަންކުރާނެ ގޮތެއް ހޯދައިދިނުމީ ސިޔާސީ ލީޑަރުން ހޯދައިދޭންޖެހޭ އަގެއްކަމަށެވެ.

މިމަހުގެ 28 ވަނަ ދުވަހު އޮންނަ އެމްޑީޕީގެ ރިޔާސީ ޕްރައިމަރީގައި ވާދަކުރައްވަނީ އެމްޑީޕީގެ ރައީސް، ރައީސް މުހައްމަދު ނަޝީދު އާއި އެޕާޓީގެ އިސް ލީޑަރ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހެވެ. ރައީސް ޞާލިހު އާއި ރައީސް ނަޝީދު ރިޔާސީ ޕްރައިމަރީގެ ކެމްޕެއިން ފައްޓަވާފައިވާއިރު ދެ ބޭފުޅުން ވެރިކަން ހިންގުމުގައި ގެންގުޅުއްވާ ވިސްނުން ތަފާތެވެ. ރައީސް ނަޝީދު ބޭނުންފުޅުވަނީ ކޯލިޝަނަކާއި ނުލާ ވެރިކަން ކުރެއްވުމެވެ. ނަޝީދުގެ ރިޔާސީ ޕްރައިމަރީ ކެމްޕެއިން "ފިކުރެއްގެ ދިރުން" ފެށުމަށް ސަލްޓަން ޕާކުގައި ބޭއްވި ޖަލްސާގައި ތަކުރާރުކޮށް ވިދާޅުވެފައިވަނީ ކޯލިޝަނަކީ މިފަހަރު އޮތް ޗޮއިސްއެއް ނޫންކަމަށެވެ. 2018 ވަނަ އަހަރުގެ ވިސްނުމަކަށްވީ ކޮންމެ ގޮތަކަށް ހަދައިގެން ވެސް އޭރު އޮތް ރައީސް ޔާމީންގެ ވެރިކަން ބަދަލުކުރުންކަމަށާއި އިއްތިހާދެއް ހެދީ އެސަބަބަށްޓަކައި ކަމަށެވެ.

ނަމަވެސް މިއަދު ޖުމްހޫރީ ޕާޓީ ވެސް، އެމްއާރުއެމް ވެސް އަދާލަތު ޕާޓީ ވެސް އެމްއެންޕީގެ ލީޑަރުންނަށް ވެސް އިންތިޚާބުގައި ވާދަކުރެއްވޭނެކަމަށާއި ރައީސް ޞާލިހު އެ ވިދާޅުވާ ކޯލިޝަންގެ ޗޮއިސްއެއް މިފަހަރު ނެތްކަމަށެވެ. އެއިން ކޮންމެ ޕާޓީއަކުން ވެސް ކެންޑިޑޭޓުން ނުކުންނާނެކަމަށް ނަޝީދު ވިދާޅުވިއެވެ.

ނަމަވެސް ރައީސް ޞާލިހު ވިދާޅުވަމުން ގެންދަވަނީ ވެރިކަމަށް އާދެވޭނީ ކޯލިޝަނަކުންކަމަށެވެ. ރައީސް ޞާލިހު މިހާރު ކުރައްވަމުން ގެންދަވާ ކެމްޕެއިން ދަތުރުފުޅުގައި ހޮނިހިރު ދުވަހު ނ މަނަދޫގައި ވާހަކަދައްކަވަމުން ވިދާޅުވީ ރާއްޖޭގެ ސިޔާސީ މަސްރަހު އޮތްގޮތުން އެންމެ ޕާޓީއަކަށް ނުކުމެ ރިޔާސީ އިންތިޚާބު ކާމިޔާބު ނުކުރެވޭނެ ކަމަށާއި ރައްޔިތުން ވެސް ބޭނުންވަނީ ގިނަ ފިކުރުތައް އެކުލެވޭ އަދި ގިނަ ޕާޓީތައް އެކުލެވޭ ސަރުކާރެއް އެކުލަވާލަން ކަމަށެވެ. ސާފުކޮށް ފެންނަން އޮތް ހަގީގަތަކީ ރައްޔިތުންގެ ވިސްނުމާއި އެކީގައި ރިޔާސީ އިންތީޚާބު ކާމިޔާބު ކުރެވޭނެ ކެންޑިޑޭޓެއްގެ ގޮތުގައި އެމްޑީޕީގައި މިވަގުތު ހުރި މީހަކީ އެމަނިކުފާނު ކަމަށް ވިދާޅުވިއެވެ.