ރައީސް ސޯލިހަކީ ރައްޔިތުންނަށް ޚިދުމަތްކުރައްވާ ވެރިއެއް، ނޫސްވެރިންގެ ކުރިމަތީގައި ދެއިރު ހަޅޭއްލަވާ ވެރިއެއް ނޫން: އީސަ
7 ޖެނުއަރީ 2023 | ހޮނިހިރު 10:18އީސަ ވަނީ ޕްރައިމަރީގައި ވޯޓު ލާއިރު، ހުރިހާ މެމްބަރުންވެސް ރަނގަޅަށް ވިސްނުމަށް އެދިވަޑައިގެންފައި
ކެނދިކުޅުދޫ ދާއިރާގެ މެމްބަރު އަހުމަދު އީސާ
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަކީ ރައްޔިތުންނަށް ޚިދުމަތްކުރައްވާ ވެރިއެއްކަމަށް، ކެނދިކުޅުދޫ ދާއިރާގެ މެމްބަރު އަހުމަދު އީސާ ވިދާޅުވެއްޖެއެވެ.
އެމްޑީޕީގެ ޕްރައިމަރީގައި ހޮނިހިރު ދުވަހު ރައީސުލްޖުމްހޫރިއްޔާގެ އަރިހުގައި ނ. ކެނދިކުޅުދޫއަށް ވަޑައިގެން، އެރަށުގައި ވާހަކަފުޅުދައްކަވަމުން އީސަ ވިދާޅުވީ، އެމްޑީޕީގެ ހުރިހާ އިންތިޚާބުތަކަކީ ނުހަނު ވާދަވެރި އިންތިޚާބުތަކެއް ކަމަށެވެ. ޕާޓީގެ އާންމު މެމްބަރުންނަކީވެސް އިންތިޚާބުތަކަށް ނުހަނު ފަރިތަ ބައެއްކަމަށް އީސަ ވިދާޅުވިއެވެ.
އެމްޑީޕީއަކީ އެއްކޮޅާއި، އިދިކޮޅުގެ ވާހަކަތައްވެސް މިނެކިރުމުގެ ސިޔާސީ ތަޖުރިބާހުރި ފަރާތްތަކެއް ނިސްބަތްވާ ޕާޓީއެއްކަމަށް އީސަ ވިދާޅުވިއެވެ.
ޕްރައިމަރީގައި ވޯޓު ލާއިރު ހުރިހާ މެމްބަރުންވެސް ރަނގަޅަށް ވިސްނުމަށް އީސަ ވަނީ އެދިވަޑައިގެންފައެވެ.
އީސަ ވަނީ، ޕާޓީއާއި އެކި ފަރާތްތަކުންވެސް ރައީސަށް އަމާޒުކޮށް ކިޔާ ބައެއް ފާޑުކިއުންތަކަށް ރައްދު ދެއްވާފައެވެ.
އީސަ ވިދާޅުވާގޮތުގައި ހަމައެކަނި ކެނދިކުޅުދޫގައިވެސް މި ސަރުކާރުން ގެންދަނީ އެތައް މަޝްރޫއެއް ހިންގަމުންނެވެ.
އޭގެ އިތުރުން، މި ވޭތުވެދިޔަ ހަތަރު އަހަރުގެ ތެރޭގައި ހަމައެކަނި އެ ދާއިރާއަށް ކުރެއްވި ޚިދުމަތްތަކަށް ބަލައިލިނަމަވެސް އެކަންކަން ހާމަވެގެންދާކަމަށް އީސަ ވިދާޅުވިއެވެ. ރައްޔިތުން ބޭނުންވަނީ އެފަދަ ވެރިއެއްކަންވެސް އީސަ ފާހަގަ ކުރެއްވިއެވެ.
