މިސްކިތްތަކުގެ މަރާމާތަށް ދިން އެއްމިލިއަން ބޭނުންނުކޮށް، މާލޭ ސިޓީ ކައުންސިލުން ބުނަނީ އެފައިސާއަކުން ނުފުދެޔޭ!
7 ޖެނުއަރީ 2023 | ހޮނިހިރު 07:482022 ވަނަ އަހަރު ނިމުނުއިރުވެސް އެ ފައިސާ ޚަރަދުކުރި ގޮތުގެ ތަފްސީލު ހުށަހަޅާފައެއްނުވޭ
މާލޭ ސިޓީ ކައުންސިލްގެ މޭޔަރ، ޑރ. މުހައްމަދު މުއިއްޒު
މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ޓެލެތޯން، ޗާލު މިސްކިތުގެ ނަމުގައި މާލޭ ސީޓީ ކައުންސިލުން ފަށާފައިވާއިރު، 2020 ވަނަ އަހަރު މާލެސިޓީ ކައުންސިލަށް ދިން އެއް މިލިއަން ރުފިޔާ ބޭނުންނުކުރާކަން ހާމަވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވީ، އެ މިނިސްޓްރީގެ މިސްކިތު ފަންޑުން 2020 ވަނަ އަހަރު މިސްކިތްތައް މަރާމާތުކުރުމަށް މާލޭ ސިޓީ ކައުންސިލަށް އެއްމިލިއަން ރުފިޔާ ދީފައިވާއިރު، 2022 ވަނަ އަހަރު ނިމުނުއިރުވެސް އެ ފައިސާ ޚަރަދުކުރި ގޮތުގެ ތަފްސީލު މިނިސްޓްރީއަށް ހުށަހަޅާފައި ނުވާކަމަށެވެ.
އެ ތަފްސީލު ހުށަނާޅައިގެން ސުވާލުކުރުމުން، މިސްކިތްތައް މާރާމާތުކުރުމަށް ދީފައިވާ އެއްމިލިއަން ރުފިޔާ އަދިވެސް ބޭނުންނުކުރާ ކަމަށް ސިޓީ ކައުންސިލުން ބުނެފައިވާކަމަށް މިނިސްޓަރު ވިދާޅުވިއެވެ.
2022 ވަނަ އަހަރުގެ ރޯދަ މަހު މިސްކިތްތައް މަރާމާތު ކުރުމަށް 15 މިލިއަން ރުފިޔާ ހަމަޖެއްސިއިރު، އެއިން ދެ މިލިއަން ރުފިޔާ މާލެސިޓީކައުންސިލަށް ދޭން ނިންމި ކަމަށްވެސް މިނިސްޓަރު ފާހަގަކުރެއްވިއެވެ. އެހެންނަމަވެސް ކުރީގެ އެއްމިލިއަން ރުފިޔާވެސް ޚަރަދުކުރި ގޮތުގެ ތަފްސީލު ކައުންސިލުން ހުށަހަޅާފައިނުވުމުން، މިސްކިތްތައް މަރާމާތުކުރުމަށްފަހު ބިލްތައް ފޮނުވުމުން ފައިސާ ދޭނެކަމަށް މިނިސްޓްރީން ބުނިކަމަށް މިނިސްޓަރު ވިދާޅުވިއެވެ.
އެހެންނަމަވެސް މިއަދާ ހަމައަށް އައިއިރު އެއްވެސް ބިލެއް ކައުންސިލުން މިނިސްޓްރީއަށް ހުށަހަޅާފައި ނުވާކަމަށް އިސްލާމިކް މިނިސްޓަރު ވިދާޅުވިއެވެ. މިސްކިތްތައް މަރާމާތުކުރުމަށް ސަރުކާރުން އެހީ ފޯރުކޮށްދޭން މަސައްކަތްކުރިނަމަވެސް ކައުންސިލްގެ ފަރާތުން އެކަމަށް އެއްބާރުލުން ނުލިބޭ ކަމަށް މިނިސްޓަރު ވިދާޅުވިއެވެ.
އިސްލާމިކް މިނިސްޓަރު މިހެން ވިދާޅުވެފައިވާއިރު، ސިޓީ ކައުންސިލުން ބުނީ މިސްކިތްތައް މަރާމާތުކުރަން ފަންޑު ހޯދުމަށް ޓެލެތޯން ބޭއްވީ، މިސްކިތްތައް ކައުންސިލާ ސަރުކާރުން ހަވާލުކުރީ އެއްވެސް ބަޖެޓަކާ ނުލައި ކަމަށް ވާތީ ކަމަށެވެ. އެހެން ކަމުން އެތަންތަނުގެ މެއިންޓެނަންސް މަސައްކަތްތަކާއި، މަރާމާތުތަކަށް ބޮޑެތި ހޭދައެއް ކުރަންޖެހޭއިރު، ކައުންސިލުގެ ބަޖެޓުން މިކަން އެންމެ އެދެވޭ ގޮތަށް ނުކުރެވޭކަމަށެވެ. އަދި ޓެލެތޯންގެ ސަބަބުން، ކުރިއަށް އޮތް ރޯދަ މަހަށް މިސްކިތްތަކުގައި ކުރަންޖެހޭ މަރާމާތުތައް ކުރުމަށް މަގުފަހިވެގެން ދާނެކަމަށް ސިޓީ ކައުންސިލުން ބުނެއެވެ.
